СУҒЛАР ТАЗАРЫНАҢ ХОРҒЫС УЛУҒ НИМЕС
23.05.2017
Хабарлар
Хакасияның ГО, ЧС паза ПБ-ҷа управлениезінің ӱгредіг кінінде республиканың сағыбаан саайларҷа комиссиязының чыылии ирткен. Аның тоғызын Хакасия пазы орынҷызының тоғызын толдырчатхан, комиссияның кнезі Владимир Крафт апарған.
Чыылығда МЧС-тың Хакасияҷа Ӧӧн управление пастығы Александр Мулл, республиканың ГО, ЧС паза ПБ-ҷа управление пастығы Николай Старков, министерство-ведомстволарның кізілері паза город-аймахтардағы сағыбаан саайларҷа комиссияларның устағҷылары араласханнар.
Хайди таныхтаан Владимир Крафт, пу чыылығда кӧдірілчеткен суғлар хайдағ хорғыс аалларға ағылчатханын, арығларда ӧрттер сыхчатханын кӧрібізерге кирек полар. Ідӧк муниципальнай аймахтардағы ӧрт ӱзірҷеңнерге, киинең ӱбӱріп, чазыдағы ӧрттерні, кӧйчеткен хуруғ отты ӱзірҷең аппараттар читірілер. Спонсорлар полызиинаң андағ 11 аппарат алылған, полғаны ла 12 кг пасча, аннаң, суғны киинең хада пырғыртып, кӧйчеткен отты ӱзірерге чахсы.
Чазыларда сыхчатхан ӧрттер саны ам хызырылча, че арығларда ам даа ӧрттер удаа сых парчалар. Республикада ӧрттердең тоғыр режим тоғынча, ӧрт ӱзірҷеңнерге сыбыра тимде поларға кирек.
МЧС-тың Хакасияҷа Ӧӧн управление пастығының орынҷызы Алексей Максименконың чооғынаң, тағлардағы хар ам хайыл таа парир. Суғлар сині тың кӧдірілбинче, Абаза хыринда Ағбан суғның сині 3,30 метрге тиңнелче, Ағбан город хыринда - 3,64 метрге. Анҷа кӧдірілгені хорғыс ағылбинча, амды хар киненетiн кӧп хайыл сыхпазына килістіре кӱннер турча. Абазада паза Ағбан пилтірі аймаанда суғлар кӧдірілеріне тимненіс тоғыстары кӧп апарылған.
Ағбанда ӱстӱнзархы дамба хыриндағы тураларның ораларында чир алтынаң суғ сыхча. Ідӧк чир алтынаң суғ сыхчатханы Орджоникидзе аймаандағы Наа аалда паза Шира аймаандағы Тустығ кӧл аалда таныхталча. Пӱкӱлее алза, республикада суғлар тазарынаң хорғыс улуғ нимес. Гидрометцентрнің искіриинең, халғанҷы туста суғлар сині тӧбін тӱс сыххан. МЧС тоғынҷылары прай суғларны сыныхтағда тутчалар.
Хакасияның ағас хонии департаментi устағҷызының тоғызын толдырчатхан Зиновий Юськив арығларда сыхчатхан ӧрттердеңер искірген. Аның чооғынаң, пӱӱл республикадағы арығларда 12 ӧрт сыххан (пылтыр пу туста - 14). Ӧӧнінде олар хуруғ отты ӧртеен сылтаанда сых парчалар. Пірееде арығларзар ӧрт республика тастынаң, хости регионнардаң килче. Лесниктер тыыдылған режимде тоғынчалар, авиация полызиинаң даа патрулирование апарчалар. Чазыларда час от ӧскенҷе арығларға ӧрттердең хорғыс полар.
Чыылығда ідӧк чайғыда олғаннарны хазыхтандырҷаң лагерьлердеңер чоох парған. 25 майдаң республикадағы школаларда кӱнӧрте тоғынҷаң лагерьлер азылар, 3 июньнаң город тастындағы лагерьлер тоғынып пастирлар. Хакасияда андағы 11 лагерьде олғаннар тынанар, ідӧк республиканың тастындағы 9 лагерьде пістің олғаннар хазыхтарын тыыдарлар. Прай лагерьлерде 47 муң артиинаң олған тынанар. Владимир Крафт МЧС тоғынҷыларына ол олғаннарнаң профилактика тоғызын апарарға чахығ пирген.
Конференц-залда чыылығ тоозылғанда, тасхар город-аймахтардағы сағыбаан саайларҷа комиссияларның кізілеріне, киинең ӱбӱріп, ӧрт ӱзірҷең «Штиль» аппараттар читірілген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы