CУF ПАЗОХ «ЧАРЛАРЫНАҢ» СЫХТЫ
21.03.2017
Хабарлар
Ағбанда 18-20 мартта суғда чӱзер спорт кӧрімінҷе «Сибирь кубогына» тиксі Россия марииның 3-ҷі чардығы Ағбан город пазы сыйыхтарына ирткен.
Марығда 2001-2002 чылларда тӧреен ооллар, 2003-2004 чылларда тӧреен оолағастар, 2003-2004 паза 2005-2006 чылларда тӧреен хызыҷахтар араласханнар, прай - 300-че спортсмен.
Хакасиязар спортсменнер Иркутск, Кемеров, Новосибирск, Омск, Томск областьтарынаң, Алтай, Хызылчар крайларынаң, Бурятия Республикадаң паза Моол чирінең килгеннер. Ідӧк марығда Хакасия спортсменнері араласханнар.
Марығ пайрамни азылғанда, командалар араласчыларын чеестееннер. Олар бассейн хыринда турыбысханнар. Оларны алғыстирға Россияның суғда чӱзер спорт кӧрімінҷе федерациязының президиум кізізі Сергей Кашников, Хакасияның спорт министрінің орынҷызы Виталий Мордакин паза Ағбан город пазы Николай Булакин сыхханнар.
- Аарлығ спортсменнер, оргкомитет, - теен Сергей Кашников, - Николай Гэнриховичке, Сибирь кубогын иртірерге оңдай таапчатхан ӱчӱң улуғ алғызым читірчем. Піс Ағбанзар килерге хынадырбыс. Сірер пісті чахсы удурлапчазар. Мыннаң мындар хада-пірге тоғынарына ізенчем. Олғаннарға марығда чахсы чидіглерге чидерге, Россия чемпионадына таллағны иртібізерге, анда турыстығ аралазарға алғапчам.
Анаң Виталий Мордакин чоох тутхан:
- Хакасияның спорт министерствозы адынаң мындағ пӧзік синдегі марығ азылғанынаң прайзын алғыстапчам. Сірерге «табырах» секундалар кӧзіт пирерге алғапчам. Суғда чузер спорт кӧрімінҷе федерациязына паза Ағбан город администрациязына, марығны Хакасияда иртірер оңдай пирчеткен ӱчӱн, алғызым читірчем.
- Аарлығ арғыстар, - теен Николай Булакин, - мағаа сірерні Ағбанда пазох удурлирға ӧріністіг. Пӱӱн пасталчатхан марығ уғаа нандырығлығ. Ол сірерге, чиит спортсменнерге, туза полар. Ағбандағы бассейннің суунда сірерге чӱзерге ниик ползын.
Пӱӱл Ағбанда мындағ улуғ марығ ікінҷізін иртті. Анзы городта чахсы спорткомплекс пӱдіріл парғанын кӧзітче. Спортсменнерге андағ марығда араласчатханы туза полар. Олар улуғ марығларда устарын таптапчалар. Спорттың кӧп кӧрімнерінде марығлар чардыхти иртче. Чардыхтар аразында тренерлер спортсменнерін чахсы тимнебізерге пӧгінчелер. Пастағызын на араласчатхан спортсменнерге пу ӧӧн марығ полча.
«Ағбан» спорткомплекс пасха регионнардаң килген спортсменнернің кӧңніне кірген. Иркутск облазының спортсмені Никита Куренкин пістің республикада пастағызын на полды.
- Мин Шелехов городтаң килгем, - чоохтапча Никита. - Пу спорт кӧрімінең тӧртінҷі чылы айғасчам, ікінҷі разряд нормативін толдырыбыстым. Ағбанда мин пастағызын на полдым. Бассейнзер читкенҷе, піс кӧп орамалар ирткебіс. Город сіліг, кӧңніме кірген. Спорткомплекс уғаа чахсы, улуғ городтардағылардаң халбинча. Мында кӱстіг спортсменнерні тимнепчелер тіп сағынчам. Марығлар пӧзік синде иртче, тудығлар полбинча.
Моол чирінең килген спортсмен Цэлмэг тренер Содгерел Чиижирнің холында тимненче. Тренернің чооғынаң, Ағбан оларның кӧңніне кірген. Пазағы чылда олар Сибирь кубогына пазох Ағбанзар килерге пӧгін тутчалар. Содгерел Чиижир Сибирьдегі спортсменнернің тимненізі чахсы тіп таныхтаан.
Марығның пастағы кӱнінде ДЮСШ ӱгренҷілері ікі хола медаль утып алғаннар. Олар олаңай оңдайҷа эстафета мариинда улуғларның паза кічіглернің группаларында ӱзінҷі орыннарға сыхханнар.
СӦС СӦӦ: Марығ тузында паза nip танығлығ кирек полған. «Ағбан» спорткомплекстің директоры Дмитрий Кремзуков, Сибирь чемпионадын паза первенствозын пӧзік синде иртірген паза суғда чӱзер спорт кӧрімі тилізіне улуғ хозым иткен ӱчӱн, Россияның суғда чӱзер спорт кӧрімінҷе федерациязының президенті Владимир Сальниковтың алғыстас пічиин алған. Сыйых Дмитрий Дмитриевичке аның тӧреен кӱнінде, 19 мартта, читірілген.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде