ГАЗЕТА - ПІСКЕ ААРЛЫҒ СЫЙЫХ
19.05.2017
Хабарлар
Алғыстапчабыс чалғыс хакас газетабысты 90 чылынаң. Пічиибістің чазы узах ползын, пазынчатханнарның саны ӧссін!
Піс, Асхыстағы лицей-интернаттың тоғынҷылары, марығда аралазарға чараттыбыс. Ысчабыс сомыбысты: Наталья Султрекова - орыс тілі ӱгретчізі, Нина Чебочакова - хакас тілі ӱгретчізі паза Мария Кичеева - психолог. Ноға ӱзӧлең араласчабыс?
Хакас тілі ӱгретчізі кічігдең сығара хакас газетазын хығырча: пастап іҷе-пабазы алыптығ нымахтарны хығыртчаң, соонаң позы ал сыххан. Іди газетада марығдаңар чарлағ хығырып алған. Наталья Султрекова школадағы музейнең устапча. Мария Кичеева, тізең,школа музейіне пу иргі газетаны сыйлап пирген. Мындағ оңдайнаң піс пу марыға ӱзӧлең сығарға чӧптезіп алғабыс.
Амды газетадаңар. «Хызыл аал» газетаның 1931 чылның силкер айының 16-ҷы кӱніндегі сығарызын Мария Еремеевнаа сыйлап пирген Матрёна Никитична Тинникова (Тютюбеева). Ол хандых айыньің 15-ҷі кӱнінде 1926 чылда Кызлас аалда тӧреен. Ӱгредии 7 класс полған. Чон аразына позының тӧрт палазын паза ӧскірерге алған ікі паланы кир салған. Матрёна Никитична уғаа хыйға сағыстығ кізі полған, чонның тархынын, чуртазын чахсы пілҷең. Аалда халых-чарыдығлығ тоғыс апарҷаң. Чуртазы аның ниик полбаан. Ол кічігдең сығара тоғынған. Хада тӧреен харындазы Илбек Ада чаада Грузия чирінде чат халған. Матрёна Никитична андар пар килерге матап сағынған, че парарға киліспеен, ол 2011 чылда ах чарыхтаң парыбысхан.
Автор :
Мария КИЧЕЕВА, Нина ЧЕБОЧАКОВА, Наталья СУЛТРЕКОВА, Асхыстағы лицей-интернаттың ӱгретчілері
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы