ЧӰРЕК ХАҶАН ДАА КИРІБИНЧЕ
16.08.2017
Хабарлар
Хайди искірче Хакасияның спорт министерствозы, Физкультурник кӱні таныхталчатханда, Саяногорскта спорт ветераннарының чайғыдағы III-ҷі спартакиадазы ирткен. Чӱректері кирібинчеткен физкультура паза спорт ветераннары Хакасияның прай даа пулуңнарынаң чыылысханнар.
Тиң частығларнаң марығлазарға, спорттың ол алай пу кӧрімінде постарының тимненістерін сыныхтирға 300 артиинаң кізі килгені таныхталған. Олар республиканың 12 аймах муниципальнай пӱдістері ӱчӱн турысханнар, тоғазығлар тузында чиңіс тударға прай кӱстерін салғаннар.
Физкультурник кӱнінең алғыстап, спорт ветераннарының алнында чоох тутхан Хакасияның спорт министрі Сергей Головкин. Саяногорсктағы «РУСАЛ» спорткомплекссер чыылысхан чонның алнынзар сығып, Сергей Николаевич спортнаң айғазарға пик сындырлығ, алныларында турчатхан пӧгіннерні толдырчатхан, сидіктердең хорыхпинчатхан кізілер ле тартылчалар теен. Анаң кӧзідімге спорт ветераннарының чайғыдағы спартакиадазында араласчатханнарны ағылған паза Физкультурник кӱнінең прайзын чылығ алғыстаан.
Марығны пайрам кибірли азарында араласчатхан аарлығ аалҷылар санында полған Хакасияның спорт министрі полып 8 чыл тоғынған, амды Хакасия пазының администрация устағҷызы Валерий Денщиков. Мындағ танығлығ кӱнде Валерий Васильевич спорт ветераннарын хайди ӱлӱкӱннең алғыстабас.
Марығлар пасталыбысханнар. Спорт ветераннарының чайғыдағы спартакиадазы 7 аймах кӧрімҷе ирткен: гиря хабары, мирке тастиры, волейбол, ниик атлетика, шахмат, мини-футбол паза теннис.
Марығ салтарлары хоостыра городтар аразында Ағбан чиңіс тутханы чарлалған. Марығ ээлері - ікінҷі орындалар. Харатас ӱзінҷі орында пол парған.
Асхыс аймааның командазы пасхаларына пастағы орынға сығып алар ізеніс артыспаан. Шира аймаа - ікінҷі орында. Таштыптағылар ӱзінҷі орында пол парғаннар.
Автор :
Тимнеен Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы