ИЗЕН ПОЛЗЫН ПАСТАҒЫ МАЙ!
03.05.2017
Хабарлар
Пу сӧстер сағысха кір килче Часхы паза Ӏстеніс ӱлӱкӱнінде. Совет тузында алғым таныхтал турған ӱлӱкӱн халғанҷы чылларда наа тыныс ал сыхханы пілдірче. Пастағы май демонстрациязында араласчатханнарның саны чылдаң чылға ӧсче.
Пӱӱл Хакасияның ӧӧн городында часхыдағы ӱлӱкӱнні таныхтирға тӧрт муң артиинаң кізі чыылыс парған. Ағбандағы пайрамнығ чӧріс кибірли «Ынархас» аалҷы туразынаң сығара пасталған, андартын флагтар, транспаранттар, шарлар паза чахайахтар тудын салған кізілердең пӱтчеткен улуғ колонна Щетинкин орамазынҷа Пастағы май площадьынзар тибіреен. Пастағы майға чарыдылған демонстрацияда республиканың профсоюз пірігістерінің, политика партияларының, халых пірігістерінің паза чииттер чӧрімнерінің кізілері араласханнар. Колоннаның алнында кибір хоостыра «Хакасияның Істеніс сабланызы» медальның кавалерлері парғаннар. Ӱбӱрҷең оркестр кӧглер толдырып парчатхан чонның кӧңнін улам кӧдір турған. Піди кӧгліг тибірепчеткен колоннаны кӧрерге хости тураларның балконнарынзар кӧп кізі сыххлапчатхан. Чол хыринда турып харахсынчатханнар даа илееде полған. Пайрамнығ колонна республиканың правительство туразы алнындағы Пастағы май площадьынзар читкенде, Часхы паза Істеніс ӱлӱкӱніне чарыдылған митинг пасталған. Демонстрация араласчыларын мында Хакасия профсоюзтарының кнезі Любовь Барабанова, Ӧӧркі Чӧптің кізілері, республиканың Істеніс Матырлары паза ветераннары удурлааннар. Улуғ нимес митинг соонаң иң турыстығ чуртағҷыларға «Хакасияның Істеніс сабланызы» медальлар читірілген. Таныхтирға кирек, пу хазна сыйии республикаа улуғ туза ағылғаны, ӱр чыллар тіспен паза профессиональнай узын кӧзідіп істенгені ӱчӱн читірілче. Пӱӱл сыйыхха «Хакасияның Істеніс сабланызы» медальға турысханнарның санында хакас чонына чахсы таныс кізі полған - профессор, филология наукаларының докторы Венедикт Карпов.
Митинг пайрамнығ концертнең тоозылған. Аны В.Г.Чаптыковтың адынаң Хакас филармониязы, тимнеп, турыстығ иртірібіскен. Кізілер пу ӱлӱкӱннең чахсы кӧңніліг тарасхлааннар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде