СӦБІРЕ - ЧУРТАС ӦЗЕНІ
14.04.2017
Хабарлар
Пос тілінең сыхчатхан газетаны мин 50 чыл азыра хығырчам. «Ленин чолын» іҷе-пабам алҷаңнар. Алыптығ нымахтар сыхса, прай сӧбіренең хығырҷаңмыс.
Мин кічігде ибде телевизор чох полған. Пастағы кічиҷек «Рекорд» телевизорны 1968 чылда ла алғабыс. Аннаңар почта килерін чидікпин сахтаҷаңмыс. Наа газета-журналлардағы чапсых хабарларны пілерге кирек нооза.
Сӧбіре тӧстеп, іҷе-пабадаң алынҷа чурт салынғаныбыста, «Ленин чолы» чиит сӧбіреде «чуртап» сыххан. Хакас газетазынаң ӱгретчі тоғызымда удаа тузаланҷаңмын. Уроктардаң пасха, халых-чарыдығлығ тоғысты ӧткін апарҷаңмын. Политика хабарларын ӱгретчілерге паза ӱгренҷілерге читір турғабыс.
«Ленин чолында» Хакасия аалларынаңар кӧп хынығ хабарлар сыхчаң, саблығ чабаннардаңар,
олаңай тоғысчылардаңар, кӧп таныстардаңар...
Газетаа пазынар тус читсе, аалзар хабарҷылар кил парҷаңнар, олар чонны газетаа пазынарға чӧптеҷеңнер. Мин дее, пу киректең хыйа турбин, ӱгренҷілернің іҷе-пабаларынзар газетаа пазынарға айланҷаңмын.
1970 - 1980 чылларда «Ленин чолы», анаң «Хакас чирі» газетанаң пик палғалыс тутхам. Ағбанда ӱгретчілер институдында ӱгренчеткенімде (1968 - 1973 ч.ч.), удаа редакциязар кірҷеңмін.
Ол туста ӱндезіг оңдайынаң пасхан хабарым минің чуртазыма теелген. Хабарда іҷелер палаларының, сӧбіре чуртазына кірізіп, хоныхтарын сайбап салчатханнаңар чоох парған. Чуртазымда мындағ нимее урунғам, че уйадыстығ даа полза, газетаа пасхам. Туғаннар аразындағы хырыс-табысты тохтадарға кирек ле.
Минің іҷем паза хазинем пір туста пісте ааллазалар, чоохтаспаҷаңнар, стол кистінзер хада одырбаҷаңнар, пархаларын чарҷаңнар. Хайдағ андағ хара хоосха оларға чол кизібіскен, піске, чииттерге, пілдізі чох полған.
Пу киректеңер газетаа пасхамох. Іҷем дее, хазинем дее пос газетазын алҷаңнар. Анаң, оларны хығырып, киректі ілезіне сығарғабыс. Соонаң олар тоғаспиныбысханнар. Ол тустаң сығара сӧбіреде амыр чуртас пар сыххан.
Апсаамнаң хада 42-ҷі чылы чуртапчабыс. Пістің тӧрт пала, он парха. Улуғларыбыс сын чирзер парыбысханнар. Алғыс газетаа паза улуғларыбысха, олар, кӧңнілерін пазынып, пістің хониибысты сайбабааннары ӱчӱн...
Автор :
Светлана САРАЖАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы