АБАХАЙЛАРҒА ЧАРЫДЫЛЧА
07.03.2017
Хабарлар
Ирткен позырахта В.Г. Чаптыковтың адынаң Хакас филармониязында хайхастығ концерт ирткен. Ол Чоннар аразындағы ипчілер кӱніне чарыдылған. Абахайларға сыйых идіп, прай сарыннарны ир кізілер толдырғаннар.
Чоохтирға кирек, таланттығ ырҷыларны истіп аларға кӧп кізі килген. Орын чидіспинібіскенде, филармонияның тоғынҷылары хоза одырчыхтар киргеннер. Чалахай иир ікі пӧліктең пӱткен, аны дирижер Вячеслав Инкижеков устапчатхан симфоническай оркестр асхан. Музыканттар Л.Бетховеннің 7 № симфониязының III чардығын толдырғаннар. Анаң, сценазар сығып, Владимир Терешков, Артур Марлужоков паза Даниил Тарасов П.Чайковскийнің «Дон Жуанның серенадазын» сарнааннар. Оларның кӱстіг ӱннеріне кӧрігҷілер аптатханнар.
Концерттің пастағы чардығы саблығ операларның паза оперетталарның ӱзіктерінең, романстардаң пӱткен. Залдағы чон «Очи черные» романсты, «Сильва» опереттадағы Бонинің куплеттерін истіп алғаннар. Полған на сарын соонда кӧрігҷілер матап айа саап турғаннар. Мында Хакасияның чон артизі Владимир Терешковты таныхтирға кирек. Бас ӱнніг ырҷы сыбыра пӧзік синде сарнапча. Владимир Дмитриевич «Чуртаста пip хати ла тоғазығ полча» ырны паза «Ізестіг нанҷылар» фильмнің Лапиннің романзын толдырғанда, кізілер аны тынмин даа искеннер. Ідӧк турыстыра кӧрінген Хакасияның паза Алтайның саблығ артизі Артур Марлужоков. Артур Викторович пӱӱл Хакас филармониязының хоос устағҷызына турғызылған, аннаңар амды пістің кӧрігҷілерні ол чайаачызынаң тӧреміл ӧріндірер.
Абахайларға чарыдылған иирнің ікінҷі чардығында кізілер эстрада сарыннарын истіп алғаннар. Че пастап симфоническай оркестр Л.Бермудестің «Коламбия» чайаачы тоғызын ойнабысхан. Композиторның латин музыказы залдағы чонның кӧңнін кӧдірген. Эстрада сарыннарын ӧӧнінде чиит артисттер толдырғаннар. Таланттығ Олег Гриценко А.Бабаджанянның «Музыканы мағаа айландыр пир» паза Ю.Антоновтың «Синнең сіліг таппассың» ырларын сарнаан. Аннаң хада тоғынчатхан арғызы Алексей Петриченко И.Дунаевскийнің «Как много девушек хороших» саблығ ырын толдырған. Баритон ӱнніг Даниил Тарасов операларның узіктерін дее, эстрада сарыннарын даа чахсы сарнабысча. Кӧрігҷілер чиит артистке матап айа саапчатханнар.
Филармонияның концерттерінде сыбыра араласча кічіг частығ Евгений Берш. Оолағастың ӧтіг ӱні кізілерге чахсы таныс. Ол В.Гаврилиннің «Іҷем» ырын сарнаан. Аарлығ іҷелерге чарыдылған сарынны чалахай иирге килген чон чылығ удурлаан. Ипчілер кӱніне чарыдылған иир пір тыныснаң ирткен. Абахайларны чалахай ӱлӱкӱннең алғыстирға пӧгініп, Хакас филармониязының артисттері паза музыканттары концертке прай кӱстерін салғаннар. Чалахай иир тоозылғанда, кӧрігҷілер сценаның устарына сіліг порчолар читіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы