«МИНІҢ ТӦРЕЕН ТІЛІМ»
15.08.2017
Хабарлар
Хакасияның национальнай паза территориальнай политика министерствозы, Хызылчар крайы губернаторының халыхтар палғалызының устағ-пастаа «Минің тӧреен тілім» чайаачылар мариина хығырчалар. Ол марығ хакас халых-чарыдығлығ тоғынҷызы Кирилл Семёнович Тодышевтің 125 чазына чарыдылча.
Марығның ӧӧн пӧгіні - пос тілін ӱгренер оңдайларны тілирге, постың чир-суун пілерге, аның тархынын паза кибірлерін істезерге, Хакасияның паза Хызылчар крайының аразында палғалыстарын тыыдарға. Марығда 14 частаң сығара улуғ кізілерге аралазарға чарир.
Марығ араласчылары орыс паза хакас тілінең пазылған чайаачы тоғыстарын (чоохтар, кибелістер, эссе, сочинение паза аннаң даа пасха тоғыстар) марыға сығарчалар. Олар мындағ номинацияларға чарылчалар: «Хакасияның халых тоғынҷызы, ӱгретчі К.С.Тодышевтің 125 чазына чарыдылған чайаачы тоғыстар»; «Хакас чонның пастағы съездтері полғанынаң пеер 100 чыл толчатханына чарыдылған чайаачы тоғыстар»; «Минің тӧреен тілім» темаа чарыдылған чайаачы тоғыстар».
Марыға мындағ темаларға чарыдылған литература тоғыстары алылчалар:
«К.С.Тодышевтің чуртазы паза iстенiс чолы», «Кирилл Семёнович Тодышев - халых-чарыдығлығ тоғынҷы паза ӱгретчі», «Хакас чонның пастағы съездтерінің 100 чылына: эпоха, кізілер, хабарлар», «Хакас чонның пастағы съездтері хакас чонның посты улуғлирына теелгені», «Минің чӱреемде чир-суумның ӱні истілче...», «Пурунғы тӱрк пічиинің хумартхылары», «Орхон-Ким пічіктің хумартхыларын істескеннің тархынынаңар», «Пос тілі - чонның худы», «Хакастарның пічии тӧстелгеннеңер». Марығ араласчыларына ӱстӱнде чоохталған номинацияларға килістіре пасха даа темаларҷа чайаачы тоғыстар пас саларға чарир.
Чайаачы тоғыстар пӱӱл 15 сентябрьға теере Хакасияның национальнай паза территориальнай министерствозында пу адресче алылчалар: 655019, Ағбан город, Щетинкин ор., 18 № тура, 503 № кабинет, палғалысчаң телефон: (3902) 239-004.
Автор :
Хакасияның национальнай паза территориальнай политика министерствозы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде