ПІСТІҢНЕР ПРАЙЗЫНЫҢ АЛНЫНДА
14.02.2017
Хабарлар
Ирткен неделяда Ағбанда «Саяны» стадионда А.В.Мельниковтың адынаң «Ӱрілген меспек» клубтың финал ойыннары пайрамни чабылғаннар. Олох кӱнде марығның халғанҷы туры ирткен.
Иртен 9.00 часта пуссар «Родина» (Киров) команда паза Индіркі Новгородтың піріктірілген командазы сыхханнар. Пастағы таймда ойын тиң парған. Командалар теести атакаа парғаннар. Тайм тоозылчатханда, Индіркі Новгород командазы алнынзар пар сыххан. 20-ҷі минутазында Тимофей Якушенко Иван Захаровха пас пиргенде, анзы меспекті хаалхаа кире сабысхан.
Ікінҷі таймда «Родинаның» хоккеизі Артём Пысин 35-ҷі минутазында санны тиңнестірібіскен. Че пір минута ирткенде, индіркі Новгород командазы пазох алнынзар сыххан. Гол Иван Захаров кир пирген. Ойын тоозылчатханда, кӧрігҷілер Индіркі Новгород командазы чиңіс тудар тіп сағынғаннар. Че халғанҷы 40-ҷы минутада «Родина» хоккеизі Рудольф Садаков меспекті хаалхаа кире сапхан. Ойын 2:2 саннаң тоозылған.
Ікінҷі ойында «Юность-ИЦС» (Иркутск) паза «Водник» (Архангельск) командалар тоғасханнар. Матч 1:1 саннаң тоозылған. 8-ҷі минутада Данил Пашков («Юность-ИЦС») паза 38-ҷі минутада Авдей Мыльников («Водник») голлар киргеннер.
Че иң хынығ паза хазыр ойын пастағы орын ӱчӱн парған. Мында «ДЮСШ Абакан» (Ағбан) паза «Енисей» (Хызылчар) тоғасханнар. пістің олғаннарыбыс, пылтыр финалда утырт салғаннарында, пӱӱл пастағы орын утып аларға сағынғаннар. Че ойын пасталғанда, 6-ҷы минутада, «Енисей» атакаа парчатханда, ДЮСШ-тың олғаннары меспекті аутсар сабысханнар. «Енисейнің» хоккеизі Максим Митеев пулуңнаң меспекті сығарыбысханда, Антон Савлук гол кирібіскен. Че алты минута ирткенде, пасха хоккеисттің орнына сыххан Артём Фазлы меспекті «Енисейнің» хаалхазына кире сабысхан. Пастағы тайм 1:1 саннаң тоозылған.
Ікінҷі таймда командалар ідӧк тиңе ойнааннар. Таныхтирға кирек, тиң ойнабысса даа, пістің команда саннар хоостыра пастағы орынға сығар. Че марығның халғанҷы ойынын хайди даа сіліг тоозарға кирек. Ойын тоозылчатханда, ДЮСШ-ның хоккеизі Матфей Лышко «Енисейнің» хаалхазынзар ікінҷі гол кирібіскен.
Че «ыырҷы» утырарға сағынмаан. прай команданаң атакаа пар сыххан даа полза, «Енисей» паза гол кир полбаан, ол 1:2 саннаң утырт салған.
Ойын тоозылғанда, пістің хоккеисттер ӧрініп, пір орында чыылызып, хуҷахтас турғаннар. Іди «ДЮСШ Абакан» команда «Ӱрілген меспек» клубтың мариинда чиңіс тутхан.
Халғанҷы ойында «Ерофей» (Хабаровск) хоккеисттері «Кузбасс» (Кемеров) команданы 8:2 саннаң утып алғаннар.
Ойыннар тоозылғанда, «Ӱрілген меспек» клубтың Россия марии пайрамни чабылған. Олғаннарны алғыстирға Ағбан город пазы Николай Булакин сыххан.
- Аарлығ олғаннар, - чооғын пастаан Николай Генрихович. - Сірерге, чарғыҷыларға улуғ алғызым читірчем. Сірер улуғ пайрам піске сыйлап пиргезер. Марығлар тоозылды, чиңісчілер табылды. Чиңіс тутпаан командалар хомзынмазыннар. Мында олар устарын кӧдіріп алғаннар.
Ідӧк Николай Булакин чиңісчее паза сыйыхтығ орыннарға сыххан командаларға кубоктар паза медальлар читірген.
I орынға «ДЮСШ Абакан» (Ағбан) сыххан,
II орында «Енисей» (Хызылчар) пол парған,
III орында - «Ерофей» (Хабаровск).
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде