СТУДЕНТ ОТРЯДТАРЫ ХАТАП КӰС АЛЫНЧАЛАР
22.02.2017
Хабарлар
Хакасияның студенттері Виктор КОЛЬЧИКОВ, Елена САГАТАЕВА, Уран ХЕРТЕК паза Виталий БОЗЫКОВ
Россия президентi чарадиинаң 17 февральда пістің хазнада Россияның студент отрядтары кӱні (РСО) таныхталча.
Че иң пастағы студент отрядтары 1959 чылда тӧстелген. Андада МГУ-ның студенттері Казахстанзар тоғынарға парғаннар. Студент отрядтарының кӱнін Хакасияда ідӧк таныхтапчалар. Ирткен неделяда, 17 февральда, Ағбанда Хакас драма театрынзар университеттің, институттарның, техникум-колледжтернің паза училищелернің ӧткін студенттері чыылысханнар. Анда студент отрядтарынзар чииттер алылғаннар.
Пӱӱнгі кӱнге Хакасияда тӧрт студент отряды: пӱдіріг, аал хонии, сервис паза ӱгредіг. Ирткен чылда чииттер Крымда, Хызылчарда тоғынғаннар, пӱдіріг отрядтары, тізең, Амур облазындағы «Восточный» космодромның пӱдіриинде араласханнар паза Хакасияның улуғ пӱдіріглеріне, аал хониина улуғ хозым иткеннер.
Хакасиядағы Сибирьдегі федеральнай университеттің Хакас техническай институдының студенті Виталий Бозыков пӱдірігҷее 4-ҷі курста ӱгренче. Ол «Сағын» пӱдіріг отрядында комиссар полча. Ирткен чылда аның отряды Ағбандағы музей-культура кінінде тоғынған.
- Студент отрядтары чииттерге тоғынарға, устарын таптирға, ахча тоғынып аларға чахсы оңдай пирче. Пістің отряд, Хакасияда тоғынып, 40-ар муң салковай тоғынып алған, космодромда тоғынғаннар, тізең, 70-80-ар муң салковай. Піске чайғызын ахча тоғынып паза тынанып алар чахсы оңдай полған, - чоохтапча Виталий.
Виталий Бозыков пӱӱл ХТИ-ны тоосча. Аннаңар студент отрядына кір полбас. Анзына чиит оол ачырғанча. Хайди ол тіпче, полған на оол-хыс, чайғызын пос тузын тикке иртірбин, студент отрядына кірерге кирек.
Хайди чоохтапча Хакасиядағы «Альфа» чииттер программазының устағҷызы Мария Шестакова, пӱӱнгі кӱнде республикада студент отрядтарына 150 азыра кізі кірче. Ирткен чайғызын олар прайзы даа тоғынғаннар, хысхызын, тізең, олар волонтер тоғызынаң кӧп айғасчалар, чайаачы паза спорт марығларында араласчалар.
Хакас драма театрында студент отрядтарының араласчылары Хакасияның оол-хыстарын студент отрядтарынзар кірерге хығырғаннар. Чыылығның ӧӧн девизі - «Амды тоғынарға модада». Студент отрядтары анда улуғ презентация тимнеп салғаннар паза мастер-класстар иртіргеннер.
Пӱӱл студент отрядтары санына кірген студенттер Крымзар тоғынарға парарлар. Ідӧк хай піреезі Хызылчарда иртер универсиаданың пӱдіріг тоғыстарында аралазар. Хайди чоохтапча Мария Шестакова, чал ахчазы хомай полбас - 10 - 40 муң салковай.
Тиксі Россияда иң кӧп ӱгретчілер отряды - 65 муң азыра кізі, сервис отрядында - 44 муң, пӱдіріг тоғызында -54400 кізі паза аал хонии отрядында 23 муң азыра кізі саналча.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы