ХАКАСИЯНЫҢ ХАРАТАСЧЫЛАРЫНА - УЛУҒ ӰЛӰКӰН
29.08.2017
Хабарлар
Ирткен неделяда Хакасияда Харатасчы кӱні алғым таныхталған. Аны харатасчылар тӧрт кӱн ӱлӱкӱннееннер. Пайрамның ӧӧн чардығы ирт парғанда, 27 августта, позырахта, Ағбанның «Саяны» спорткомплексінде Харатасчы кӱнінің 70 чылына чарыдылған улуғ гала-концерт ирткен. Аны Аршандағы разрез Хакасия правительствозының хабазиинаң иртірген.
Республиканың харатасчыларын паза оларның туған-чағыннарын алғыстирға 20-ҷе Россия артизі килген. Чииттер ӧӧнінде Дима Билан, «Фабрика», «HI-FI» группаларға матап ӧрінгенге тӧӧй полған, улуғларға, тізең, Лариса Долинаны, Татьяна Овсиенконы, Наталья Гулькинаны, «Белорусские песняры» группаны истіп аларға чапсых полған.
Россия артисттері Хакасиязар субботада самолеттығ ӧнетін рейснең читкеннер. Артисттернең хада кӧгҷілер паза теелбекчілер - тиксі 150-ҷе кізі - килгеннер. Концерт алнында артисттерге Ағбанҷа улуғ нимес экскурсия иртірілген. Кӧзідімге, олар, Л.Р.Кызласовтың адынаң чир-суғ ӱгренҷең музейде пол киліп, ағаа матап хайхаан осхастар, аннаңар сценадаң искірген Влад Топалов.
Харатасчы кӱніне артисттер кӧп килчеткенде, тӧстегҷілер оларны удурлирға азынада матап тимненгеннер. Стадионның трибуналарында одырчатхан чонға сцена маңат кӧрінер ӱчӱн, сцена хыринда ӱс улуғ экран турғызылған. Ідӧк тӧстегҷілер стадионзар кір полбаан чуртағҷылардаңар ундутпааннар. Стадион тастында ідӧк улуғ экран турғызылған. Аның сылтаанда, олаңай даа кізілерге концертті кӧріп паза истіп аларға оңдай полған. Улуғ экраннарны тӧстегҷілер хонҷых регионнардаң ағылғаннар.
Концертті кӧріп алар ӱчӱн, тӧстегҷілер харатасчыларға паза оларның сӧбірелеріне, халых тоғыстарнаң айғасчатханнарға хығыртығ читіргеннер. Стадионзар 6-7 муңҷа кізі чыылған полар. Кӧрігҷілернің аразында Владимир Виноградов полған. Ирен Москвадаң Хакасиязар августтың пастағы кӱннерінде тоғыс хоостыра килген.
- Хайдағ хайхастығ кирек, Москвада чуртап, Россияның артисттерінің концертiне чӧрерге пір дее оңдай чох полған. Билет паазы уғаа аарлығ нооза. Хакасиязар киліп, тізең, пір иирге ле нинҷе-нинҷе артистті кӧріп алдым паза сарнапчатханын тіріге истім. Хакасиязар мындағ артисттер удаа килче полҷаңнар ба?! -хайхапча Владимир.
Сынап таа, пістің республиказар Россия артисттері халғанҷы 4-5 чыл удаа кил парчалар: ӱгренҷілернің выпускной иирлеріне, Республика кӱніне, Город кӱніне. Че пір саңай 20-ҷе артист пістің республикада хаҷан даа полбаан полар. Мындағ ӱлӱкӱн - пастағызын на! Хайди айланызында таныхтаан Хакасия пазы Виктор Зимин, харатасчылар паза республиканың правительствозы Харатасчы кӱнін мындағ оңдайнаң чыл сай таныхтирға пӧгінче. Ол фестиваль оң-дайынаң иртер одыр. Ідӧк Виктор Михайлович^ чарадиинаң Хакасияда харатас-чыларның чемпионады ирт турар, хайда иң артых тоғынҷыны таап турарлар.
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы