«СИБЕР ИЛ» ФОРУМ ХАКАСИЯА НАА ЧОЛ АСЧА
25.04.2017
Хабарлар
ПУ НААДА ӦРІНІСТІГ ХАБАР КИЛГЕН. РОССИЯ ПРАВИТЕЛЬСТВОЗЫНЫҢ ВИЦЕ-ПРЕМЬЕРӀ ОЛЬГА ГОЛОДЕЦ ПАЗА КУЛЬТУРА МИНИСТРІ ВЛАДИМИР МЕДИНСКИЙ 2016 ЧЫЛНЫҢ ИҢ АРТЫХ КУЛЬТУРА ТОҒЫНҶЫЛАРЫНА РОССИЯ ПРАВИТЕЛЬСТВОЗЫНЫҢ СЫЙИИН ЧИТІРГЕННЕР. ПІСТІҢ РЕСПУБЛИКАДАҢ ХАЗНА СЫЙИИНА Л.Р.КЫЗЛАСОВТЫҢ АДЫНАҢ ЧИР-СУҒ ӰГРЕНҶЕҢ МУЗЕЙНІҢ ДИРЕКТОРЫ АНДРЕЙ ГОТЛИБ ПАЗА В.Г.ЧАПТЫКОВТЫҢ АДЫНАҢ ХАКАС ФИЛАРМОНИЯЗЫНЫҢ ДИРЕКТОРЫ ВЯЧЕСЛАВ ИНКИЖЕКОВ ТУРЫСХАННАР.
ААРЛЫҒ СЫЙЫХХА КУЛЬТУРА УЧРЕЖДЕНИЕЛЕРІНІҢ УСТАҒҶЫЛАРЫ «СИБЕР ИЛ» ЧОННАР АРАЗЫНДАҒЫ ФОРУМНЫ ТӦСТЕЕН ПАЗА АНЫҢ ТОҒЫЗЫН СЫНЫХТАҒДА ТУТЧАТХАН ӰЧӰН ТАНЫХТАЛҒАННАР. 20 АПРЕЛЬДЕ РЕСПУБЛИКАНЫҢ МУЗЕЙ-КУЛЬТУРА КІНІНДЕ ИРТКЕН ПРЕСС-КОНФЕ-РЕНЦИЯ ХАКАСИЯНЫҢ ПУ УЛУҒ ЧИДИИНЕ ЧАРЫДЫЛҒАН. ХАБАРҶЫЛАРНЫҢ СУРЫҒЛАРЫНА КУЛЬТУРА МИНИСТРІ СВЕТЛАНА ОКОЛЬНИКОВА, АНДРЕЙ ГОТЛИБ ПАЗА ВЯЧЕСЛАВ ИНКИЖЕКОВ НАНДЫРҒАННАР.
Светлана Анатольевнаның таниинаң, чоннар аразындағы форумны республика иртірбеен полза, піс мындағ пӧзік чидіге читпесчікпіс. Аннаңар иң пурун улуғ алғызын ол Хакасия пазы Виктор Зиминге читірген. 2011 чылда Виктор Михайлович пу форумны иртірер пастағнаң сыххан. Пӱӱл «Сибер Ил» форум читінҷі хати иртер. Тӧстегҷілер форумның темазын чыл сай алыстырчатсалар даа, аның ӧӧн пӧгіні - культура ис-пайын хайраллиры.
С.А.Окольникова чоохтапча: «Сибер Ил» форум Хакасияа пу музей-культура кінін пӱдір пирерге хабасхан. Аны піс пӱӱл 30 июньда азарбыс. Амды чир-суғ ӱгренҷең музейнің тоғынҷылары экспозициялар тимнепчелер. Олох кӱн олған музей кіні тоғынып пастир. Таныхтирға кирек, республика бюджедінең форум иртіреріне ахча пирілбинче. Ахчанаң чыл сай «СУЭК-Хакасия», «Русский уголь», «РусГидро», РУСАЛ компаниялар полысчалар. Оларны алғыстирға сағынчам».
Анаң сӧс алған Андрей Иосифович Готлиб. Ол таныхтаан: «Пу улуғ пайрамны кӧп кізі тимнепче, ӧменең не тоғынып, піс аны пӧзік синде иртірчебіс. Форумда иділген чӧптезіглер піске Россияның иң саблығ музейлерінең палғалыс тударға оңдай пирче. Аның сылтаанда регионның чуртағҷылары Россияның этнография музейі, Кунсткамера, А.А.Бахрушиннің адынаң театр музейі паза аннаң даа пасхазы тимнеен кӧзідіглерні кӧріп алғаннар. Пӱӱл чоннар аразындағы музейлер чӧбінің (ИКОМ) Россиядағы пӧлии президиумының чыылии Хакасияда ікінҷі хати иртер. Ол «Сибер Ил» форумны пӧзік паалапчатханы полча».
Хынығ полған Хакас филармониязының директоры Вячеслав Инкижековты истіп аларға. Ол Хосе Каррерасты сағысха кирген. Вячеслав Геннадьевичтің таниинаң, саблығ опера ырҷызы Россияда нинҷе-де ле городта концерт пирген. Испан тенорны Москвада, Санкт-Петербургта, Хазанда паза Ағбанда ла искеннер. Ідӧк Хакасияда Пастағы май площадьында Дмитрий Хворостовский, Паата Бурчуладзе, Татьяна Павловская, Василий Герелло сарнааннар. Саблығ артисттернең тӧреміл тоғынып, симфоническай оркестр музыканттарының узы чылдаң чылға ӧсче. Кӧрігҷілер дее операны истерге кӧнік парғаннар. Вячеслав Инкижеков чоохтаан: «Алты чыл аразына Хакасияның музыка искусствозы харах кӧріндіре ӧс парған. Амды пістің музыканттар хайдағ даа дирижернаң алай сцена узынаң тоғынарға тимделер. Піске «Сибер Ил» форум наа чол асхан».
Пресс-конференцияның халғанҷызында культура министрі Светлана Окольникова алынҷа хабарҷыларның тоғызын таныхтаан. Аның чооғынаң, Хакасияның журналисттері «Сибер Ил» форумны тузында паза пӧзік синде чарытчалар. Пӱӱл чоннар аразындағы форум 29 июньнаң 2 июльға теере иртер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы