ХЫҒЫРЫҒҶЫНАҢ ХАДА - 30 ЧЫЛ
24.05.2017
Хабарлар
Пеер, Ағбан город библиотеказының 12-ҷі пӧлиинзер, ол мында Б.Хмельницкийнің адынаң орамазындағы 158 № туразында орных сыххан тустаң сығара чӧр сыххам. Итсе, аннаң сала орай арах таа килген полам. Че аны мин анда Валентина Мозговая паза Галина Ахпашева, Ағбандағы ӱгретчілер институдын тоосхан ӧӧрелер, тоғынған туста позыма «азып» алғам. Амды мында библиотекарьларның ӱзінҷі тӧлі тоғын парча.
Пу библиотека, пастап кинделер пирҷең орын на полып, 1987 чылда 20 июльда азылған. Амды мындағы улуғ нимес, че чӧптіг ӧме позының 30 чылына тимненче, ағаа удур идер тоғыстар кӧр салған. Оларның пірсі, «Постың профессиязынзар хығырчам» адалып, пу кӱннерде иртіріл парған. Анда чыылысхан чонға библиотекарьның тоғызынаңар чарыда чоохтап пиргеннер. Аның тоғызы кинделер пирері ле полбинча, чоннаң аймах-пасха тоғыстар апарары ідӧк оларның иңнілеріне артыл парған.
- Пістің пӧлік городтың библиотека системазының устаа иртірчеткен парчан киректерде ӧткін араласча, - чоохтапча аның устағҷызы Любовь Кузургашева. - Кӧзідімге алза, силкер айы чаадаңар чоохтапчатхан кинделер айы пол парған. Ай тооза піс андағ кинделердеңер, оларны пасхан кізілердеңер чоохтап парирбыс. Чоохтирға кирек, орындағы авторлардаңар, оларның тоғыстарынаңар удаа чоох апарадырбыс.
Іди чыл сай городтың «Орленок» паркында паза позыбыста чайғыдағы хығырығ марығларын иртірчебіс, анда хайдағ даа кізі позының чайаачы тоғызынаң таныстыр полар оңдайлығ. Кварталда пір хати библиотекада «Литератураның аалҷы туразы» тоғазығны хоос сӧс устарынаң иртірчебіс. Анда хығырығҷылар оларның чайаачы тоғыстарынаң танысчалар, аалҷы поэт полза, аның кибелістерін хығырчалар. Ол мероприятиеде поэттернің «Ирбис» пірігізі удаа араласча. Аннаң устапчалар Россияның Писательлер пірігізінің кізізі Юлия Тарабарова, чиит поэттер Ирина Левинцева паза Наталья Троицкая.
Мині дее ол «аалҷы туразынзар» удаа хығырып алчалар. Андағ тоғазығларның халғанҷызы пӱӱл апрельде полған. Анда аймах-пасха сурығлар пирілген. Кізі хайди писатель пол парча? Чоохтар пазар темаларны хайдаң алча? Хаҷан маңат пазылча? Ідӧк позымнаңар кӧмес чоохтаам. Че хаҷан поэт Юлия Тарабарова мин аның кибелістерін хакас тіліне тілбестеп салғам тіп искір пиргенде, 25-ҷі школадағы 8-ҷі класстың ӱгренҷілері оларны хығыр пирерге сурынғаннар. Хығырарға киліскен: Юлия Владимировна - орыс тілінең, мин - хакас тілінең.
- Пу школадағылардаң пасха, - чооғын узаратча Любовь Петровна, - пісте удаа аалҷы полчалар 19-ҷы школаның ӱгренҷілері, хонҷых «Василек», «Хызыл чахайах», «Санаторнай» олған садтарының палаҷахтары паза оларның ӱгретчілері. Кічіглеріне нымахтар хығырчабыс, пірееде оларны кӧртіс тее пирчебіс. Ойынны «Кӧлеткі театры» полызиинаң апарчабыс. Іди пу наада олған садтарында «Ноғаҷахтарның чазын» иртіргебіс, анда чылчатхан, учухчатхан паза сегірчеткен нимелердеңер чоох апарғабыс.
Библиотекалар кӱні 27 майда таныхталча. Че піс олкӱн тынанчабыс, аннаңар «Кӧлеткілер театрын» пазағы кӱнде иртірербіс. Мының алнында андар 5-6 класстағы пір ле группа чӧрген, амды ікі - 19-ҷы паза 25-ҷі школалардаң. Пазағы айда ідӧк «Нанҷылар аразында» тоғазығ иртірерге пӧгінчебіс.
Пайрамнығ чылны таныхтирын ноябрьда тоозарбыс. Аның хайди иртері пістің пӧлікке ле нимес, че парчан городха даа, тиксі Хакасияа даа танығлығ полар.
Тоғазығларның пастағызы «Іскеркі аймах чоннар» адал парған, анда піс іскеркі хазналардаңар чоохтирбыс, мындағы кореецтернең тоғазығ тимнирбіс. Соонаң «Тасхыллар яңы» иртірілер, анда Кавказтаңар орыс чоохтар паза кибелістер хығырарбыс. Ӱзінҷізі - «Акыннар чолынҷа». Тоғазыға «Согдиана» паза «Аран чула» пірігістерін хығырып аларға, казах акынынаң паза хакас хайҷынаң тоғазарға пӧгінчебіс. Анзы піске, хакас чонға, тиксі Хакас чиріне дее чағын арах поларҷых. Тӧртінҷізі «Хыр харлар чирі» адалча, анда піс соох чирлердегі чоннардаңар чоох апарарбыс.
Пу тоғысты фестиваль даа тіп адап саларҷых. Аның халғанҷызынзар октябрьдағы мероприятиеде Хакас чирінде чурттығ чоннардаңар чоох апарылар. Аны піс городтың культура устаа полызиинаң иртірербіс...
Любовь Кузургашеваның полысчылары пар. Іди библиотеканың парчан киректерінде ӧткін араласчалар абонементтер пӧлиинің устағҷызы Любовь Иванова, Надежда Камагина, Жанна Алахтаева. Оларға мындағы техническай тоғынҷылар Людмила Адыгаеванаң Ирина Щетинина полызыға килчелер.
Л.П.Кузургашева минің чир-суғҷым полча. Аннаң Таштып аймаандағы библиотекаларның пірсінде танызып алғабыс. Сайлығ Сии аалда тӧреен кізі Улуғ Сии аалда ӱгрентірӧк. Городсар кӧзер алнында, ол Таштып аалдағы библиотекаларда тоғынғлаан. Ағбанзар 2009 чылда кӧс киліп, 9-ҷы пӧлікте тоғын сыххан. Мындағы устағҷы Ирина Ковалеваны город библиотеказының устаанынзар алып алғаннарында, Любовь Петровнаны, ӧткінін паза кӱстенҷігін сизін салып, 12-ҷі пӧліктің устағҷызына турғыс салғаннар. Ол мында 10 чыл тоғын салған.
Ӱлӱкӱннең сірерні, кӧріндіре нимес, че чонға тың кирек тоғыстағы абахайлар!
Автор :
Олег ШУЛБАЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы