ФЕРМАЛАР ТОҒЫЗЫН ЧАРЫТХЫ ЧАХСЫЛАНДЫРАР
19.04.2017
Хабарлар
ПӰӰЛ «СИБИРЬНІҢ МРСК-зы»-«ХАКАСЭНЕРГО» ПАО-НЫҢ ИНВЕСТИЦИЯ ПРОГРАММАЗЫНДА КРЕСЕН-ФЕРМЕР ХОНЫХТАРЫНЗАР ЛЬГОТАЛЫҒ ПААНАҢ ЧАРЫТХЫ ТАРТАРЫНҶА ТОҒЫСТАР КӦРІЛ ПАРҒАН. ЭНЕРГЕТИКА ПРЕДПРИЯТИЕЗІНЗЕР ТИКСІ 70 АЗЫРА ФЕРМЕР ТУРЛАҒЗАР ЧАРЫТХЫ ТАРТЫРАРЫНҶА АЙЛАНҒАН. ИРТКЕН ЧЫЛДА 10 ХОНЫХСАР ЛА ЧАРЫТХЫ ТАРТЫЛҒАН ПОЛЗА, ПӰӰЛ ЭНЕРГЕТИКТЕР ПРАЙ АЙЛАНЫСТАРҶА ТОҒЫНЫБЫЗАРҒА ПӦГІНЧЕЛЕР.
ЧЕ АЙЛАНЫСТАР КӦПТЕҢЕР, РЕСПУБЛИКА ПРАВИТЕЛЬСТВОЗЫНДА ПАСТАП ЧАРЫТХЫНЫ ТЫҢ КИРЕКТЕПЧЕТКЕН, ЧИРІҢДЕ ТУРА-ХАЗААЛАР ТУРҒЫЗЫЛҒАН ФЕРМА ХОНЫХТАРЫНЗАР ТАРТАРҒА ЧАРАДЫЛҒАН. АҒБАН ПИЛТІРІ АЙМААНДАҒЫ ӰС ФЕРМЕР, ТІЗЕҢ, ЧАРЫТХЫ СУРИИН ТАБЫРАХ ПӦГІБІЗЕР ӰЧӰН, ТУРЛАҒЛАРЫН ПІР ОРЫНДА ТУРҒЫСХАННАР ПАЗА АЙЛАНЫСТАРЫН ПІРІКТІРІБІСКЕННЕР. МЫНДАҒ ЧАРАДЫҒ ФЕРМЕРЛЕРГЕ СЫНЫНДА ЧАРЫТХЫ СУРИИН ЧАПЧАҢ ПӦГІБІЗЕРГЕ ЧАХСЫ ПОЛЫСХАН.
Чарытхы тартыл парғанда, фермерлерге пос хониинда чарытхыны таратчаң орынны тимнирге халча. Фермерлернің чооғынаң, олар пу сурығны ікі неделя аразына пӧгібізерлер. Чарытхы парда, аннаң тузаланарға кирек.
Ағбан пилтірі аймаандағы Кӱргенніг аалдаң ырах ниместе пос турлаан пастап Русиннер сӧбірезі турғысхан. Александр Петрович паза Наталья Петровна ікінҷі чылы малнаң айғасчалар. Пӱӱнгі кӱнде хоныхта 97 пас мал саналча, ол санда 39 пас інек саалча. Інектерні саарға чарытхы генераторынаң тузаланчалар. Олох тоғынҷыларға чарытхы пирче. Наталья Петровнаның чооғынаң, генератор уғаа хорадығлығ, аннаңар чарытхы тартылғаны оларны ӧріндірче. Чарытхы ӱчӱн идінҷектерге турғызылған паанаң даа тӧлир ползалар, ол хорадығлар алындағызынаң асхынах тіпчелер фермерлер. Ағаа хоза, чарытхы тартырып алғаны оларға мал санын ӧскірер оңдай пирче.
Русиннернің хонҷыхтары Владимир Щегловнаң Павел Балаганский полчалар. Олар ирткен чылда ла пос хониин тӧстееннер, аннаңар хоныхтары улуғ нимес. Олар ӧӧнінде хой ӧскірчелер, че чарытхы пирілгенде, маллар даа ӧскірерге тимделер. Кӱнӧрте хойларны хадарчалар, хазаада хурағанахтығ ине хойлар ла халчалар. Пір-ікі кӱн алында ах чарыхха сыххан хурағаннар чоо маарасчалар, іҷелері, оларны амырадып, капустанаң нимістенчеткен аразында чалғабыс турчалар. Оларны кӧрерге дее ачыныстығ пілдірче.
Чоохтирға кирек, фермерлернің хайзы даа хониин пос кӱзінең тӧстеен паза аның тилізінең айғасча. Чарытхы пирілгенде, сағыс-пӧгіннерін дее чуртасха кирҷең кӱс хозылды. Фермер киреен пастапчатхан чуртағҷылар Хакасияның аал хонии паза ас-тамах министерствозының грант мариин чарлирын сағыпчалар. Пір орында орнығып, хонҷых фермерлер пасха даа сурығларны хада-пірге пӧкчелер: азых аларын, малларны азырирын, тоғынҷылар суриин. Че чииттерге уламох чахсы хабасча Александр Петрович Русин, мал имҷізі хайдағ хазаалар пӱдірерін, нименең азырирын паза пасха даа сурығларны хайди орта пӧгерінҷе чӧптер пирче.
«Сибирьнің МРСК-зы»-«Хакасэнерго» ПАО-НЫҢ пӧлік директорының орынҷызы Сергей Некурящихтің искіриинең, фермерлернің турлаанзар чарытхыны льготалығ паанаң тартарға полысча федеральнай синде алған чарадығ. Аны хоостыра Кӱргенніг аалдағы фермерлер чарытхы тартырар ӱчӱн энергетика предприятиезіне 550 салковай ла тӧлееннер. Пуох паанаң чарытхыны тартырчалар олаңай чуртағҷылар постарына пӱдірінерге алған чир участоктарынзар. Устағҷының таниинаң, часхызын предприятие чарытхыны тың киректепчеткен хоныхтарға читірер. Чайғызын энергетиктер ӧӧн хайығны чарытхы пирчеткен сетьтерні паза станцияларны тыхтирына паза нааҷылирына айландырарлар. Ферма хоныхтарынзар чарытхы тартары апарыларох, че кӧп нимес, кӱскӱзін, тізең, пу тоғыстар хатап айныдылар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы