СОЙАН ТАҒЛАРЫН ТОБЫРҒАН ЧОЛНЫҢ ПӰДІРІГҶІЗІ
17.05.2017
Хабарлар
СОВЕТ СОЮЗЫ ТУЗЫНДА «СОЦИАЛИЗМ ІСТЕНІЗІНІҢ МАТЫРЫ» ААРЛАСТЫҒ AT ХАКАСИЯНЫҢ 80 ЧУРТАҒҶЫЗЫНА ПИРІЛГЕН. ТАНЫХТАТХАННАРНЫҢ КӦБІЗІ - 67 КІЗІ - ААЛ ХОНИИ ТОҒЫНҶЫЗЫ ПОЛҒАН, ПАСХАЗЫ ПӰДІРІГ, ӰГРЕДІГ, ИМНЕГ КИРЕЕНДЕ ТОҒЫНҒАН. АМҒЫ ТУСТА ІСТЕНІС МАТЫРЛАРЫНАҢ ПІР ЛЕ КІЗІ ХАЗЫХ ХАЛҒАН. ОЛ - ЭКСКАВАТОР МАШИНИЗІ ПОЛЫП ТОҒЫНҒАН ГЕННАДИЙ ПАВЛОВИЧ ГАЛУЦКИЙ. 8 МАЙДА АҒАА 80 ЧАС ТОЛҒАН. ПАЙРАМНЫҒ ЧАЗЫНАҢ АНЫ ХАКАСИЯ ПАЗЫНЫҢ ОРЫНҶЫЗЫНЫҢ ТОҒЫЗЫН ТОЛДЫРЧАТХАН ВЛАДИМИР КРАФТ ПАЗА «РОССИЯНЫҢ ІСТЕНІС САБЛАНЫЗЫ» ТИКСІ РОССИЯНЫҢ ХАЛЫХ ПІРІГІЗІНІҢ ХАКАСИЯҶА ПӦЛИИНІҢ КНЕЗІ МИЛЕНТИНА АМЗАРАКОВА АЛҒЫСТААННАР.
- Хакасия пазы Виктор Зиминнің адынаң Сірерні пайрамнығ тӧреен кӱніңернең алғыстапчам, - теен Владимир Александрович. - Сірер амғы тӧлге кӧзідім полчазар. Пик хазыхтығ, часкалығ полыңар. Пала-пархаларың ӧріндір турзыннар, Сірерге паарсах ползыннар.
Ол Геннадий Павловичке Хакасия правительствозының Алғыстас пічиин паза сыйыхтарын читірген. Милентина Фёдоровна, тізең, ағаа республиканың ветераннар чӧбі, социальнай арачыланыс министерствозы тимнеен сыйыхтарны сыйлаан.
Геннадий Галуцкийге «Социализм Істенізінің матыры» ат 1966 чылда Ағбан - Тайшет тимір чолны пӱдірген ӱчӱн пирілген. Ідӧк ол Лениннің орденінең паза «Серп и молот» медальнаң таныхтатхан. Чиит экскаваторщик хазнабыстың пасха даа илбек пӱдіріглерінде араласхан: Сойан-Сус ГЭС, БАМ пӱдіриинде. Ідӧк аның бригадазы Хызылчар крайындағы Краснокаменск руднигінзер чол тӧзеен, Ағбан ибіре дамбаларны кӧдірген. Прай чирде тоғысха кӱс кізі позын чахсы ла саринаң кӧзіткен.
Ағбан - Тайшет магистральның пӱдірии аның чуртазында паза пір нименең танығлығ полған. Мында ол 1959 чылда бетонщица полып тоғынған чиит хыснаң танызып алған. Соонаң олар хоных хон салғаннар. Геннадий Павлович паза Алла Михайловна пӱӱл сӧбірелері тӧстелгеннең 56 чыл ирт парғанын таныхтирлар. Ынағ сӧбіре ӱс пала азахха турғыс салған. Амды оларның пис парха паза ӱс кӧргенек ӧсче.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы