АЛТЫН АРЫҒ ПӰӰНГІ КӰНДЕ
07.03.2017
Хабарлар
Ирткен неделяда С.П.Кадышевтің адынаң культура кінінің кічіг залында кізілер тығырама чыыл парғаннар. Олар «Читіген» драма паза этническай кӧглер театрының «Алтын Арығ» - рестлер» наа ойынын кӧріп аларға килгеннер.
Хакас тілінең турғызылған спектакльның режиссеры Саяна Ултургашева полча, пьесаны Хакасияның саблығ артизі Кирилл Султреков пас салған.
«Алтын Арығ» - рестлер» - кӱлкістіг ойын. Аның полтазы мындағ. Ортын вектегі Хакасияда Исатай Хан чуртапча. Ханның чалғыс оолғы Тудаң ипчі аларға идібісче. Че олаңай хыстар ағаа кирек чоғыл, ол тӱзінде Алтын Арығны кӧрген. Че хайдаң алҷаң алыптығ нымахтағы осхас хысты? Исатай Хан хамзар полызығ сурап айланча. Анзы, ӱр сағынмин, 21 векте чуртапчатхан Изольда Тарбанакованы, хапха суғып, тут килче. Изольда менеджер полып істенче, хазыр хылии ӱчӱн ӧӧрелері аны «Алтын Арығ» - рестлер» адапчаттырлар. Ортын векте, хакастарнаң тоғазып, чиит ипчі сағыбаан киректерге тоғасча.
«Алтын Арығ» - рестлер» ойын уғаа чахсы турғызылған, мында кӱлкістіг орыннар кӧп. Тиктең нимес спектакль тооза кӧрігҷілер ээреп хатхырчатханнар. Че олох туста ол сағысха тӱзірче. Амғы кізілер араға ізерге хынчатханы, пос тілін пілбинчеткені чахсы кӧзіділ парған. Ідӧк ойында хакас кибірлеріне хайығ айландырылча. Кӧзідімге, хыс оғырлааны андағ чахсы кибір бе? Чиит хыстың кӧңнін піліп албин, аны таныбас кізінең чуртат салҷаңнар.
Спектакльда ӧӧн рольны Вероника Ивандаева толдырған. Аның Изольдазы пірдеезіне маң пирбинчеткен, кӱлетке паза аарлығ чазанҷыхтарға хынчатхан ипчі. Кізілер аразында ол позын турыстыра тудын полбинчатса даа, аның істі-тасты пар. Сӱмекчін хыс Айдоканы Изольда нимее салбин полбинча, аның ӧӧн сағынған сағызы - иптіг ирге парып, палалар таап аларға. Таланттығ Вероника Ивандаева Изольданы киртіністіг ойнабысхан, артисттің узына морсынып, кӧрігҷілер матап айа сапханнар.
Исатай Ханның ипчізі Табылдук абыйаны Элмира Аманбаева ойнапча. Пу матырны кӧріп, аннаң ипчілерге посха хынарға ӱгренерге чарир. Хайди ол позын кӧдірче: «Хыйға позым, сіліг позым, ӧкер позым». Че олох туста Табылдук абыйа чазырхаас оолғына алаахтырт чӧрчеткенін сизінминче. Евгения Костякова сӱмекчін хыс Айдоканың омазын чарытча. Сын хакас хызы мындағ хыйға сағыстығ, иптіг чоохтығ поларға кирек.
Минің кӧрізімнең, ойында кӧзіділген ир кізілер ипчілерге пір дее турбинчалар. Изебі чох пай Исатай Хан (Алексей Торбастаев) ипчізінің оңдайынҷа ла пол чӧрче. Чирлерін Изольдаа пыластырарға идібіскенде ле, позының хылиин кӧзітче. Аның чазырхаас оолғы Тудаңны (Каскар Чаптыков) Изольда «ни рыба, ни мясо» тіп орта паалапча. Кӧрбеес хам (Алексей Сагатаев), кізілерге полызар орнына, экстрасенс Коля полып, оларны алаахтырча. Пу матырларны чиит артисттер ойнапчалар. Алексей Сагатаевнең Каскар Чаптыков драма даа, кӱлкістіг дее рольларны чалтырама толдырыбысчалар. Оларның устары ойыннаң ойынға ӧсче. Чайаачызынаң Алексей Торбастаев ӧріндірген. Чиит артист «Читіген» театрзар пылтыр кӱскӱзін не тоғынарға килген. Исатай Ханны ойнап, Алексей, пӱгӱреліп, азағын талтах идіп пас чӧрче. Ипчізіне пастыр салған матырны чиит кізі ойнапчатханын пір дее сағынмассың.
Ідӧк Хакас драма театрының артизі Кирилл Султрековтың тоғызын таныхтабызарға кирек. Мының алнында Кирилл Георгиевич тілбестегҷі полып сабланҷаң. Ол хакас тіліне У.Шекспирнің, Г.Уэллстың, Н.Мошинаның тоғыстарын тілбестеен.
К.Г.Султрековтың пастағы пьесазы хайхатча. Ізенчебіс, таланттығ чир-суғҷыбыс мыннаң мындар хынығ пьесалар пазар.
Режиссёр Саяна Ултургашева чахсы спектакль чайап салған. «Читіген» театрнаң Саяна Сапиновна ікінҷі хати тоғынча. 2010 чылда ол мында «Ахол» ойын турғысхан. 2012 чылда пу спектакль «Чир-чайаан» чоннар аразындағы фестивальда лауреат атха турысхан. 2015 чылда, тізең, ол «Алтын маска» сыйыхтың «Маска плюс» программазына кирілген. «Алтын Арығ» - рестлер» ойын критиктернің хайиин тартарын пірдеезі пілбинче, че ол хакас кӧрігҷілернің иң хынчатхан спектакльы поларына ікінҷілес чоғыл.
Пу чағында артисттер «Алтын Арығ» - рестлер» спектакльны хатап ойнирлар. Аны 10 мартта 19.00 часта С.П.Кадышевтің адынаң культура кінінің кічіг залында кӧріп аларға чарир.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы