КИБЕЛӀСТЕР
16.06.2017
Хабарлар
Кибелістер
Чоохтап пир, ноғадаң хомзыныс
Чалбах чазы кӧглерінде?
Сӱрместер чіли, чайхалыс
Турча халсарығлар иңнілерінде.
Оларны чайхатча чайғы тан
Хызыл иир кӧксілерінде.
Алтын мӱӱстіг инезі пулан
Пулуттың оттапча кӧбіктерінде.
ЧАЗЫЛАРЫМНЫҢ КӦГЛЕРІ
Чоохтап пир, ниме ол кӱстіг
Чалбах чазы кӧглерінде?
Алай хоолап турча чӱгӱртіг
Асхырлар табаны кӧксілерінде.
Хоолапча ол кӱстіг хыллар -
Чазылар хайлапча ӱннерінде.
Паарымны ағыртчалар олар
Чазыттығ чирім-суумның кӧглерінде.
АТПАҢАР ХУСТАРНЫ
Атпаңар чирім чазаан хустарны,
Атпаңар хустарны пір дее.
Чалахай оларның сарыннары
Истіл турзыннар тигірде.
Кӧстебеңер хара мылтыхтарны,
Амыр кӧллерде аат чуртазын.
Атпаңар ах мойнылығ хастарны,
Амыр суғларда олар чӱс чӧрзін.
Тыңнаңар кӱскӱде турналарны,
Анымҷох ыс турып оларға.
Олар, тобырып хысхы харларны,
Часхыны ағылар чонға.
МАҢЗЫРАБА, ЧУРТАС
Маңзыраба, чуртас! Хонған кӱніңні
Айран на чіли ісчем, сухсап.
Аймах ла пасха сыңыраан ӱніңні
Чӱрек-паарыма алчам, сынап.
Маңзыраба чуртас! Хызыл ханыма -
Іҷемнің сыйиина - чӧрчем ізеніп.
Син мағаа пирілген хуйах-тыныма -
Пабамның сыйиина - чӧрчем ӧрініп.
Маңзыраба, чуртас! Хынза, пу чирде,
Аарлығ аалҷы чіли, мин чӧрбим.
Тойда ідіс-хамысты даа чууп пірде,
Мин пірде тӧрде дее одырим.
Маңзыраба чуртас! Чӱреем сарыны
Сарналзын тӧріткен тілімде.
Хасха сӧӧгімнің ӱзілбеен тамыры
Сабылзын тӧріткен тӧлімде.
Маңзыраба, чуртас! Ам даа сағызым
Пай кӱзіңні хоос сілиинең ассын.
Ам даа кӧглеҷең кӧӧлбек кӧӧліг узым
Чоныма сарыннар тӧрітсін.
Маңзыраба, чуртас! Че хоор адымның
Позазы салыхса хысхызын,
Тӧріткен чиріме чӱрек-паарымның
Пир сал илбек хынызын!
Автор :
В.Татарова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы