ХАНДЫРА ОЙЫН КӦЗІТТІЛЕР
12.05.2017
Хабарлар
Пу кӱннерде Асхыстағы культура туразында кӧг-ойынға хынчатхан улусха пайрам полды. Чайаачы олғаннар школазының сан пирістіг концерті ирткен.
Пу концерт чыл сай иртедір. Аннаңар кӧп кӧрігчі килче, одырчаң орыннар чидіспинче. Кемге орын читпеен, ол азахтар майыхханын сизінмин дее халча полар. Концерт уғаа табырах ирт парғанға тӧӧй пілдірче.
Ырлирға ӱгренчеткен алай вокал клазын тоозыбысхан палаларны кӧг инструменттерінең ойнапчатхан ӱгренҷілер алыстырып одырчалар. Паза иссем, теелбекчілер сыхчалар. Пастағы класста ӱгренчеткен олғаннар. Че хайди олар сценада тудынчалар! Кӱннің сай сценада, сарнап, теелбектенчеткенге тӧӧйлер. Айа сабызы ӱзілбинчеткен.
Школа директоры Неля Григорьевна Иптышева таныхтаан:
- Ӱгренҷілер пір чыл аразына ноо ниме ӱгреніп алғаннарын кӧзітчелер. Кӧрігҷілернің айа саапчатханнарын кӧргенде, концерт чахсы синде ирткен тиирге чарир. Чазырҷаң ниме чоғыл, ӱгренҷілернің устарын таптирға кирек. Аннаңар специалисттер алҷаастарыбысты, оой ла истіп, кӧрген поларлар. Халғанҷы чылларда хореография клазы тоғынып пастабысты. Ол классты Лариса Владимировна Тюльберова апарча. Мин аны пістің школада тоғынарға чадап чӧптеп алғам. Амды кӧрчезер, теелбекчілерні хайди удурлапчалар.
Сыннаң даа, палаҷахтар Италия чонының теелбегін хандыра толдырыбысханнар. Халғанҷызында улуғ класстағы хыстар цыган теелбегін толдырғаннар. Теелбекчілер чайылҷах юбкаларының идектерінең пулғир ползалар, ӧӧн цыган хыстарына тӧӧйлер.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде