АМҒЫ ЧИИТТЕР ПАСХА ОҢДАЙЛЫҒ, САҒЫСТЫҒ ПОЛАРҒА КИРЕК
21.02.2017
Хабарлар
МЫНДАҒ СӦСТЕРНЕҢ ТООЗЫЛҒАН УЛУҒ НИМЕС ПРЕСС-КОНФЕРЕНЦИЯ, ХАЙЗЫН ИРТКЕН НЕДЕЛЯДА Н.Ф.КАТАНОВТЫҢ АДЫНАҢ ХАКАС ХАЗНА УНИВЕРСИТЕДІНІҢ РЕКТОРЫ ТАТЬЯНА КРАСНОВА ИРТІРГЕН. АНДА ОЛ УНИВЕРСИТЕТТІҢ ЧИДІГЛЕРІНЕҢЕР ПАЗА КИЛЧЕТКЕН ЧЫЛҒА ПӦГІННЕРІНЕҢЕР ИСКІРГЕН.
ТАТЬЯНА КРАСНОВА ХГУ-ның РЕКТОРЫНА ТАБЫЛҒАННАҢ ІКІ ЧЫЛ ИРТ ПАРДЫ. ПУ ТУСХА УНИВЕРСИТЕТ КӦП СИДІКСІНІСТЕР ТОБЫРҒАН ПАЗА АЛНЫНЗАР ХААЛАҒЛАР ИТКЕН. ИРТКЕН ЧЫЛДА, ХАЗНА АККРЕДИТАЦИЯЗЫН МАҢНАНЫСТЫҒ ИРТІП, ПІСТІҢ УНИВЕРСИТЕТ РОССИЯНЫҢ ИҢ АРТЫХ 100 УНИВЕРСИТЕДІ САНЫНДА ПОЛ ПАРҒАН. ПӰӰНГІ КӰНДЕ ХГУ НОВОСИБИРСКТЕГӀ, ТОМСКТАҒЫ ПАЗА ДАА ПАСХА ПӦЗІК ӰГРЕДІГ УЧРЕЖДЕНИЕЛЕРІНЕҢ ХАЛБИНЧА.
ХАКАС ХАЗНА УНИВЕРСИТЕДІНЗЕР 10 ИНСТИТУТ, 4 КОЛЛЕДЖ, 45 КАФЕДРА КІРЧЕ ПАЗА ӰГРЕДІГ 167 ӰГРЕДІГ ПРОГРАММАЗЫНҶА АПАРЫЛЧА. МЫНДА 9 МУҢ АЗЫРА СТУДЕНТ ПІЛІС АЛЧА ПАЗА ПРЕПОДАВАТЕЛЬЛЕРНІҢ 80 ПРОЦЕНТІ - НАУКА ДОКТОРЫ ПАЗА КАНДИДАДЫ. УНИВЕРСИТЕТТІ ТООСХАН СТУДЕНТТЕРНІҢ 75 ПРОЦЕНТІ ХАКАСИЯДА СПЕЦИАЛЬНОСТЬ ХООСТЫРА ТОҒЫНЧА.
Нинҷе-де ай пазынаң абитуриенттернің маң чох тус пасталар. Хайди чоохтапча Татьяна Краснова, пӱӱл университетте 1619 бюджет орны кӧріл парған. Ідӧк анда наа специальностьтар азылар.
- Университеттің ӧӧн пӧгіні - республиканың промышленнозына паза экономиказына кирек кадрларны тимнирі. Аннаңар піс наа специальностьтарны азарға кӱстенчебіс. Іди пӱӱл 1 сентябрьдаң университет ортын профессиональнай ӱгредігҷе системнай администраторларны паза программисттерні тимнеп пастир. Андар 9 класс тоосхан ӱгренҷілер экзаменнер чох алылар. Ағаа хоза, 2018 чылдаң пасти ХГУ-да «Тағ тоғызы» специальность азылары кӧрілче. Аны азарға уғаа сидік полар. Піске ӧнетін оборудование аларға кирек полар, че республикаа инженерлер кирек, аннаңар пу специальностьты азарға піс лицензия аларға матап кӱстенчебіс, - таныхтаан Татьяна Краснова.
Ідӧк Хакасия правительствозының хабазиинаң пӱӱл университет кӧстегліг оңдайнаң аалларға аймах предметтер ӱгретчілерін тимнеп пастир. Пу оңдайнаң 25 кізі алылар. Хайди чоохтапча ректор, кӧстегліг оңдайҷа ӱгренген студент, диплом алза, хайди даа аалзар тоғынарға парарға кирек, ӱгренчеткен туста, тізең, студенттерге хоза ӧнетін стипендия тӧлелер - 2 муң салковай.
Таныхтирға кирек, республикаа кирек специальностьтарға кӧстегліг оңдайҷа ӱгредер тоғысты ХГУ хаҷаннаң апарча. Кӧзідімге, «Хакас тілі паза литература», «Имнег кирее» специальностьтарға ідӧк кӧстегліг оңдайҷа ӱгреніп аларға чарир. Студенттер ідӧк хоза стипендия алчалар: 2 паза 3 муң салковай.
Хакас хазна университеді таңдағы студенттернең азынада тоғыс апарча. Ирткен чылда ХГУ-ның тоғынҷылары, республика муниципалитеттерінҷе чӧріп, улуғ класстар ӱгренҷілерінең тоғазығлар иртіргеннер. Анда олар ӱгренҷілерні ХГУ-ның чуртазынаң таныстырғаннар.
Ӱгредіг учреждениезінде чылда нинҷе-де хати Азых ізіктер кӱннері иртче. Анда предметтер олимпиадазында ӱгренҷілерге хоза балл тоғынып алар оңдай пар. Абитуриент ХГУ-зар ӱгренерге кірчетсе, ол балл хазна экзаменінің баллына хозылча.
- Хай пірее специальностьтарға улуғ конкурс полча. Аннаңар полған на балл хайығда. Олимпиадада алып алған балл абитуриентке піссер ӱгренерге кірерге чол асча, - таныхтаан Татьяна Краснова.
Мының алнында чурт кирексіпчеткен студенттерге общежитиеде орын прайзына пирілбеҷең полза (ӧӧнінде ӧкіс халған алай чуға чуртапчатхан сӧбірелернің палаларына), амды, хайди чоохтапча ректор, общежитиеде орын прайзына пар. Общежитие ӱчӱн айда студент 500 салковай тӧлепче. Ол уғаа асхынах. Ағаа хоза, вуз студенттерге стипендиянаң чахсы хабасча.
- «4» паза «5» паалағларға ӱгренчеткен студенттерге академическай стипендия тӧлепчебіс, ідӧк санға алылча студенттің наукада, спортта, культурада паза даа пасха кӧстеглерҷе чидіглері. Андағ студенттер ӧӧн стипендияларына хоза айда 9 - 11 муң салковай алчалар. Ідӧк университет чуға чуртапчатхан сӧбірелернің палаларына паза ӧкіс студенттерге чахсы хабасча. Социальнай стипендияны чылда 2 муң азыра студент алча, - чооғын узаратча ректор.
Тиксі алза, Хакасияның ӧӧн университеді, пасха пӧзік ӱгредіг заведениелері чіли, ідӧк тӧреміл алнынзар хаалағлар итче: студенттер паза преподавательлер регионнар аразындағы, Россия паза чоннар аразындағы марығларда, проекттерде араласчалар. Ученайлар аймах кӧстеглерҷе наука тоғыстарын апарчалар. Улуғ хаалағлар робототехникада, имнег киреенде, ветеринарияда паза даа пасха кӧстеглерде пар. Ӱр ниместе ХГУ-ның преподавательлері паза студенттері роботизированнай перчатка идіп алғаннар. Ол кинек кізілерге уғаа тузалығ ниме. Аны олар пу чағында кӧзідіге сығарарға пӧгінчелер.
- Чуртас пір орында турбинча, ол тӧреміл тиліпче, аннаң хада чуртасха наа технологиялар кирілче. Аннаңар чииттерге пасха оңдайлығ, сағыстығ поларға кирек. Андағ кізі хаҷан даа пӧзік паалалча паза тоғыс пирчеткеннернің аразында кирексіністе полча, - чооғын тоосхан пресс-конференцияда ХГУ-ның ректоры Татьяна Краснова.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы