ХОРМАЧЫЛАР ЧЫЫЛЫСХАННАР
07.04.2017
Хабарлар
Хосхар айының пастағы кӱнінде Асхыс аймааның М.Е.Кильчичаковтың адынаң ӧӧн библиотеказында хығырығҷылар залында хормачылар чыылысхан. «Тӧреен тілім хуҷаанда» адалча пу клуб. Олар он чыл пiди чыылысчалар. Оларны чыыпча библиотека тоғынҷызы Вера Агафоновна Боргоякова.
Пӱӱл тоғазығны апарған Наталья Топоева. Ол тоғазығ пасталарынаң прайзына кічіг кибеліс пазыбызарға чахығ пирібіскен. Пастар, кибеліс сағынып, иртіре сыстап, ізіп парбазын тіп,
Юлия Шроо сарыннарын сарнап пирген. Я, чахсы сарын иссең, кибеліс тее оой пазылча. Илееде иптіг кічіг кибелістер сағынып алтырбыс.
Ол арада Наталья піске пір дее тынанарға пирбинче: полғаныбысха ла пірее хынығ ниме чоохтап пирерге чахыпча. Чоохтап полбинчатсаң, азахнаң тоғын, теелбек салыбыс. Герман Тинников, пістің арабыста полып, теелбекті оортах чылдырып одырча. Ол, Илья Топоевтің чоохтарын чоохтап, пісті ээреткен.
Паза анҷада залзар Галина Боргоякова кіре салды, уғзал парған пиджактығ, андағох сілепеліг. Ол пастых полчаттыр. Юрий Топоев андағ пастыхтардаңар хормачыланып чоохтаҷаң полған. Галина чон аразына парчам, хайди тудыним тіп сурапча. Піс сах андох чӧптер пирчебіс. Пістің алныбысча кӧмес аар-пеер пас чӧріп, чӧпсінче, орта чӧптер тидір.
Чоохтар, теелбектер ӱр ирткеннер. Тоғазығ тынағ кӱніне килістіре полған.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы