ТЕННИСЧЕ УСТАРЫН ТӦРТ КӰН СЫНААННАР
25.04.2017
Хабарлар
Ирткен неделяда Ағбанда спорт ӧргезінде стол теннизінҷе регионнар аразындағы Х турнир ирткен. ол Ағбан городтың аарластығ кізізі, Россияның саблығ тренері Юрий Лебедевке чарыдылча.
Марыға Хызылчар, Новосибирск, Братск, Харатас, Минсуғ, Ағбан городтардаң спортсменнер килгеннер. Ідӧк турнирде СССР-да полған хай пірее республикаларның паза Крым Республиканың теннисисттері араласханнар. Прай 244 кізі килген. Олар алты группаа чарылып марығласханнар.
Марығ пайрамни азылғанда, спортсменнер Россияның саблығ тренері Юрий Лебедевті удурлааннар. Теннисисттерні хакасияның піріктірілген командаларын тимнепчеткен кіннің директор орынҷызы Николай Свириденко алғыстаан.
- Аарлығ Юрий Дмитриевич, - айланған ол, - пӱӱн сірерге чарыдылған турнир онынҷыі хати иртче. Мында чиит араласчыларны кӧрерге уғаа ӧріністіг. Че сірернің ӱгренҷілеріңні мында кӧрерге иң чапсых полча. Сірер пу спорт кӧрімі тилізіне Ағбанда улуғ хозым иткезер.
Стол теннизінҷе турнирні Ағбан городтың культура, чииттер паза спорт комитедінің пастығы Евгений Осадчук асхан. Ол чиит спортсменнерге спортнаң кӧп тус айғазарға паза тӧрт кӱн тузалығ иртсін тіп алғаан.
Турнирде чиит спортсменнер паза ветераннар араласханнар, ідӧк Юрий Дмитриевич ӱгренҷілері килгеннер. Оларның санында тилекей паза Европа чемпионаттарының араласчызы, ветераннар аразында Россия паза Украина чемпионаттарын утхан Юрий Банников, Кыргызстан чемпионы паза Россия чемпионадында кӱмӱс медальны утхан Нурдин Сапарбаев, Россия чемпионадында хола медальны утхан СССР-ның спорт узы Александр Головченко полғаннар.
Естественнай наукалар паза математика институдының физическай культура паза спорт кафедразының доценті, спорт узы Ольга Павлюченконың чооғынаң, Юрий Лебедев кӧп спортсменнің тилізіне улуғ хозым иткен. Пу турнирде спорт ветераннары, чыылызып, ирткен тусты сағысха кирчелер. Аның ӱгренҷілері чиит тӧлні ідӧк стол теннизіне кӧніктірчелер. Анзы Юрий Лебедевтің тоғызы узарадылчатханын кӧзітче.
17 частығ Жанна Бутакова амғы туста спорт узына кандидат полча. Ол тренер М.А.Павликованың холында ӱгренче.
- Пу уғаа нандырығлығ турнир полча, - чоохтапча Жанна. - Мында пӧзік устығ спортсменнер араласчалар. Улуғлар даа, кічіглер дее пеер чиңіс тударға килчелер, полғанының на чиңіс тударға оңдай пар.
Тӧрт кӱн ирткен турнирде І5 частығ паза аннаң кічіг хыстар аразында Вероника Колмакова чиңіс тутхан. 15 частығ паза аннаң кічіг ооллар аразында В.И.Чарковтың адынаң спорт школазының ӱгренҷізі Денис Тебеньков 1 орынға сыххан. Пуох школаның ӱгренҷізі Анастасия Хакимулина 16 частығ паза аннаң улуғ хыстар аразында алтын медальны холға кирген. Андағох частығ ооллар аразында чиңіс тутхан Ихтиер Мухаммаджонов (Хызылчар).
Ипчілер аразында чиңіс тутхан Елена Касяник (Братск). 40 - 49 частығ иреннер аразында Камчатка крайынаң килген Нурдин Сапарбаев пастағы орынға сыххан. Юрий Банников (Крым) 50 - 59 частығ иреннер аразында чиңіс тутхан. Минсуғдағы спортсмен Виктор Хохлов 60 частығ паза аннаң улуғ спортсменнер аразында чиңісчі полыбысхан.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде