ОНКОЛОГИЯ ДИСПАНСЕРІНДЕ - НАА ДИАГНОСТИКА КІНІ
31.01.2017
Хабарлар
Эндоскопист имҷі Дмитрий КОБЕЖИКОВ
Республиканың онкология диспансерінде наа диагностика кіні азылды. Амды анда ультразвук диагностиказы, эндоскопия істезіглері иртірілер. Патологоанатомия пӧлиинде имҷілер ағырығны ілезіне сығарарынҷа тирең тоғыс апарарлар. Аны азарында араласханнар Хакасия пазы Виктор Зимин паза хазых хайраллаҷаң министр Наталья Коган.
Пір хадыллығ нааҷылалған корпус республиканың онкология диспансерінең хости турча. Мының алнында пу турада прачечнай полған, ол писче чыл ээн турған. Тыхтағлығ тоғыстарны иртіреріне республика бюджедінең 30 миллионҷа салковай позыдылған.
- Пӱӱн диагностика кіні азылчатханы уғаа танығлығ кирек - чоохтаан Хакасияның хазых хайраллаҷаң министрі Наталья Коган.
- Мының алнында онкология диспансерінің пастағы хадылында тиксі поликлиника паза диагностика тоғызы апарылған . Пу тура 1973 чылда пӱдірілген, Ағбандағы онкология имнег туразы анда 2005 чылдаң тоғынып пастаан. Чылнаң ағырығ кізілернің саны ӧсче, пір кӱнде пу поликлиниказар 150 кізі айланча. Поликлиникада орын чидіспинчетсе, айланчатхан чоннаң тоғынарға сидік. Аннаңар піс лаборатория паза диагностика кабинеттерін, иргі тураны нааҷылап, андар кӧзірер сурығны кӧдіргебіс.
Чонға онкология полызиин пирер оңдайларны чахсыландырарына Хакасияның правительствозы паза хазых хайраллаҷаң министерствозы удур парған. Наталья Коган республика пазы Виктор Зиминге наа корпустың имнегдиагностика кабинеттерін кӧзіткен. Виктор Михайловичтің хайиин мының алнындағы иргі тураның сомнары тартхан.
В.М.Зимин патологоанатомия лабораториязын кӧрген. Республиканың онкология диспансерінің ӧӧн имҷізі Олег Борисов диагностика тиріглерінеңер, хайдағ істезіглер иртірілерінеңер искірген. Пу лабораторияда гистология, цитология, иммуногистохимия істезіглері апарылар.
Мында онкология сістерін табырах ілезіне сығарчалар.
Наа кінде эндоскопия, УЗИ иртчең кабинеттер тоғынар.
- Эндоскопия паза УЗИ иртірҷең кабинеттер аразында анализтернің салтарларын ілезіне сығарчатхан кабинет пар, - чоохтаан эндоскопист имҷі Дмитрий Кобежиков. - Піс ӧкпе, хурсах паза хосханах ічегезі онкология ағырығларын ілезіне сығарчабыс. Пу істезіг оборудованиезін тӧрт чыл мының алнында Федеральнай программа хоостыра алғабыс. Пір чылда 1800 - 2000 кізі істезіг иртче . Ол цифровой видеопроцессор полызиинаң тоғынча, андар хоза нинҷе-де эндоскоп турғызылча. Цифровой видеокӧзідіг - кізі істіндегі сістерні ілезіне сығарар уғаа чахсы оңдай. Наа ла сығысчатхан кічіг сісті дее кӧзітче. Сісті ӱстӱ-тастынаң на кӧре, кізее ол хорғыс ағылча алай чох па тіп, 90 %-ке орта чоохтап пирерге чарир. Мин иткен салтарлар хоостыра онколог имҷі ағырығ кізіні аннаң андар хайди имнирін кӧрче. Мындағ имнег-диагностика оборудованиелері кізілерн табырах паза тузында имнир чахсы оңдай пирче.
Имнег паза диагностика кіні азылғаны онкология службазының тоғызын чахсыландырар тоғыстарның пастағы чардығы полча. Теесте радиология имнег корпузын пӱдірері кӧрілче. Хазых хайраллаҷаң министрнің чооғынаң, амғы туста кирек пічіктер тимнелче. 2017 чылның ікінҷі чарым чылында проект паза смета пічіктеріне нандырығ поларына ізеніс пар.
- Ізенчем ікі-ӱс чыл аразына піс онкология диспансерінде наа оборудование турғыс поларбыс. Уғаа танығлығ кирек, амды республикада ағырығны тузында ілезіне сығар турарлар, пістің чуртағҷыларға аның ӱчӱн пасха регионнарзар чӧрерге кирек чох полар. Тоғызыңар ӱчӱн алғызым читірчем. Сірернің оой нимес тоғыс. Чидіглер алғапчам... Паза ағырчатханнарның саны ас ползын, - таныхтаан Виктор Зимин.
Онкология ағырығларынаң ағырчатхан кізілернің саны, Хакасияда ла нимес, тиксі тилекейде ӧсче. Пістің республикада чыл сай ікі муңҷа ағырығ кізі сығысча. Оларның чарымы наа ла ағырып пастабысхан полча. Тузында ілезіне сыххан ағырығны имнебізер оңдайлар пар поладыр.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы