ХАЙДА ДАА ПОЛЗАҢ, «ХАБАР» ГАЗЕТАА ПАЗЫН!
23.05.2017
Хабарлар
Пiс, Сульберековтар сӧбірезі, Фёдор Петрович паза Вера Алексеевна Сульберековтар, газетабыстың 90 чылына чарыдылған «Иң иргі сығарыс - сӧбіре чыындызында» марығда аралазарға чараттыбыс. Газета «Ленин чолы» адалғанда, піс ағаа пазынып пастаабыс.
Пастағызын мин, Вера Алексеевна, кӧп нимес позымнаңар пас пирим. Пастағы кічиҷек статьямны пасхам, Кічіг Нонып аалда 5-ҷі класста ӱгренчеткенімде. Класс устағҷызы полған Алексей Васильевич Тюкпеев. Піс ағаа тың хынҷаңмыс. Ол піске нымахтар, ӱгредігліг чоохтар кӧп чоохтаҷаң. Піс аның на уроктарын сахтаҷаңмыс. Ам, позым ӱгретчі полчатханымда, піліп алғам, хайда хыйға, илбек чӱректіг полған Алексей Васильевич.
Алексей Васильевич пісті газетаа пазарға ӱгретчең. Пастағы статьямда школада ирткен саналығ марығдаңар пасхам. Мин пастағы орынны алып алғам, Люба Карачакова - ікінҷі, НастяТюкпиекова - ӱзінҷі. Статьяны пазарға хынмаам, махтанып пасхан тиирлер тіп. Че Алексей Васильевич мағаа теен: «Син утып алғазың. Прайзы пілзін аны. Синӧк чіли утарға сірензіннер!» Алексей Васильевич пісті хакас тіліне хынарға, чуртаста туртухпасха ӱгреткен.
1983 чылда піс Фёдор Петрович Сульберековнаң хада хоных тӧстеебіс. Ол - чааҷы, майор, танкист. 1983 чылда Омсктағы чаа-танк инженер училищезін тоосхан. Олох чыл Германскай Демократическай Республиказар (Германиязар) ызыбысханнар. Анда пис чыл служба ирткен, мин аннаң хада чуртаам. Ноға мин аннаңар пасчам? Пу сомдағы газетаны піс пастағызын на Германияда алғабыс. Піс ибзер отпускка килгенде, «Ленин чолы» газетаның редакциязынзар кіргебіс. Анда піске Германиязар газеталар ыс поларлар ба тіп сурғабыс. Редакцияның тоғынҷылары ӧрін парғаннар. Неделя сай газеталарны пачкаларнаң алҷаңмыс. Пістің частьнаң хости частьта Хызыл хара суғдаң Андрей Кочелаков служба иртчеткен. Ол піссер газета хығырарға ӧнетін килҷең.
Туркменияда служба ирткенде, хакас сӧбірелер - Прокопий Егорович (Хакасияның хазых хайраллаҷаң министрінің орынҷызы полған) паза Людмила Прокопьевна (республиканың чир-суғ ӱгренҷең музейнің директоры полған) Мылтыгашевтер, Николай Тимофеевич Бурнаков (Асхыс аймааның устағ-пастаанда тоғынча) паза пасхазы - пісте «Ленин чолы» газетаны хығырҷаңмыс. Аның соонда Забайкальскай крайда служба ирткебіс. Анда даа пос чонының газетазына пазынарын узаратхабыс.
Піс, Сульберековтар сӧбірезі, пасха чирде чуртапчатхан хакас чонынзар айланчабыс: «Пос тілін ундутпаңар! «Хабар» газетаа пазыныңар!»
Редакция тоғынҷыларын газетаның 90 чылынаң алғыстапчабыс, пик хазыхтығ паза узах частығ полыңар!
Автор :
Вера паза Фёдор СУЛЬБЕРЕКОВТАР Улуғ Нонып аал
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы