СОЧИДЕҢ СЫЙЫХТЫҒ АЙЛАНДЫЛАР
04.04.2017
Хабарлар
Сочиде 21 - 25 мартта «Кӱн городы» тиксі Россия искусстволарының IV марығ-фестивальы ирт парды. Пу фестивальда пастағызын на Хакасиядаң С.П.Кадышевтің адынаң «Час Ханат» эстрада студиязының олғаннары араластылар. Устағҷызы Хакасия искусствозының саблығ деятельі Игорь Боргояков полча, вокал ӱгретчізі - Хакасия культуразының саблығ тоғынҷызы Светлана Аткнина. Олғаннар марығның алты номинациязында 10 пӧзік сыйыхха турысханнар. Хакасиядаң 20 олған анда араласхан.
Хайдағ даа чорых соонаң, уламох тӧреен чиріңзер чиңіснең айланзаң, ундулбас сағыстар халадыр. Сочизер чӧрген делегациянаң устаан Светлана Михайловна Аткнина.
- Пістің «Час Ханат» олғаннарның эстрада студиязы чыл сай аймах марығларда аралазарға кӱстенче. Амды ӱгредіг чылы тоозыл таа парир, аннаңар часхы каникуллар тузында тиксі Россия синінде иртірілчеткен «Кӱн городы» фестиваль-марыға пар килерге чаратхабыс, - чоохтапча Светлана Аткнина. - Пу марығ пӱӱл Сочинің Адлер чардығында ирткен, ол Олимпийскай парктаң ырах нимес орныхча. Пу фестиваль пӱӱл тӧртінҷізін иртті. Алында Москвада, Казаньда паза Санкт-Петербургта полған.
Фестивальның пӧгіні - олғаннарның паза чииттернің чайаачызын тилідері, араласчатханнарның устарын кӧдірері, Россияның культура учреждениелері аразында палғалысты тыыдары. Россияның 20 регионынаң 150 ӧме килтір, тиксі 1500 кізі араласхан. Сценада олған-узах паза чииттер устарын кӧзіткеннер.
Жюриде Москва, Санкт-Петербург паза пасха улуғ городтардаң культура паза искусство деятельлері, композиторлар, искусствоведение докторлары одырғаннар.
- Фестиваль кӱннері пір тыныснаң ирт парған осхас, - чоохтаан С.М.Аткнина. - Піске ол кӧп чӱрексініс паза ӧрініс сыйлаан. Фестивальның пастағы кӱнінде 6 - 9 частығ ырҷылар устарынаң сынасханнар. «Эстрада вокалы» номинацияда Даша Шалгинова, Туяна Дандарова араласханнар. Даша, «Саксофон» паза «Айсили» кӧглерні толдырып, III степень лауреады полыбысхан. Туяна, «Кӧклӧ» паза «Африка» сарыннар ырлап, II степеньніг диплом алған. Мындағох сыйыхха Алина Канзычакова, Даша Топоева турысханнар.
«Чон вокалы» номинацияда Аня Тохтобина I степеньніг диплом алған. Таныхтирға кирек, пу ырларның кӧбізінің авторы паза композиторы Игорь Боргояков полча. «Кӱн городы» фестиваль-марығны Россиядағы «Жар-Птица» фестивальлар кіні иртірче. Марығ искусство школаларының паза училищелерінің ӱгренҷілері аразында иртче. С.П.Кадышевтің адынаң культура кінінде «Час Ханат» студияның олғаннарын сарнирға паза теелбектенерге ӱгретчелер. Сочизер чӧрген палаларнаң Светлана Михайловна ікі-ӱс чыл тоғынған. Че олар мындағ фестиваль-марығларда аралазар синге чит парғаннар тіп санапча.
«Час Ханат» студияның теелбектер ӧмезі ікінҷі кӱнінде «Хореография» номинацияда марыға сыххан. Палаҷахтарны теелбек саларға балетмейстер Алёна Тимофеева кӧніктірче. «Пингвиннер», «Торғайахтар» теелбектер ӱчӱн I паза II степень лауреаттары атха турысханнар. Кічіглернің мода театры кӧзідиинең хайхатхан, олар II степеньніг лауреат полыбысханнар.
Жюри Хакасия олғаннарының чайаачызын пӧзік паалаан, «Жар-Птица» кӱмӱс дипломнаң сыйыхтаан. Пу алынҷа пирілчеткен сыйых полча, теестегі «Кӱн городы» фестивальда тикке аралазар оңдай пирче. Пістіңнерге «Чон кибірлерін хайраллапчатхан ӱчӱн» паза студия устағҷызы Игорь Боргояковха, вокал ӱгретчізі Светлана Аткнинаға, балетмейстер Алёна Тимофееваа алғыстас пічіктері читірілген.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы