ХАКАС СЦЕНАЗЫНЫҢ ЧАРЫХ ЧЫЛТЫЗЫ
16.05.2017
Хабарлар
Пӱӱн хада тоғынчатхан арғызыбысха, Хакасияның чон артизі Кирилл Георгиевич Султрековха 55 час толча. Ідӧк артист сценазар сыхханнаң 30 чыл толчатханын таныхтапча. А.М.Топановтың адынаң Хакас драма театрыңда істеніп, ол 80 артиинаң аймах ома чайап салған. Кӧрігҷілерге Кирилл Султрековтың чайаачызы чахсы таныс, аның узын олар пӧзік паалапчалар.
Кирилл Султрековнаң 1990 чылда танызып алғам. Ол чыл мин, Ленинградтағы театр, музыка паза кинематография институдын тоозып, Хакас драма театрынзар тоғынарға кіргем. Андадох тӧреен тілін, хакас чонның кибір-чозахтарын ӧтіре пілчеткені мині чапсытхан. Пастағызын на піс Кирилл Султрековнаң хада «Кӧк пуға» спектакльда ойнаабыс. Матырларыбыс кӧӧленісчеткен оолнаң хыс полғаннар. Хада тоғынчатхан арғызым, хомыс саап, аймах-пасха тахпахтар толдырған. Ол тахпахтарның піреезін пастағызын на истерге киліскен. Іди Кирилл Георгиевичтің хоостыра хакастарның пай фольклорынаң танысхам.
Актер поларға оой нимес. Матырларның хылиин, оңдайын орта кӧзідер ӱчӱн, кӧп уйғу чох хараа иртірерге килісче. Ағаа хоза, артистке хада ойнапчатхан арғыстарынаң пілізерге кирек. Кириллнең хада тоғынарға ниик, ол полған на рольны пӧзік синде толдырча. К.Г.Султреков чайаан омалар критиктернің кӧңніне юрче. Аймах-пасха синде иртчеткен театр фестивальларында ол кӧп хати лауреат атха турысхан.
Артисттің халғанҷы рольларынаңар чоохтаза, кізілернің хайиин «Анна» спектакльдағы кнестің омазы тартхан. Ойынны режиссер Марас Чебодаев драматург Ю.Клавдиевтің пьесазы хоостыра чайап салған. Кирилл Георгиевичтің таниинаң, анда амғы чуртасха теелчеткен сурығлар кӧдірілче. Пылтыр кӱскӱзін артисттер, Хакас драма театрының 85 чылын таныхтап, «Алаахтыртхан Хорхло» кӱлкістіг ойынны хатап турғысханнар. Спектакльда К.Г.Султреков приставтың рольын толдырча. Таныхтирға кирек, пістің чайаачылар пу ойынға хынадырлар. Кириллнең хада Хызылчардағы искусство институдында ӱгренген Хакасияның саблығ артизі Светлана Селигееваның чооғынаң, олар студент тузындох «Алаахтыртхан Хорхло» спектакльның кизегін турғысчаңнар. Кирилл, Тапчының рольын толдырып, хада ӱгренчеткен арғыстарын паза чир-суғҷыларын хатхыртчаң полтыр.
Актер тоғызынаң пасха, таланттығ арғызыбыс тілбестеглернең паза литература тоғызынаң айғасча. Кирилл Георгиевич хакас тіліне В.Шекспирнің «Макбет» трагедиязын, Н.Мошинаның «Рикоту олтырых», Н.Тодыбаеваның «Изелген чурт» паза Г.Уэллстің «Харах оды чохтар хазназы» чайаачы тоғыстарын тілбестеен. Олар прайзы даа сценада турғызылғаннар. Ағаа хоза, ол пьесалар пасча. Хакасияның чон артизі чайаан «Алтын Арығ» - рестлер» пьесаны пӱӱл режиссер Саяна Ултургашева «Читіген» театрда турғысхан. Хакас устарының тоғызын кізілер чылығ удурлааннар. «Алтын Арығ» - рестлер» спектакль кӧрігҷілернің иң хынчатхан ойыны полар тіп ікінҷілес чоғыл. Минің кӧрізімнең, К.Г.Султреков пасхан чайаачы тоғыстарны, кинде тимнеп, чарыхха сығарыбысхан полза, уғаа чахсы поларҷых.
Кирилл позы Таштып аймаанаң полчатханын хаҷан даа ундубинча. Пӱӱн дее, пайрамнығ чазын таныхтап, ол Хакас драма театрының артисттерінең хада Таштыпта «Примадонны» спектакльны кӧзітче. Кӱлкістіг ойын кӧрігҷілернің кӧңнін кӧдірер. Амды артисттің чайаачы тоғызы хыызында парча. Аның наа сағыстар, наа пӧгіннер.
Аарлығ Кирилл Георгиевич! Піс, хада тоғынчатхан арғыстарың, 55 чазыңнаң чылығ алғыстапчабыс, наа чидіглерге чидерге, пик хазых алғапчабыс. Чуртазың узах ползын, чайаачы кӧңнің хаҷан даа сообазын, аарлығ нанҷыбыс!
Автор :
Инна МАЙНАГАШЕВА, Хакасияның саблығ артизі
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы