ТУРЫСТЫҒ ТАНЫХТИРЫНА ТИМНЕНІС
11.08.2017
Хабарлар
Пістің чонның пастағы съезді ирткеннең пеер 100 чыл толчатханын турыстығ таныхтирына тимненіс пасталғаннаңар искірілген полған. Пу наада Хакасия пазының орынҷызының тоғызын толдырчатхан Владимир Крафт ӧнетін тӧстелген оргкомитеттің теестегі чыылиин иртірген.
Пастап анда чоох тутханнар Ағбан пилтірі аймааның пазы, Чарков аал чӧбінің устағ-пастаа. Олар Чарков аалның чуртаҷылары паза ӱгренҷілері аарлығ аалҷыларны удурлирға хайди тимненчеткеннеңер, хайдағ тоғыс иділгеннеңер чоохтап пиргеннер. Анзы тиктең нимес. 24 августта наука-практикалығ улуғ конференция Ағбанда ирт парза, 25 августта аалҷылар Чарковсар, хайда хакас чонның II-ҷі съезді ирткен, парарлар. Анда олар орындағы музейнең танызарлар, Чаа таста поларлар.
Наука-практикалығ конференцияда прай 150-ҷе кізі аралазары кӧрілче. Ӧӧн докладтарны тархын наукаларының докторлары Игорь Леонидович Кызласов (Москва) паза Валентина Николаевна Тугужекова (Ағбан) идерлер. Анаң аалҷылар, ал-алынҷа секцияларға чарылып, хакастарның пастағы съездіне чарыдылған аймах-пасха сурығлар хоостыра чоох апарарлар.
Ӧнетін тӧстелген оргкомитеттің теестегі чыылии тузында Хакасияның национальнай паза территориальнай, культура, ӱгредіг паза наука министерстволарының, ХакНИИЯЛИ-ның тоғынҷылары хакастарның пастағы съезді ирткеннең 100 чыл толчатханын хайди таныхтирға тимнен салғаннарынаңар искіргеннер. Іди ХакНИИЯЛИ-ның туразының стенезінде Степан Дмитриевич Майнагашевке чарыдылған мемориальнай чарды хызыл парар. Хакасияның Улуғлар чӧбінің чарадии хоостыра С.Д.Майнагашевке «Алып» орден пирілер, ол республикадағы Л.Р.Кызласовтың адынаң чир-суғ ӱгренҷең музейде хайраллалар.
Наука-практикалығ конференцияда иділген ӧӧн докладтарны, искіріглерні піріктіріп, соонаң алынҷа чыынды сығарыбызары кӧрілче. Аны Хакасияның аал-городтарындағы библиотекаларҷа тарадарлар. Мында ӧӧн сурығларның пірсі пістің чонның II-ҷі съезді тузында постарыбысты «хакастар» аданардаңар алылған чарадығ полар. Кӧзідімге алза, Москвадаң килер ученай Игорь Леонидович Кызласов позының докладын ол сурыға чарытчатханнаңар искіртір.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы