КӦПЕННЕР ААЛНЫҢ МАТЫРЛАРЫ УНДУДЫЛБААННАР
09.08.2017
Хабарлар
КИҶЕЕ БОГРАД АЙМААНДАҒЫ КӦПЕННЕР ААЛНЫҢ (ЧОХ ПОЛ ПАРҒАН ААЛ) ИЛБЕК АДА ЧАА ВЕТЕРАННАРЫНА, ТЫЛ ӀСТЕНҶӀЛЕРӀНЕ ПАЗА ЧУРТАҒҶЫЛАРЫНА ЧАРЫДЫЛҒАН ХУМАРТХЫ ТАС ПАЙРАМНЫҒ АЗЫЛҒАН.
АНДА ХАКАСИЯНЫҢ СОЦИАЛЬНАЙ АРАЧЫЛАНЫС МИНИСТРНӀҢ ОРЫНҶЫЗЫ АНДРЕЙ ШУЛБАЕВ, КУЛЬТУРА МИНИСТРНӀҢ ОРЫНҶЫЗЫНЫҢ ТОҒЫЗЫН ТОЛДЫРЧАТХАН ЛАРИСА КИШТЕЕВА, ХАКАСИЯНЫҢ ВЕТЕРАННАР ЧӦБӀ КНЕЗӀНӀҢ ОРЫНҶЫЗЫ ЮРИЙ СЕДЫХ, БОГРАД АЙМААНЫҢ ПАЗЫ СЕРГЕЙ ЧЕРНЫШОВ, ТРОИЦКАЙ ААЛНЫҢ ПАЗЫ СЕРГЕЙ ПЕТРОЧЕНКО ПАЗА КӦПЕННЕР ААЛДАҢ КӦСКЕН ЧУРТАҒҶЫЛАР АРАЛАСХАННАР.
КӦПЕННЕР ААЛ КИМНӀҢ ТУЛҒОР СУУ АЛТЫНА КӀР ПАРҒАН ААЛАРНЫҢ ПӀРСӀ ПОЛЧА. 1962 ЧЫЛДА ААЛ ЧУРТАҒҶЫЛАРЫН ХОНҶЫХ ААЛЗАР КӦЗӀРӀБӀСКЕННЕР.
Аалдаң кӧскеннернің санында - 86 частығ Мария Прокопьевна Хазова. Ол амды Боградта чуртапча.
- Кӧпеннер аалда тӧрт орама полған. Аалдаң ырах нимес арығ орныххан, хайзында ӱлӱкӱннерде прай аал чуртағҷыларынаң чыылысчаңмыс. Ол туста чон уйан даа чуртаза, уғаа ынағ полған. Аал ибіре нымырт ағастарыі ӧсчең. Кӧсчеткен туста минің ікі пала полған, - сағысха кирче тӧреен аалын ууҷа.
Кӧпеннер аал чуртағҷызы Александр Кривоногов хумартхы тасты турғызарына кӧп тоғыс ит салған кізілернің пірсі полча.
2016 чылның декабрьында хумартхы тасты турғызарына ахча чыылча тіп чарлалған. Июльға теере 80-ҷа муң салковай чыыл парған. Ахчаны Хакасияның чуртағҷылары, ідӧк Москвадаң паза Санкт-Петербургтаң ысханнар. Ағаа хоза, Хакасияның ветераннар чӧбі хумартхы тас турғызарына 50 муң салковай грант утып алған. Хумартхы тас граниттең тимнелген, аның ибіре сиден турғызылған.
- Пістің іҷе-пабаларыбыс Кӧпеннер аалының сыырадындағы сӧӧктерні алынҷа сыыратсар кӧзірібіскеннер. Пу ахчаа ол сыырагга піс ідӧк хумартхы тас турғыс салғабыс, - теен Александр Кривоногов.
- Суғ алтына кір парған ааллар чуртағҷыларның сағыстарында, чӱректерінде саңайға халған . Пӱӱн піс Хакасияның картазында хоза ызых орнын таныхтап салғабыс, андар киліп, Илбек Ада чаа ветераннарың тыл істенҷілерін паза Кӧпеннер аалның чуртағҷыларын сағысха кирербіс. Ӧбекелеріңні, кічіг чир-сууңарны ундубаңар паза аннаңар палаларыңа, пархаларыңа, кӧргенектеріңе чоохтаңар, - теен Сергей Чернышов.
Троицкай аалның пазы Сергей Петроченко прайзын хумартхы тас турғызылғанынаң алғыстаан, хазых, часка алғаан паза, пу орынзар чыл сай киліп, мындағ кӱнні таныхтирға кирек тіп чоохтаан.
Юрий Седыхтың чооғынаң, Илбек Ада чаа пасталғанда, Кӧпеннер аалда 400 азыра кізі чуртаан. Оларның 211 кізі фронтха парыбысхан. 119 кізі чаадаң айланмаан. Боград аймааның тӧрт чуртағҷызына Совет Союзының Матыры ат пирілген. Оларның пірсі Кӧпеннер аалның чуртағҷызы Алексей Сибиряков полча.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде