АЛТЫН ӰННІГ ЫРҶЫЛАРНЫҢ КОНЦЕРТӀ
20.06.2017
Хабарлар
Ағбанда В.Г.Чаптыковтың адынаң хакас филармониязының улуғ залында чапсых концерт ирткен. Владимир Терешков, Зинаңда Аршанова, Артур Марлужоков, Даниил Тарасов паза филармонияның «Каданс» олған хоры саблығ орыс операларның арияларын сарнааннар. Оларның кӧбізі хакас сценазында пастағызын на толдырылған.
Чоохтирға кирек, пу концерт «Операның алтын вегі» проект хоостыра иртірілген. Ол филармонияда 2015 чылдаң сығара чуртасха кирілче. Пастап артисттер кӧрігҷілерні Николай Римский-Корсаковтың саблығ «Царская невеста» операның ӱзіктерінең таныстырғаннар. Аның премьеразы ах хан тузында 1899 чылда ирткен. Тилекейдегі опера театрлары «Царская невеста» ойынны турғызарға хынадырлар. Мында Иван Грозныйның тузынаңар чоох парча. Симфоническай оркестр дирижер Вячеслав Инкижековтың устаанынаң операның увертюразын толдырған.
Аны истіп, кӧрігҷілер орыс чонның нымахтарын, пазылбин пӱткен чайаачызын сағысха киргеннер. Анаң сценазар Хакасияның чон артизі Владимир Терешков сыххан. Бас-баритон ӱнніг кӧгҷі олох операның матыры Григорий Грязнойның ариязын сарнаан. Абахай Марфа хыныбысхан Грязнойның омазын Владимир Дмитриевич чахсы чайап салған. Зинаида Аршанова, Артур Марлужоков паза Даниил Тарасов операның халғанҷы чардығының сценазын кӧзіткеннер. Ағырыға пастыр салып, алҷаахчатхан Марфаны Зинаида Аршанова киртіністіг ойнапча.
Санкт-Петербургтағы консерваторияның тӧстегҷізі Антон Рубинштейн 13 опера пас салған, иң саблығы «Демон» полча. Композитор аны поэт М.Ю.Лермонтовтың поэмазы хоостыра чайаан. Демонның ікінҷі романсын Владимир Терешков чалтырама сарнабысхан. Владимир Дмитриевичтің кӱстіг ӱні улуғ залға толдыра чайылған. Хакасияның паза Алтайның саблығ артизі Артур Марлужоков Демонның ӱзінҷі романсын толдырған. Кӧрігҷілер, ырҷының узына аптаттырып, матап айа сапханнар. Концерттің пастағы пӧлиинің халғанҷызынзар филармо-нияның «Каданс» олған хоры сыххан. Хызыҷахтар Александр Даргомыжскийнің «Русалка» операзының ӱзігін сарнааннар. Хайхастығ музыка, хор араласчыларының сіліг ӱннері кӧрігҷілернің кӧңнін кӧдірген.
Чалахай иирнің ікінҷі пӧлиин симфоническай оркестр Милий Балакиревтің «Ӱс орыс сарынға пазылған увертюра» чайаачы тоғызынаң асхан. Композиторның пу увертюразын музыканттар концерттерде удаа толдырчалар. Таныхтирға кирек, М.А. Балакирев «Могучая кучка» орыс композиторларның пірігізінең устаан. Пірігістің ӧӧн пӧгіні - музыканы орыс чонның кибірлеріне тӧстеніп пазары. Андағ оңдайнаң олар национальнай операның тӧстегҷізі Михаил Глинканың тоғызын узаратханнар. Михаил Иванович ікі опера чайап саларға маңнанған: «Иван Сусанин» паза «Руслан и Людмила». Хакас кӧгҷілер композиторның халғанҷы операзының ӱзіктерін толдырғаннар. Россияның саблығ артизі Зинаида Аршанова Людмиланың ариязын сарнаан. Зинаида Семёновнаны пістің кӧрігҷілер сыбыра хынып исчелер. Ідӧк Артур Марлужоков чайаачызынаң ӧріндірген. Таланттығ ырҷы Русланның партиязын толдырған. Сарнап, Артур Викторович ӧӧн матырның омазын кӧзіт пирерге кӱстенген.
«Могучая кучка» пірігістің араласчызы полған композитор паза химияның профессоры Александр Бородин. Ол пip ле опера пас салған. Іди дее полза, «Князь Игорь» ойын тилекейдегі иң саблығ операларның санына кірче. «Слово о полку Игореве» хоостыра чайалған тоғыстың ӱзіктерін опера кӧгҷілері тӧреміл толдырчалар.
Концертке Хакас филармониязының артисттері пис ӱзік таллап алғаннар. Пу ойында пиг Владимир Галицкийнің сарынын, Ярославнаның сыыдын паза половец хыстарның хорын таныхтирҷыхпын. Тиксі алза, пу операда ӧӧн матырлар ылғапчалар, хомзынчалар, Владимир Галицкий ле чуртасха ӧрінче. Таңдағызынаңар сағынмин, ол пиг Игорь нимее іди сағыссырапчатханын пір дее оңар полбинча. Аның оңдайын Артур Марлужоков уғаа чахсы кӧзіт пирген, тиктең нимес кӧрігҷілер артистке «Браво!» хысхырғаннар. Чиит артисттер «Улетай на крыльях ветра» ырны сарнааннар.
«Операның алтын вегі» чалахай иир пӧзік синде ирткен. Кізілер хынчатхан артисттерге порчолар сыйлааннар. Наа концерттернең филармонияның чайаачылары кӧрігҷілерні пазағы сезонда ӧріндірерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде