УЛУҒ КӦЛНӀҢ УЛУҒ ОБАЛ-ХЫЙАЛЫ
11.04.2017
Хабарлар
Часхыда хар хайылған соонаң хах-сӧптер чирде кӧрінібісті. Кӱскӱде чыы тартылбаанда, амды, часхы пасталыбысханда, оларны чыңнахтап саларға кирек. Прай чон, часхы ӱлӱкӱннеріне тимненіп, иблерінің хырин сыбырып, сиденнерін чарых сырларнаң сырлирға тимненче. Чыылған сӧп-сапты кӱрендіктерзер, апарып, тӧкчелер. Анзын кӧрзең чӱрекке ӧріністіг. Анаң иблердең сала хыйа арах кӧрзең, чочып таа парарға ӱр нимес. Ибіркі чалбах чазыларда хайдағ ла ниме чайылбинча. Хайзы сӧп-сап чилнең килібіскен, че кӧбізін кізілер тӧк салғаннар.
Пістің Сыра аймаандағы аалларның хыриндағы кӧллерні кӧрзең, чӱрекке ачығ пілдірче. Улуғ чил ол чағынғы кӱрендіктердең целлофан пакеттерін, чаҷыннарны, картоннарны паза даа пасха хах-сӧптерні ағылча. Анзын хайди идерзің зе? Че кізілер кӧллернің арығ сууна нинҷе пар сӧпті ӧнетін тӧкселер, анзы ачырғастығ.
Пу ирткен позырахта Улуғ кӧл паза Борец ааллар хыринҷа иртерге киліскен. Оларның хыриндағы Улуғ кӧлнің пузынзар кем-де мал тизегін ікі хысхы изере тӧкче. Пылтыр тизекті тракторның ікі хаңаазынҷа андар тӧккеннер, пӱӱл анҷох чай салтырлар. Улуғ кӧл аалда тоғасхан ир кізілердең сурғам: «Кем кӧлзер тизекті тӧкче?» Олар нандырғаннар: «Ол тизекті пір дее кізі тӧкпеен. Пуста хысхы-да кем-де маллар суғарарға ӧнетін тилті ой салған. Ол - ікі аалның суға килген малының тизегі». Чайғызына тӱссе, ол тизек суғ алтына кір парар. Анаң палаҷахтар алай килген кізілер ол суғда сомарлар. Кӧлнің пасха саринда кізілер палыхтапчалар. Анаң ол палыхты сатчалар. Пілген кізі аны ахсына даа аларға чіксінер.
Хайди искіргеннер пу кӱннерде телевидение хабарларында, Тағлығ Алтайда холера ағырығ сығыс килген. Анзын сурок аңыҷахтар таратчалар. Пістің чирібісте суроктар чох таа полза, че кізілер постары чабал ағырығларға сығар оңдай тӧстепчелер. Алында пу кӧлдегі пуста тизек чатпаҷаң. Мал пасха чирде суғ ісчең. Ам кем сағынып алған малны кӧлде суғарарға? Анзын пір дее кізі пілбинче. Хости Сон сууҷах ахча. Мының алнында прай мал суғны аннаң ісчең паза ээлері оларны ибде суғарҷаңнар. Кӧл хыринда мағаа тоғасхан ікі ирен пу хомай киректі пасха чирдең килген кізее састырған. Ол прайзынаң кӧп мал тутча тееннер. Ибіре паза сурар кізі тоғаспаанда, піс ол чирдең чӧрібіскебіс.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы