ӦӦНІ - ХОРҒЫС АҒЫЛБИНЧАТХАН ТЕХНОЛОГИЯЛАРНЫ ЧУРТАСХА КИРЕРІ
18.04.2017
Хабарлар
АҒБАНДА НАА МУЗЕЙ-КУЛЬТУРА КІНІНДЕ 13-15 АПРЕЛЬДЕ «ХАКСТРОЙЭКСПО-2017» КӦЗІДІГ ОНЫНҶЫ ХАТИ ИРТІРІЛГЕН. КӦЗІДІГНІ АСХАННАР: ХАКАСИЯНЫҢ ПӰДІРІГ ПАЗА ЧУРТ-КОММУНАЛЬНАЙ ХОНЫХ МИНИСТРІ СЕРГЕЙ МОЖАРОВ, ӦӦРКІ ЧӦПТІҢ ЭКОНОМИКА ПОЛИТИКАЗЫНЫҢ, ПРОМЫШЛЕННОСТЬ, ПӰДІРІГ ПАЗА ТРАНСПОРТ КОМИТЕДІНІҢ КНЕЗІ ВАЛЕРИЙ МЕШАНКОВ ПАЗА РЕСПУБЛИКАДАҒЫ ИДІНҶЕКТЕРГЕ ХАБАСЧАТХАН КІННІҢ ПАСТЫҒЫ ДАНИЛ СЕЛИВАНЕНКО.
ПІСТІҢ ХАЗНАДА 2017 ЧЫЛ ЭКОЛОГИЯ ЧЫЛЫ ТІП ЧАРЛАЛҒАН, АННАҢАР «ХАКСТРОЙЭКСПО-2017» КӦЗІДІГНІҢ ӦӦН ПӦГІНІ - ИБІРКІЗІНЕ ХОРҒЫС АҒЫЛБИНЧАТХАН, ӰЗӰРЛЕП ТУЗАЛАНАР, ИСТІГ НИМЕ-НООЛАРНЫ КӦЗІДІГЕ СЫҒАРАРЫ.
- Чыл сай иртірілчеткен «ХакСтрой-ЭКСПО» кӧзідіг чахсы кибірге кір парғаны ӧріндірче. Ол пістің республиканы пос чирінде сығарылчатхан аймах ниме-нооларнаң сабландырча. Пу кӧзідігде араласчатхан предприятиелернің саны чылдаң чылға ӧсче. Пӱӱн мында хонҷых регионнарның предприятиелері араласчалар. Ол санда Тува Республика паза Хызылчар крайы. Кӧзідіг кічіг паза ортын бизнестің тилізіне улуғ туза ағылар тіп сағынчам, - теен Валерий Мешанков.
Хакасияның пӱдіріг паза чурт-коммунальнай хоных министрі Сергей Можаров предприятиелерні кӧзідігде араласчатхан ӱчӱн алғыстаан паза оларға тӱзімніг тоғыс алғаан.
Данил Селиваненко «ХакСтрой-ЭКСПО» кӧзідігнің тузазынаңар искірген паза предприятиелернің устағҷыларын анда иртірілчеткен презентацияларда, «тегілек столларда» аралазарға хығырған.
- Пу кӧзідіг - кічіг паза ортын бизнеске хабасчатхан оңдайларның пірсі. Пістің «тегілек стол» иртер, хайзында бизнеске хабасчаң наа оңдайлардаңар искірербіс. Хай пірее предприятиелер, пу кӧзідіге чахсы тимненіп, анда чыл сай ӧткін араласчалар. Пу ла кӧзідігде пӱдірігде тузаланылчатхан наа материаллардаңар, техникадаңар паза оборудованиедеңер піліп аларға чарир, - таныхтаан Данил Селиваненко.
Ағбандағы идінҷек Игорь Тутатчиков «ХакСтрой-ЭКСПО» кӧзідігде сыбыра араласча. Аның «Истіг тура сірерге» предприятиезі чуртсар инженернай коммуникацияларны тартарынҷа полызығлар пирче паза ол коммуникацияларны идерінде киректелчеткен ниме-нооларны сатча. Полызығларның пірсі - турада чылығ пирҷең системаны турғызары.
- Пӱӱнгі кӱнде чуртты чылығлир аймах оңдайлар пар: радиаторнаң, чарытхынаң паза полны суғнаң чылығлиры. Пу оңдайлар полызиинаң хорадығларның 24 %-ін ӱзӱрлеп аларға чарир. Чылығ пирҷең системаны чахсы, кізі хазиина хорғыс ағылбинчатхан материаллардаң итчебіс, - таныхтаан Игорь Тутатчиков.
Хай пірее предприятиелер пу кӧзідігде пастағызын на араласты. Оларның санында гипс панельін сығарчатхан «Modern Room» предприятие, хайзы пӱӱл январьда ла тоғынып пастаан.
- Пістің предприятие 3D гипс панельін сығарча. Ол уғаа пик гипстең тимнелче, аннаңар кӧп чылларға кӧріл парған. Панельні кӧңніне кірчеткен ӧңніг сырнаң на сырлабызарға чарир. Мындағ панель сығарар ӱчӱн, аарлығ оборудование алғабыс. Пістің регионда пу иң чахсы качестволығ гипстең иділген панель полча. Предприятие ӱр ниместе ле азылған даа полза, кізілердең кӧп чахығ кірче. Кӧзідігде дее кӧп кізі піссер айланча, - теен «Modern Room» предприятиенің устағҷызы Александр Лапшин.
Пӱдіріг материалларынаң пасха, кӧзідіге ідӧк ағас хорбыҷахтары, рассадалар, мебель, сувенирлер сығарылғаннар.
- «ХакСтрой-ЭКСПО» кӧзідігде хаҷан даа полбаам. Наа музей комплексінең ырах нимес чуртапчам. Хайдағ мероприятие иртірілчеткенін піліп аларға тіп кірдім. Мында дачамзар хорбыҷахтар садызып алдым. Амғы тустағы пӱдіріг материалларынаңар кӧп тузалығ ниме піліп алдым, - теен Ағбан чуртағҷызы Надежда Чебодаева.
Пӱӱл кӧзідігде 60 азыра предприятие араласты. Анда ідӧк амғы тустағы пӱдіріг материалларының презентациялары, идінҷектерге пос киреен тилідерінҷе паза хазна хабазиин аларынҷа «тегілек столлар» ирткеннер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде