ДЕПУТАТТАР АКЦИЯ ЧИҢӀСЧІЛЕРІН ЧЕЕСТЕЕННЕР
27.06.2017
Хабарлар
Хакасияның Ӧӧркі Чӧбінің улуғ залында республика парламентінің «Единая Россия» партияның фракциязындағы депутаттары тиксі Россияда иртірілген «Хада ит саларбыс!» экология акциязының чиңісчілерін паза араласчыларын чеестееннер.
«Единая Россия» партияның «Россияның экологиязы» федеральнай проекті хоостыра чыл сай «Хада ит саларбыс!» чарыдығлығ акция иртірілче. Пістің хазнада 2017 чыл экология чылы тіп чарлал парған, аннаңар пу акцияда прай регионнар араласханнар. Хакасия ідӧк экология мероприятиелерінде ӧткін араласхан.
- Прай араласчыларға улуғ алғыс! Пістің республикаа ол уғаа танығлығ мероприятие полған, анда экология сферазындағы лидерлер табылғаннар. Пазағы чылда мындағ акцияда улам кӧп кізі аралазарына ізенчем, - теен «Россияның экологиязы» проекттің региондағы штаб устағҷызы Владимир Лушников.
Чыылығда, ідӧк алғыс сӧстерінең чоох тудып, акция араласчыларына сыйыхтар читіргеннер Хакасияның Ӧӧркі Чӧбінің кнес орынҷызы, «Единая Россия» партияның региондағы пӧлиинің хачызы Сергей Комаров, республиканың Ӧӧркі Чӧбінің комитеттер кнестері Лариса Карпова паза Владимир Нырцев.
Пiстiң республиканың ікі хызыҷаа «Эколидер» паза «Экоплакат» марығларның региондағы чардыхтарында чиңісчі полыбысханнар. Пии аймаандағы Табат аал школазының 9 класстағы ӱгренҷізі Наталья Фёдорова «Эколидер» номинацияда чиңіс тутхан. Ӱгренҷі, экологияҷа аймах мероприятиелерде аралазып, ибіркіні хайраллир сурығҷа плакаттар тарадып, паза пасха даа акциялар иртіріп, «Артек» лагерьзер путёвка утып алған. Наталья nip ле путёвка пирілчеткеніне хомзынча, ол мероприятиелерде араласхан пасха даа олғаннарнаң хада чорыхха сығарҷыхпын тіпче.
«Экоплакат» номинацияда Елизавета Серова чиңісчі полыбысхан. Ол Харатастағы школада 8 класста ӱгренче. Марығда чиңіс тутхан учун ағаа «Орлёнок» лагерьзер путёвка читірілген. Елизавета пазағы чылда пазох марығда аралазарға сағыс тутча. Номинацияда чиңіс тутхан плакатта Елизавета Серова кӱнзер холларын сунчатхан кізіні паза хойығ ыс сыхчатхан трубаларны хоостап салған.
«Экоплакат», «Эколидер», «Иң артых ӱгредіг учреждениезі» паза «Иң чахсы куратор» марығларның региондағы чардығын ирткен прай номинанттарға дипломнар паза алғыстас пічіктері читірілген. Оларның аразында полғаннар НФ.Катановтың адынаң Хакас национальнай гимназия-интернаттың ӱгретчізі Виктория Исхакова, угренҷілері Дарья Дзямка паза Валерия Шарафутдинова.
Тиксі Россияда иртірілчеткен «Хада ит саларбыс!» акция пӱӱл, мартта пасталып, майда тоозылған. Аның ӧӧн кӧстее полған производствоның артхан-халғанынаң, сӧп-сапнаң палғалыстығ сурығларны пӧгері. Проекттің араласчылары экология сурығларынаңар, сӧп-сапты алынҷа чыып, олардаң пасха наа ниме-ноолар сығарардаңар кӧп ниме піліп алғаннар. Хакасияда ідӧк лекциялар, субботниктер, акциялар кӧп иртірілген.
Автор :
Николай САЛТАРОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы