«ЧАНАР ХУС» ОПЕРА КӦРІГҶІЛЕРНІ САХТАПЧА
26.05.2017
Хабарлар
Хакас филармониязында пресс-конференция ирткен. Хабарҷыларнаң хада филармония директоры Вячеслав Инкижеков, хоос устағҷы Артур Марлужоков паза режиссер Юлия Белогурова тоғасханнар.
Пастап сӧс алған Вячеслав Инкижеков. Аның чооғынаң, Хакас филармониязының 28-ҷі сезоны чахсы ирткен. Пістің кӧрігҷілерні чайаачызынаң кӧп артист ӧріндірген. Пастағызын на Хакасияда гастрольларнаң «Алан» теелбек ансамбльы полған.Саблығ ӧменің теелбектері кізілерні хайхатхан. Москвада чуртапчатхан ырҷы Вита Васильева барокко паза классицизм эпохаларының сарыннарын толдырча. Кӧрігҷілернің сурынызын толдырып, Хакас филармониязының устағ-пастаа аны пазох республиказар концертнең хығырарға сағынча.
Ідӧк хырығ озаринда ӱгренчеткен музыканттар Анастасия Субракованы паза Осип Никифоровты таныхтирға кирек. Олар чыл сай, Ағбанда концерттер иртіріп, чир-суғҷыларына ӧрініс сыйлапчалар. Филармонияның артисттерінеңер чоохтаза, олар кӧп хынығ проект тимнеп салғаннар. Хакасияның чон артизі Вячеслав Кученов «Айдолай» алыптығ нымахтың ӱзігін ысхан. Эстрада ырҷылары хынығ программалар тимнееннер.
Че Хакас филармониязының иң улуғ чидии «Чанар Хус» опера полча. Аның премьеразы пылтыр 15 декабрьда ирткен. Композитор Александр Кенельнің хатап турғызылған операзы кӧрігҷілерні аптаан. Режиссёр Юлия Белогурова чоохтапча: «Чанар Хусты» ӧменең тимнеебіс, анда филармонияның прай артисттері араласча. А.А.Кенельнің чалахай музыказын симфоническай оркестр толдырча. Итсе, ойын пір ле хати кӧзіділген, аннаңар Хакасияның чуртағҷыларының кӧбізі аны кӧр полбаан. Чӧптезіп, 28-ҷі чайаачы сезонны пу операнаң чабарға чаратхабыс. Піс аны 6 паза 7 июньда 18.30 часта кӧзідербіс. Ойында улуғ нимес алызығлар пол парған. Кӧзідімге, Наталья Титованың орнына Чил Хараның рольын Валерия Кыржинакова паза Алина Тюмерекова теести толдырарлар, апсахтың партиязын - Олег Гриценко. Прайзын ойынға хығырчабыс».
Амды филармонияның ӧӧн пӧгіні «Чанар Хус» операны хакас тілінең турғызыбызары. Піс, кӧрігҷілер, аны сағирбыс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде