МАЙРЫХТАҒЫ РАЗРЕЗ ІОООООО-ҷы ТОННА ХАРА ТАС АНЫДЫ
23.05.2017
Хабарлар
«РАЗРЕЗ МАЙРЫХСКИЙ» ХАРА ТАС АНЫҶАҢ КОМПАНИЯА 19 МАЙ ТАНЫҒЛЫҒ КӰН ПОЛҒАН. ОЛ КӰН АНДА ПАСТАҒЫ МИЛЛИОН ТОННА ХАРА ТАС АНЫЛҒАН. ХАКАСИЯНЫҢ ПАЗЫ ВИКТОР ЗИМИН ПРЕДПРИЯТИЕНІҢ ТОҒЫНҶЫЛАРЫН АЛҒЫСТИРҒА ӦНЕТІН ЧӦР КИЛГЕН.
- ПУ ТАНЫҒЛЫҒ КИРЕК СІРЕРНІҢ НЕ ПРЕДПРИЯТИЕЕ НИМЕС, ОЛ ТИКСІ РЕСПУБЛИКАА ТАНЫҒЛЫҒ ПОЛЧА, - ТАНЫХТААН ЧООҒЫНДА ХАКАСИЯНЫҢ ПАЗЫ ВИКТОР ЗИМИН. - НОҒА? РЕСПУБЛИКАНЫҢ МАҢНАНЫСТЫҒ ПРАЙ ПРЕДПРИЯТИЕЛЕРІН АДАБАСПЫН, ЧЕ МАЙРЫХТАҒЫ РАЗРЕЗ ИҢ ЧАХСЫЛАРНЫҢ, ИҢ МАҢНАНЫСТЫҒЛАРНЫҢ САНЫНДА. МЫНДАҒ СИДІК ОҢДАЙЛАРДА СІРЕР, РАЗРЕЗТІҢ ТОҒЫНҶЫЛАРЫ, УҒАА КӦП ТОҒЫС ИТ САЛҒАЗАР. ЭКОЛОГИЯҶА ПРАЙ КИРЕКСІНІСТЕРНІ ТОЛДЫРЫБЫЗАРҒА КИРЕК ПОЛҒАН. АНЫ ТОЛДЫРЫП, ХАЗНА ЭКСПЕРТИЗАЗЫН ИРТІРІБІСКЕН СЫЛТААНДА, ПРЕДПРИЯТИЕНІ ХАЙРАЛЛАП ХАЛҒАН ӰЧӰН СІРЕРГЕ УЛУҒ АЛҒЫС! ЧЕ ИҢ ӦӦНІ - ОЛ КӦРІЛГЕН СЫҒАРЫСТЫ ТОЛДЫРЫБЫСХАННАРЫҢ.
Республика пазы полып тоғынарға килгенімде, Хакасияда чылда 10 миллион тонна хара тас анылҷаң. Амды ол 17 миллион тоннаа чит парған. Пір чыл пазынаң республикада 23 миллион тонна хара тас анирбыс. 2017-2018 чылларға турғысхан планны хайди даа толдырыбызарларыңны пілчем. Пеер килчеткенде, чахсы тӧзелген, тозын чох чоллар кӧргем, морсымнығ техника парын сизінгем. Хысхаҷах ла тус аразына прай ниме тоғысты тӱзімніг толдырарына иділген. Улуғ алғыс сірерге!- теен Хакасияның пазы Виктор Зимин.
Хакасия пазының чооғынаң, республикадағы хара тас аныҷаң разрезтерінде пасха даа регионның чииттері тоғынарға сағынча. Пу кӱннерде Санкт-Петербургтағы тағ университедінің читі студентi тағ инженерінің тоғызы хоостыра Виктор Зиминзер айланған. Хайди таныхтаан республика пазы, пістің регионның тилізінеңер кӧп кізі пілче, аннаңар хазнаның кидеркі чардығының даа чуртағҷылары мында тоғынарға паза чуртирға сағынчалар.
«Разрез Майрыхский» хара тас аныҷаң предприятие 2015 чылда кӱскӱзін тоғынып пастаан. Пӱӱнгі кӱнде ол табырах тиліпчеткен предприятиелернің санында. План хоостыра пӱӱл разрез 1 миллион 300 муң тонна хара тас аныбызарға кирек. Че предприятиенің ӧӧн директоры Виктор Козьминнің чооғынаң, 2017 чылда пу кӧстег 1 миллион 700 муң тоннаа чит парарға кирек. Килер чылда разрез хара тасты анирын ікі хати ӧскірібізерге пӧгінче.
- Хакасияның пазы Виктор Зиминге республика правительствозына, Алтай аймааның администрациязына, Майрыхтағы разрезтің тоғынҷыларына улуғ алғызым читірчем. Минің кӧрізімнең, предприятиенің тилізінде піс прайзыбыс араласхабыс. Пӱӱнгі кӱн - ол разрезтің тилізінде теестегі чидии. Пасха предприятиелернең тиңнестірзе, піс пу кӧзідіге уғаа табырах читкебіс. Сірер пістің тоғызыбысха улуғ хозым иткеннерің ӱчӱн алғызым читірчем. Піс Хакасияның иң чахсы, маңнаныстығ предприятиенің санында поларға кӱстенчебіс, аннаңар наа паза чахсы техниканаң тузаланчабыс,- таныхтаан Майрыхтағы разрезтің ӧӧн директоры Виктор Козьмин.
«Разрез Майрыхский» хара тас аныҷаң предприятие тоғынҷыларын алғыстирға Алтай аймааның пазы Владимир Пономаренко килген. Ол прайзына маңнаныстығ тоғыс паза чахсы чал ахчазын алғаан. Налог тӧлеглерінеңер чоохтаза, «Разрез Майрыхский» хара тас аныҷаң предприятие пылтыр 26 миллион салковай налог тӧлеен. Пӱӱл разрезте хара тас аниры 1,7 миллион тоннаа чит парза, налогтың сині илееде ӧс парар.
- Хара тас анирынҷа сірернің предприятиеңер пӱӱн улуғ чидіге читті. Аннаңар мин сірернің ӱчӱн ӧрінчем, - таныхтаан Владимир Пономаренко.
Разрез директорының чооғынаң, мындағ танығлығ кирек сылтаанда предприятиенің тоғынҷыларына 13-ҷі чал ахчазы тӧлелер, ағаа хоза июньнаң сығара чап ахчазы 12 - 50 % теере ӧс парар. Пір миллионынҷы тонна хара тасты анирға паза тартарға ӧнетін иң нандырығлығ паза чахсы тоғынчатхан кізілер табылған: экскаватор машинизі Максим Николенко, автосамосвал водительі Вячеслав Логинов, транспорт участогының механигі Кирилл Архипов, тағ мастері Никита Кузнецов, тағ участогының пастығы Андрей Гаращенко паза ӧӧн инженер Алексей Буйнов. Майрыхтағы разрезтің адынаң пу тоғынҷыларға сыйыхтар читірілген.
Максим Николенко паза Вячеслав Логинов пip миллионынҷы тонна хара тасты анаан соонда 1000000 тонна пазыл парған килкім хара таста хол салғаннар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы