ПАРАШЮТТЫҒ СЕГІРЕРГЕ ХОРҒЫСТЫҒ ДАА ПОЛЗА, ЧЕ ХЫНЫҒ
11.08.2017
Хабарлар
Ирткен тынағ куннерінде Ширадағы чииттер Хызылчардағы «Манский» аэродромзар парашюттығ сегірерге чӧргеннер.
Андар парарға оларға Шира аймааның пазы Сергей Зайцев хабасхан. Андағ сыйых аймахтағы мероприятиелерде ӧткін араласхан чииттерге иділген. Оларнаң хада парғаннар Ширадағы культура, чииттер политиказы, спорт паза туризм управлениезінің устағҷызы Василий Таланов паза культура управлениезінің чииттер киректерінҷе ӧӧн специализі Светлана Барахоева.
Ыраххы чорыхха Ширадаң иртенӧк сыхханнар. Хызылчарзар чол ырах, алты час парарға кирек. «Манский» аэродромда оларны инструкторлар сағааннар. Оол-хыстар ибдең алған чиистерінең кӧмес азыранарға маңнан халғаннар. Анаң инструкторлар оларны парашюттығ сегірерге тренажёрларда ӱгреткеннер. Чирзер тӱссе, азахтарын орта турғызарға, парашюттың пағларын тартарға, чилге сӧзіртірбес ӱчӱн, парашютты табырах чыырға. Пістің чииттернің кӧбізі пастағызын на сегірерге килген. Хайзылары ирткен чылларда сегіргеннер, кӧңнілеріне кіргенде, пӱӱл пазох парарға харасханнар.
Чирдең азырылып, самолёт тигірзер кӧдірілібіскен. Чир ӱстӱ шахмат чардызы осхас кӧрінген. Ибіре ағас одыртылған чазылар квадраттар чіли кӧрінгеннер.
Самолёт чоғар 900 метрге кӧдірілгенде, чииттер соон сӱрістіре тӧртер кізідең парашюттығ сегіргеннер. Соонаң чоохтааннар, самолёттаң сығара сегіргенде, хайди чил оларны нинҷе-нинҷе хати тоғылахтандырғанын. Самолёт ӱстӱнде кӧрін халғанда, матап хорых сыхханнар. Иң улуғ сағыс: тіріг ле халарға! Анаң кинетін парашюттары азылғанда, пір ле орында турыбысхан осхастар. Чир оларға чағыннаң чағын чылған чіли пілдірген. Чирзер тӱскенде, хайзылары, парашютты пағларнаң чаба тартарға маңнанмаанда, чилге хаптырып, сӧзіртіргеннер. Че прайзы хазых-тіріг айланған. Парашюттарын тудына, базазар килгеннер, анда от салып, чей хайнадыбысханнар, чиистерін сығарып, азыранғаннар. Хонғаннар вагоныҷахта. Иртен, азыранып ла алғанда, ибзер чӧрібіскеннер.
Соонаң хайзы-да теен: «Самолёттаң сегіргенде, чуртастағы тігі-пу сидіксініс тее чох осхас пілдірген. Ах чарыхты кӧріп, чуртапчатханыбыс ӱчӱн чир-чайааныбысха алғызыбыс читірерге кирек».
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы