КӦГЛЕР ОЙНАПЧАТСА, СӰТ ТЕЕ ЧАХСЫ СААЛЧАТТЫР
01.02.2017
Хабарлар
ИРТКЕН НЕДЕЛЯДА ШИРА АЙМААНДАҒЫ «ЦЕЛИННАЙ» ООО-да ІНЕК САҒҶАҢ ЦЕХ АЗЫЛҒАН. ХАКАСИЯНЫҢ ПАЗЫ ВИКТОР ЗИМИН, ТОҒЫС ЧОРЫҒЫНАҢ ШИРА АЙМААНДА ПОЛЫП, ПУ ТАНЫҒЛЫҒ КИРЕКТЕ АРАЛАСХАН.
«ЦЕЛИННАЙ» ООО-да 550 ПАС ІНЕККЕ САҒҶАҢ ЦЕХ АЗЫЛҒАН. АНДА ІНЕК САҒҶАҢ 64 ОРЫН ПОЛАР. ЧАС ПЫЗОЛАРНЫ КӦРҶЕҢ 120 ОРЫНҒА ПӦЛІК ПАРОХ.
ААЛҶЫЛАРНЫ ІПЕК-ТУСНАҢ ПАЗА АЙРАННАҢ КИБІРЛИ УДУРЛААННАР. ХАКАСИЯНЫҢ ПРАВИТЕЛЬСТВОЗЫНА ПАЗА РЕСПУБЛИКА ПАЗЫ ВИКТОР МИХАЙЛОВИЧ ЗИМИНГЕ ААЛДАҒЫ ЧОНҒА ПОЛЫЗЫҒ ПИРЧЕТКЕННЕРІ ӰЧӰН АЛҒЫС СӦСТЕРІ ЧИТІРІЛГЕН. МЫНДАҒ ПОЛЫЗЫҒ ПИРІЛЧЕГКЕНІ ПӦЗІК САЛТАРЛАРҒА АҒЫЛЧА. «ЦЕЛИННАЙ» ООО-да МАЛЛАРНЫҢ САНЫ 50 %-ке ӦС ПАРҒАН, 40 КІЗЕЕ НАА ТОҒЫС ОРНЫ ТАБЫЛҒАН.
Республика пазы Виктор Зимин «Целиннай» ООО-ның ӧӧн директоры Владимир Санниковты махтаан паза прай тоғынҷыларға алғыс сӧстерін читірген:
- Владимир Николаевич, Сірер алнынзар хаалапчатхан устағҷызар. Аалда чуртап, тоғынып, сидік тее тустарда наа нимелерні чуртасха кирерге оңдай таапчазар. Анзы аалны, республиканың, хазнабыстың чуртазын тилітче. «Целиннай» - ол кӱстіг аал хонии предприятиезі.
- Сірер полызығ пирбеен ползаңар, інек сағҷаң комплекс, аалдағы олған сады, аал даа чох поларҷых, - чооғында таныхтаан Владимир Санников. - Пӱӱнгі кӱнде сірер полызыға пирген пір салковайны «Целиннай» ООО 10 салковай парыснаң айландырча.
Чоох алысхан соонаң хызыл лента кизілген, аалҷылар наа цехтың иркінін алтааннар. Пастап інек сағҷаң оборудованиені кӧргеннер. Анаң інектер азыранчатхан, тынанчатхан орынзар ирткеннер. Інегестер силос тайнан турчатханнар. Цехтағы бетон полны шлангтаң ағысчатхан суғнаң чуубысчалар.
Інек сағҷаң Татьяна Дербашева 10 чылҷа «Целиннай» ООО-да тоғын парир. «Мының алнында піс інектерні саарға базазар чӧрҷеңміс, - чоохтаан ол. - Анда інек сағҷаң тиріглернең тузаланғабыс. Пу оборудование автомат оңдайнаң тоғынча. Кнопканы пазыбыссаң, тоғын сыхча, сӱт саал парза, тізең, позы ӱс парча. Амды наа комплекссер наа оборудование алылған. Кӱнде інектерні ікі хати саапчабыс: 6.00 час иртен паза 18.00 час иирде.
Татьяна Дербашева чал ахчазына хомзынминча, чахсы тӧлепчелер тіпче. Наа комплексте інектерні саапчатхан туста кӧглер ойнатчаттырлар. Кӧглерні исте, інектер сӱтті тартынминчатхан осхастар.
Таныхтирға кирек, «Целиннай» ООО аал хонии тоғыстарының тиксі кӧстеглерінҷе тоғын парча. Хыраларда тамах таарылча, мал азығына силос тимнелче. Аал чуртағҷыларына, тізең, тоғыс пар.
Хакасияның пазы Виктор Зимин аал чуртағҷыларына олған сады пӱдірілердеңер молҷаан полған. Пӱӱнгі кӱнде ікі хадыллығ наа олған сады аалны чазапча. Амды чиит іҷе-пабалар наа школа пӱдір пирерге сурынчалар. Виктор Михайлович школа пӱдірілер тіп ізендірген.
Аалда, школалар, уламох олған садтары парда, чуртас, пір орында турбин, алнынзар парча тиирге кирек. Тиктең тібинчелер нооза: «Олғаннар - пістің таңдағы кӱнібіс, ізенізібіс».
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы