ПАЛАЛАРНЫҢ ХАТХЫ-КӰЛКІЗІ ЧАЙЫЛҒАН
21.06.2017
Хабарлар
Асхыстағы С.З.Карамчаковтың адынаң спорткомплексте Асхыс аймаанда чурттығ кинек палаларның III фестивальы ирткен. Ол Илбек Чиңіске чарыдылған. Олғаннарға ӱлӱкӱнні Асхыс аймааның чонға социальнай полызығ пирҷең управлениезі иртірген.
Фестивальны чонға социальнай полызығ пирҷең управлениенің устағҷызы Ольга Юнгкейм асхан. Ол аймах устаан ахчанаң сидік туста фестиваль иртіреріне ахча позытхан ӱчӱн алғыстаан. Анаң чоох тутхан аймахтың спорт паза туризм управлениезінің пастығы Александр Челтыгмашев.
Фестиваль ойын-марығлар оңдайынаң ирткен. Ойынны апарған Валериан Барашков олғаннарны ікі командаа чарыбысхан. Анаң боулинг ойынҷа марығ пасталыбысхан. Пу ойынны прайзы пілче полар: мында кегляларны шарнаң тӱзіре сабарға кирек. Че марығда кеглялар орнына суғлығ пластик бутылкалары, шар орнына меспек тузаланылған. Олғаннар ойында ӧткін араласханнар. Чахсы пас чӧр полбинчатхан палаларға ойнирға оой ла полбаан, че іҷе-пабалары оларға полыс турғаннар. Палалар матап ӧрінчеткеннер.
Фестиваль марығларына футбол кирілгенӧк, олғаннарға хаалхазар меспек кире теебізерге кирек полған. Мындох чарғыҷылар сан апарғаннар. Оларны адап пирим: Марина Худякова, Марина Кыскаракова паза Елена Угдыжекова. Марығ аразында Валериан Барашков, олғаннарны теелбектенерге хығырып, аймах ойыннар иртірген.
Паза хоккей клюшказынаң меспекті пластик бутылкалары аразынҷа апарарынҷа марығ полған. Олғаннар іҷе-пабалар командазынаң тоғыр ойнааннар. Пу марығда олғаннар утып алғаннар.
Ідӧк командалар арғамҷы тартысханнар. Иң пурун паба-іҷелернің командалары арғамҷы тартысханнар, оларның соонаң - олғаннар командалары. Анаң олғаннарның піріктірілген командазы паба-іҷелердең тоғыр турыбысхан. Иреннер сыхпааннар, ипчілер ле полған. Андағ даа полза, сизінгем - палалар сыдабастар. Піс Валериан Васильевичнең хада олғаннарға полыс пиргебіс. Палаҷахтарның ӧрінчеткеннері пу чир полбаан.
Иң ӧткін палаларны адап, оларға сыйыхтар читіргеннер. Пасха араласчылар ідӧк сыйых чох нанмааннар. Марығлар ирткен соонаң олғаннарны стол кистінзер хығырғаннар, мында тадылығ чиистің аймағы полған.
Олғаннар майыхханҷа ойнап алғаннар. Ойыннар аразында ӧткіннері меспекті хостап ойнапчатханнар. Кічіг палалар меспектең кӧмес ле поғда полғаннар, че андағ даа полза, олар аны хынып хостапчатханнар.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде