ІҶЕ-ПАБАЛАРНЫ ТОҒЫС ТІЛИРГЕ КӰСТИР ПӦГІННЕҢ
17.02.2017
Хабарлар
Хакасияның Ӧӧркі Чӧп президиумы ирткен чыылиинда онға чағын сурығ кӧрібіскен. Ӧӧн сурығларның пірсі Хакас Республиканың пала ахчазынаңар законынзар алызығлар кирердеңер полған. Депутаттар ідӧк республиканың кинектеріне тоғыс орыннарын пирҷең законзар алызығлар кирер сурығны ӱзӱрібіскеннер.
Хайди чарытхан Хакасияның социальнай арачыланыс министрі Наталья Карамашева, «Хакас Республикадағы палаа хазна пособиезінеңер» законзар кирілчеткен алызығлар ол тӧлегні алҷаң оңдайны орталадарлар паза федеральнай законодательстваа килістіре идерлер. Мында чоох парча ай сай тӧлелчеткен пала ахчазынаңар (амғы туста аның сині - 256 салковай, 1 февральдаң сығара - 266 салковай). Кирілчеткен алызығларның пірсінҷе, іҷе-пабалар (алай оларның пірсі) тоғынминчатса паза чонға тоғыс тапчаң службаларда санға турбаан полза, ол пособиені ал полбастар тіп кӧрілче. Социальнай арачыланыс министрінің кӧрізінең, анзы. тоғынмин, пала ахчазына ла чуртирға кӧнік парған іҷе-пабалардаң тоғыр кӱрезерге оңдай пирер, іҷе-пабалар нандырығлығ поларын тыыдар. Пір сӧснең чоохтаза, іҷе-пабаларны тоғыс тілирге кӱстир осхас.
Ӧӧркі чӧптегілерні кирілчеткен алызығлар тың на чӧпсіндірбееннер. Ӧӧркі Чӧп кнезі Владимир Штыгашев «Ноға-да піс ахчаны пайлардаң нимес, чуға чуртапчатханнардаң аларға хынадырбыс» тіп чоохтанған. Ӧӧркі Чӧптің хазых хайраллирынҷа паза социальнай политикаҷа комитедінің кнезі Владимир Костюш ідӧк тоғыр полған. Аның кӧрізінең, анзынаң іҷе-пабаа пала пособиезін аларына улуғ сидіксіністер иділче. Кӧзідімге, ыраххы аалдаң аймах кінінзер чидіп аларға асхынах нимес ахча киректелче, чонға тоғыс тапчаң службазар хайди даа парарға киректелер нооза. Тоғыс чох полчатхан ӱчӱн пособиенің сині ідӧк улуғ нимес, салтарында ол ахча чолға ла хорадыл пар турар. Че хайди даа полза, закон проекті кирілгеніне саналған. Че пу сурығҷа ам даа тоғыс апарылар тіп сағирға халча.
Ікінҷі закон проекті кинектерге тоғыс орыннарын табарына теелген. Хакасияның чонға тоғыс тапчаң хазна комитедінің кнезі Ирина Ахметованың искіриинең, «Хакас Республикада кинектерге тоғыс орыннарынҷа квоталар паза резервтер идердеңер» законзар кирілчеткен алызығлар оларға тоғыс табар гарантияларны улам тыыдар. Хайди таныхтаан Ирина Ахметова, пӱӱнгі кӱнде ол тоғыс хомай нимес апарылча. 2017 чылға республикада 648 тоғыс пирчеткеннер кинектерге 1191 квоталығ тоғыс орнын тударлар тіп кӧрілче. Хоза пос киреен азарға хабазарынҷа тоғыс апарылча. Іди тӧрт кізі, 120 муң салковайға субсидия алып, пос киреен азып алтыр. Таштып аймаанда кресен-фермер хониин тӧстеп алтырлар. Ағбанда пирілген ахчаа ыстаан палых тимнеҷең цех азылтыр. Паза пис кинек кізі, наа профессия алып, тоғысха кіріп алтыр.
Ӧӧркі Чӧп президиумы тоғыс таап алчатхан кинектернің санын ӧскірер пастағнаң чарас салған. «Хазна комитеді улуғ паза кирек тоғыс апарча, - таныхтаан Владимир Штыгашев. - Анзын тоғыс пирерінҷе саннар киречілепчелер».
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы