ПРАЙ ЧУРТАС - ТЕЕЛБЕК
14.04.2017
Хабарлар
Пу неделяда В.Г.Чаптыковтың адынаң Хакас филармониязында «Кӱн сузы» ансамбльның солизі, «Мисс Абахай» марығның директоры Тимур Тюкпеев чайаачы иирін иртірген. Ойынны таланттығ чир-суғҷыбыс «Прай чуртас - теелбек» адап салған.
Тимур Тюкпеев сынап таа прай чуртазын теелбекнең айғасча. Пастап 5 частығ Тимур олған садындағы теелбек ӧмезінзер чӧрген, анаң ол «Час Ханат» студияда узын тиліткен. Школаны тоозыбызып, чиит кізі, ікінҷілебин, Ағбандағы музыка колледжінзер хореограф специальнозына ӱгренерге кірібісче. Колледж соонаң ол армияа хабылған. Службаны маңнаныстығ иртібіскен чиит оолны «Ӱлгер» ансамбльның теелбек ӧмезінзер тоғынарға хығырғаннар. Ол кирек 2007 чылда полған. Олох туста филармонияда «Кӱн сузы» ансамбль тӧстелче. Тимур Тюкпеев саблығ чайаачы ӧменің пастағы араласчыларының санына кірче. 10 чыл аразына чайаачы усха ансамбльнаң хада хайдағ ла фестиваль-марығларда, пайрамнарда аралазарға киліспеен. Хакас теелбекчілернің узына Россия регионнарының на нимес, Европа хазналарының чуртағҷылары даа аптаттырғаннар.
Ідӧк Тимур «Мисс Абахай» марығнаң устирға маңнанча. Пу мероприятие Хакасияда 2012 чылдаң сығара иртірілче. Мында сілиинең, хыйғаларынаң паза устарынаң иң абахай хакас хыстар сынасчалар. Тимур марығның араласчыларын сценада сіліг пас чӧрерге ӱгретче, оларға номерлер тимнирге полысча. Ағаа хоза, теелбекчі оол хакас ансамбльларына пайрамнар иртірерге полысча.
Тимур Тюкпеевтің чайаачы ииріне кӧп кізі килген. Концертті Хакасияның чон артизі Людмила Арыштаева иптіг апарған. Иирні «Мисс Абахай-2017» марығның араласчылары асханнар. Сылағай, пӧзік сыннығ, ӧкерек хыстар дефиле кӧзіткеннер. Абахай чир-суғҷыларыбыс кӧрігҷілерні аптааннар. Пӱӱл марығ 23 апрельде иртер, амды ағаа тимненіс хыызында парча.
Анаң сценаа Тимурның іҷезі Наталья Бурнакова сыххан, ол, чатхан саап, саблығ чир-суғҷызы Евдокия Тыгдымаеваның тахпағын толдыр пирген. Чоохтирға кирек, Тимур чайаачы кӧңніліг сӧбіреде ӧскен. Аҷазы Игорь кӧп чыл «Кӱн чахайағы» ансамбльда солист полған, Сабир туңмазы Тимурнаң хада «Кӱн сузы» ӧмеде теелбектенген. Амды ол армияда, службаны В.А.Александровтың адынаң сарыннар паза теелбектер ансамбльында иртче. Іҷезі Наталья Семёновна «Абаканвагонмаш» заводта контролер полып істенче, пос туста «Чон кӧглері» ансамбльда сарнапча. 2014 чылда Тимур пу саблығ ӧмее 25 чылын таныхтирға полыстыр.
Амды ансамбльның артисттері, чиит кізее алғызын читіріп, хакас ырларын сарнап пиргеннер. Оларның узына морсынып, кӧрігҷілер матап айа сапханнар. Ідӧк залдағы чонны чайаачызынаң Людмила Арыштаева ӧріндірген. Ачых-чарых кӧңніліг артист эстрада сарыннарын толдырған.
«Ӱлгер» фольклор ӧмезі «Кӱн сузы» ансамбльнаң хада-пірге тоғынча. Олар хада тимнеен концерт программалары хайхатча. Артисттер, Тимурның чайаачы ииріне киліп, «Табан», «Сӱрлеске» паза аннаң пасха даа чон ырларын сарнааннар.
Кӧрігҷілер Тимурның теелбек саларын чидікпин сахтааннар. Че сценазар аның орнына «Кӱн сузы» ансамбльның олған студиязының араласчылары сыхханнар. Чоохтирға кирек, олған студиязы ирткен неделяда ла тоғынып пастаан. Кічіг артисттер уғаа ачыныстығ кӧрінгеннер. Пӱӱн оларның кӧп ниме киліспинче, че таңда піс кічіг частығ чайаачыларға поғдархирбыс.
«Прай чуртас - теелбек» концерттің халғанҷызынзар сценазар Тимур Тюкпеев сыххан. Ол арғыстарынаң хада «Хойбал ыры», «Хал оол ыры», «Хубах оол» паза «Сыбыр чир ӱстӱ» теелбектерні толдырған. «Хал оол ыры» номерде Тимур чиит хыстарға сырбалчатхан оолны чахсы кӧзіт пирген. Че хакас хыстар постың ӱчӱн турызарға пілчелер. Сырбалҷых матырға тарыныбызып, олар аны арғамҷынаң палғабысчалар. Саңай пасха оманы Тимур «Сыбыр чир ӱстӱ» номерде чайапча. Аның матыры тӧреен чирін ыырҷылардаң арачылапча. Пу теелбектерні чайирында Тимур ӧткін араласхан.
Хада тоғынчатхан арғыстары Тимурның узын пӧзік паалапчалар, улуғ артисттер чиит кізінең хада мыннаң мындар тоғынарға пӧгінчелер. Хакасияның чон артизі Людмила Арыштаева чоохтапча: «Тимурға мин най хынчам. Ол ачых-чарых, азых чӱректіг кізі. Мағаа аннаң хада тоғынарға киліспеен, че, мин санапчам, прай тоғыс алнында. Тимур тоғынза, кӱстензе, аның прай ниме килізер. Пӱӱл хысхызын ол Кемеровтағы культура институдын тоосча. Ізенчем, аның сағынған сағыстары толар, ол кӧрігҷілерні чайаачызынаң тӧреміл ӧріндірер». Сцена узының сӧстеріне Хакасияның культура министерствозының амғы искусство пӧлиинің пастығы Валентина Ивановна Лебедева хозылған: «Тимур - таланттығ чиит оол. Чайаачы иирі пӧзік синде ирткеніне ӧрінчебіс. Мындағ ӧткін чииттер піске кирек».
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы