ХАКАСИЯДАҒЫ АЙМАХ ЧОННЫҢ КУЛЬТУРАЗЫНАҢ ТАНЫСЧАЛАР
21.06.2017
Хабарлар
ЧАЙҒЫ - ХАЙДАҒ ХАЙХАСТЫҒ ТУС! ИРТЕ ТУРЫП, ШКОЛАА ПАРАРҒА, ИБДЕГІ ТОҒЫСТЫ ТОЛДЫРАРҒА КИРЕК ЧОҒЫЛ... ТЫНАН, ОЙНА, ТОСХАНҶА СУҒА СОМ... УЛАМОХ ХЫНЫҒ ЧАЙҒЫ ТУСТЫ ИРТІРЧЕЛЕР ЛАГЕРЬЛЕРДЕ ТЫНАНЧАТХАН ОЛҒАННАР. АЛТАЙ АЙМААНДАҒЫ «КИИКЧІН» ОЛҒАН ХАЗИИН ПИКТЕҶЕҢ ӰГРЕДІГ КІНІНДЕ ПУ КӰННЕРДЕ ПАСТАҒЫ СМЕНА АЗЫЛҒАН. ПУ ЛАГЕРЬДЕ КӦП ПАЛА ТЫНАНАР, ЧЕ ОЛОХ ТУСТА КӦП ПӀЛӀС АЛАР. ПӰӰЛ «КИИКЧІН» ОЛҒАН ЛАГЕРЫНДЕ «ХАКАСИЯДАҒЫ ЧОННАРНЫҢ ЧИИТТЕР АССАМБЛЕЯЗЫ-2017» ПРОГРАММА ЧУРТАСХА КИРІЛЕР. АНЫҢ ПАЙРАМНИ АЗЫЛҒАНЫНДА ХАКАСИЯНЫҢ НАЦИОНАЛЬНАЙ ПАЗА ТЕРРИТОРИАЛЬНАЙ ПОЛИТИКА МИНИСТРІ МИХАИЛ ПОБЫЗАКОВ, РЕСПУБЛИКАНЫҢ СОЦИАЛЬНАЙ АРАЧЫЛАНЫС МИНИСТЕРСТВОЗЫНЫҢ, ХАЛЫХ ПАЛАТАЗЫНЫҢ КІЗІЛЕРІ АРАЛАСХАННАР.
«Хакасиядағы чоннарның чииттер ассамблеязы-2017» проект Россиядағы Экология паза Хакасиядағы Чииттер чылына чарыдылча. Аның авторы методист Нина Николаевна Матросова полча. Ол пу лагерьде кӧп чыллар істен салған. Пастағы смена «Чайаачы чолларҷа» адалча. Андар 200-че олған килген. Олар - чайаачы, таланттығ 6-15 частығ олғаннар. Оларның чарымызы - кӧп палалығ, чуға чуртапчатхан сӧбірелернің палалары. Ідӧк нинҷе-де отряд спортнаң айғасчатхан олғаннар. Мында олар 21 кӱн чуртирлар, пу тусха программа хоостыра оолағас-хызыҷахтар Хакасияда чуртапчатхан аймах чонның культуразынаң танызып аларлар.
- Программа пастыра олғаннар иң пастап орыс чонның культуразынаң тирең танызарлар. Анаң піссер «Алтынай» хакас ипчілер лигазының кізілері ааллап килерлер. Олар олғаннарны хакас чонның культуразынаң, кибірінең паза тархынынаң таныстырарлар. Соонаң піссер килерге киректер немец, чуваш паза даа пасха чоннарның кізілері. Тиксі алза, смена тоозылғанҷа «Киикчін» олған лагерьінде тынанған палалар кӧп піліс алып аларға киректер, - таныхтаан программаның авторы Нина Матросова.
Ӱгренерге паза наа піліс аларға олғаннар хаҷан даа хынадырлар, че лагерьде иң пастап олар наа нанҷылар таап аларға, чахсы паза тузалығ тус иртіріп аларға сағынчалар. Ана анзын олғаннарға алғаан Хакасияның национальнай паза территориальнай политика министрі Михаил Побызаков.
- Чайғы - олғаннарның иң хынчатхан тузы. Мин сірерге лагерьде, тынанып, пілістер алып, олох туста кӧп нанҷылар таап аларға алғапчам. Хакасияда аймах чон чуртапча, піс прайзы ынағ паза пілізіп чуртирға кирекпіс, - чооғында таныхтаан Михаил Анатольевич.
Асхыс аймаандағы Пилтір аалдаң «Киикчін» лагерьде ӱс хызыҷах тынанча: Диана Сагалакова, Юлия Вострецова паза Настя Тумоякова. Ӧӧрелер пу лагерьде пастағызын на, мының алнында олар Асхыс аймаандағы «Орлёнок» лагерьде тынанҷаңнар. Хызыҷахтар мында спортнаң айғасчалар, аймах кружоктарға чӧрчелер. Чайғы тусты хынығ паза тузалығ иртірчелер. Пір ле ниме ӧӧрелернің кӧңнін тӱзірче.
- Мында аймах ааллардаң килген олғаннарнаң танызып алғабыс, кӧп хынығ мероприятиелер иртірілче. Че лагерьде сомҷаң кӧл чохтаңар хомай. Мындағ ізігде суға сомып алған полза, чахсы поларҷых, - сағызынаң ӱлесче Диана.
Сынап таа, лагерь хыринда кӧл чоғыл, олғаннар улуғ нимес бассейнде соомчалар. Пір саңай анда 5-6 олған на соом полар.
«Хакасиядағы чоннарның чииттер ассамблеязы-2017» проект лагерьнің ӱс сменазында чуртасха кирілер. Ікінҷі сменаа лагерьзер аймах предмет олимпиадаларының, фестиваль-марығларның чиңісчілері килерлер. Ӱзінҷі сменада Алтай аймаандағы олғаннар тынанарлар. Олар ідӧк анда аймах чонның культуразынаң танызарлар.
Таныхтирға кирек, пӱӱл «Киикчін» олған лагерьіне 60 чыл толча. Ол 1957 чылда тӧстелген. Пастап «Чайка» адалған, 2011 чылда «Киикчін» пол парған. Хайди чоохтапчалар пу лагерьде ӱр тоғын салған воспитательлер, лагерь тиктең не «Киикчін» адалбинча. Лагерьде тасхар музыка ойназох, киикчіннер сах андох лагерь ӱстӱнҷе учух чӧрчелер. Анзын піс позыбыс кӧріп алғабыс. Пайрамнығ линейка тузында музыка ойнабысханда, киикчіннер сах андох, лагерь ӱстӱнҷе учуғып, «теелбек» сал сыхханнар...
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы