ЧИР-ЧАЙААННЫ ХАЙРАЛЛААЛАР
31.05.2017
Хабарлар
Амғы туста Россияның кӧп регионнарында арығ-чазыларда ӧрттер сыхчалар. Оларның ӧӧн сылтаа - чуртағҷылар отнаң салбыр тузаланғаны. Олар, арығзар тынанарға сығып, от тамызып, аны ӱзірбин парыбысчалар. Ідӧк кізілер иблерінде сӧп-сапты ӧртепчелер. Чил, кӧдірілзе, от сағынын ырахха апарыбысча. Іди чурт ээзі ле нимес, ідӧк хонҷыхтары ӱреге кірчелер.
Школаларда ӱгретчілернең, паба-іҷелернең, школа тоғынҷыларынаң паза аал чуртағҷыларынаң профилактика тоғызы апарылча. Апрель айда пістің школада ӧрт ӱзірҷеңнернің кічіг полысчыларының (ЮПП) ікі ӧмезі тӧстелген. 4-5 класстарның ӱгренҷілері, тузалығ паза хынығ программа тимнеп, аны пасха олғаннарға кӧзіт пиргеннер.
Пу мероприятиеде олғаннар ӧрттер сыхчатхан сылтағларны паза ӧрт сығарбас оңдайларны піліп алғаннар. Олар класс устағҷылары Альбина Михайловна Токоякованаң паза Мария Никитична Сагатаеванаң пу мероприятиее кирек ниме-ноолар тимнееннер паза плакаттар хоостааннар.
Технология ӱгретчізі ӧрт ӱзірҷеңнернің кічіг полысчыларына костюмнар тік пирген. 4-ҷі класстың ӱгренҷілері от теелбегін кӧзіт пиргеннер.
Республика синінде олған-саарбахтар чайаачызының «Таланты и поклонники» фестивальы ирткен. Ол ӧрттер сығарбас темаа чарыдылған. Анда «Агитбригада» номинацияда 5-ҷі класстағы ӱгренҷілернің «Факел» командазы пастағы орынға сыххан.
«Литература-кӧг композициязы» номинацияда 4-ҷі класстың «Прометей» командазы ӱзінҷі орынға турысхан. Пістің кӧзідиибістің ӧӧн пӧгіні - ӱгренҷілерні паза аал чуртағҷыларын чир-чайаанны хайраллирына кӧніктірері.
Пістің аймахта чуртапчатхан олғаннарны сизіндірчебіс: арығда паза ачыхта отнаң хаҷан даа ойнабаңар. Ӧрт табырах тарапча, чир-чайаанға улуғ ӱрег ағылча. Ідӧк аал чуртағҷыларынзар айланчабыс: «Арығлар паза чазылар - пістің ис-пайыбыс. Чир-чайаанны хайраллаңар паза пасхазын ағаа ӱгредіңер!»
Олғаннар ӧрттер сығарбазынҷа агитация тоғызынаң наа ла айғазарға пастапчалар. Пістің чайаачы ӧме аалыбыста ол кӧстегҷе тоғызын узарадар.
Автор :
Ольга ГУБАНОВА, Ис пилтіріндегі школаның ӱгретчізі
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы