ПАЙРАМНАҢ!
22.03.2017
Хабарлар
Аарлығ коллегалар, аарлығ арғыстар! Пiс пайрамнығ кӱнні таныхтапчабыс - Хакасия прокуратуразына 90 чыл толчатханын.
22 мартта 1927 чылда, РСФСР-ның Чарғы пӱдізінеңер чарадиина тӧстеніп, Сибирь крайындағы Хакас округының прокуратуразы тӧстелген. Пу кӱн хакас прокуратуразының тӧреен кӱніне саналча, Хакасияның пастағы прокуроры Демьян Степанович Рудяков полған.
Пістің региондағы прокуратураны азахха турғызар паза тилідер тоғыс сидік парған. Хазна позы ам на азахха турып пастаан нооза, аннаңар ирткен вектің 20 чылларынаң сығара тархынны пӱдірген кізілерге, нандырығлығ тоғынарға ла нимес, посты прай ол тоғысха пирінерге килісчең. Хакасия прокурорлары наа хазнаның пай тархынына турыстығ хозым иткеннер, пӱӱнгі кӱнде дее Хакас Республика прокуратуразы хазна пӱдізінің ізестіг хадағҷызы полча, законностьты паза правопорядокты арачылапча, сайбағҷылардаң тоғыр кӱресче, Россия Федерациязы чуртағҷыларының Конституциядағы праволары толдырылзын тіп кӧрче.
Прокуратураның авторитеді хаҷан даа сын киректернең тудылҷаң. Хакасиядағы иң аар сурығлар хаҷан даа пістің хайиибыста полҷаң.
Прокуратура органнары тилізінің амғы чардығында чазы читкелектерні, ветераннарны, тоғын полбинчатханнарның пасха категорияларын арачылирынҷа кӧп кӱс салылған. Право арачылир тоғысты апарып, прокурорлар кӧп кізінің чуртха, пенсияа праволарын айландырғаннар. Піс ідӧк кізілернің істеніс праволары ӱчӱн турызарынҷа улуғ тоғыс апарчабыс. Бюджет сферазындағы законнар, хазна садығларынаңар, ибіркі чир-чайаанны хайраллирдаңар законнар хайди толдырылчатханы тӧреміл сыныхтағда тудылча. Піс идінҷектернің праволарын арачылир тоғысты тӱзімніг апарчабыс.
Тоғыстың ӧӧн кӧстеглерінің пірсі коррупциядаң тоғыр кӱрезері полча. Прокурорлар хазна паза муниципалитет ис-пайынаң закон хыйыстыра тузаланчатханынаң палғалыстығ киректерні ілезіне сығарчалар, оларның кӱстенізінең нормативнай акттардаң коррупция идеріне килістіре оңдайлар хыйа иділчелер.
Олох туста піске ам даа кӧп ниме идерге кирек, социальнай паза экономика сфераларында, коррупциядаң, экстремизмнең паза пасха даа хорғыс ағылчатхан сайбағлардаң тоғыр кӱрезерінде.
Аарлығ арғыстар!
Мин ізенчем, Хакасия прокуратуразы тоғынҷыларының пірге паза чахсы тоғынғаны, тоғысха нандырығлығ хайғаны прай турғызылған пӧгіннерні тӱзімніг пӧк турарына хабазар.
Пістің ветераннарыбыс тӧстеен чахсы кибірлерні ідӧк хайраллирға паза аарлирға, Прокурор присягазын сайбабасха, тоғысха пирінерге паза усты ӧскірерге кирек.
Ӱр чыллар тіспен істенгеннері паза чиит специалисттерні ӱгредерінде ӧткін араласханнары ӱчӱн Хакасияның прокуратура органнарының ветераннарына улуғ алғызым читірчем. Пик хазых паза чахсы чуртас сірерге!
Хакасия прокуратуразының прай тоғынҷыларына пик хазых алғапчам, туған-чағыннарың сірерге хабассыннар, Ада чир-суубыс паза Закон ӱчӱн турызар ах сағыстығ тоғыста наа чидіглерге чит турыңар!
Автор :
Д.Г. Попов, хакас республиканың прокуроры.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде