ӰН ПИРІСТІҢ АЗЫНАДА САЛТАРЛАРЫ ИСКІРІЛГЕН
12.09.2017
Хабарлар
Ирткен позырахта, 10 сентябрьда, тиксі Россияда аймах синніг табығлар ирткен. Хакасияда орындағы пос устаныс синінде 26 табығ кампаниязы иртірілген. Пірге ӱн пирҷең кӱнде республика чуртағҷылары 13 муниципальнай пӱдістің пазын паза 215 депутатты тапханнар.
Киҷее Хакасияның Табығ комиссиязының кнезі Александр Чуманин хабарҷыларнаң тоғазығда ирткен табығларның азынада салтарларынаңар искір пирген. Пресс-конференцияда ідӧк Хакасияның кізі праволарынҷа уполномоченнайы Александр Чистотин паза республика прокуратуразының федеральнай законодательство толдырылчатханын сыныхтирынҷа пӧлиинің пастығы Олег Загрядский араласханнар.
Хайди таныхтаан Хакасияның Табығ комиссиязының кнезі Александр Чуманин, пу табығлар табығҷылар ӧткін нимес араласханынаң пасхалалча. Тиксі Хакасияны алза, табығ участоктарынзар табығҷыларның 25,46 %-і ле килтір. Чуманин тиңнестіріге 2012 чылдағы табығларны ағылған, андада табығҷыларның 65 %-і ӱн пирісте араластыр. Итсе, ол чылда Россия президентіне табығлар ирткен, аннаңар кізілер іди ӧткін ӱннерін пирген поларлар тіп хосхан ол.
Ноға табығҷылар ӱн пирісте піди уйан араласханнар? Табығ комиссиязы кнезінің кӧрізінең, анзы кандидаттар паза партиялар агитацияларын ӧткін апарбааннарынаң палғалыстығ. Пірее кандидаттарның фондта агитация апарарына пір ахча даа кӧрілбиндір, хайзылары, тізең, кандидат полчатханынаңар постың удостоверениезін алып аларға даа килбиндір. Олох туста табығҷыларның араласханы тӧбін полған ӱчӱн нандырығны Табығ комиссиязы позынаң суурбинча тіп таныхталған.
Че пасха саринаң кӧрзе, хайда муниципальнай пӱдістернің пастарын тапханнар, анда табығҷылар саны ас нимезӧк. Іди иң не ӧткін табығҷылар Асхыс аймаандағы Паза аалларында полтыр, табығҷыларның 59,38 %-і араластыр. Анда Паза аал чӧбінің пазын тапханнар нооза. Ікінҷі орында Таштып аймаа -44,69 %, анда Таштып аймаа пазын тапханнар. Анаң парчалар: Шира аймаа - 40,42 %, Алтай аймаа - 39,98 %, Абаза - 39,33 %. Оларда ідӧк аймах паза город пастарын тапханнар. Табығҷыларның араласханы иң тӧбін Харатаста полтыр - 12,02 %, анда город чӧбінің депутаттарын тапханнар.
Табығларның салтарларын алза, Абаза городтың пазына табығларда «Единая Россия» партияның кандидады Валентина Филимонова ізестіг чиңіс туттыр. Табығҷыларның 81,71 %-і ағаа ӱнін пиртір. Алтай аймаа пазына табығларда ідӧк «Единая Россия» партия сығарған кізі Татьяна Раменская (60,41 %) утып алтыр. Таштып аймаа пазына табығларда кинетін пос позын сығарған кандидат Алексей Дьяченко (36,01 %) чиңіп алған. «Единая Россияның» кандидады полған Вера Сазанакова (26,65 %) ікінҷі орында хала парған. Мында таныхтирға кирек, Таштып аймаа пазына табығларға ноға-да кӧп хакас кандидат сыххан - 8 кандидаттаң 4-і хакас. Салтарында ӱннер чара тартылған, аннаңар Вера Сазанакова чиңіс тут полбаан, арса. Шира аймаа пазына хатабох Сергей Зайцев (44,02 %) табылған. Ол ідӧк «Единая Россияның» кандидады полча.
Аал чӧптерінің пастарына табығларда чиңіс тутханнар:
Хубачар аал чӧбі - Александр Мин Те Хо (36,81 %)
Хызыл чазы аал чӧбі - Олег Султреков (73,49 %)
Паза аал чӧбі - Светлана Майнагашева (47,12 %)
Кирбі аал чӧбі - Лариса Киреева (64,80 %)
Улуғ Сии аал чӧбі - Тамара Сазанакова (52,14 %)
Томыҷахтар аал чӧбі - Марина Ощенкова (43,08 %)
Солнечнай аал чӧбі - Николай Сергеев (53,99 %)
Весенненскай аал чӧбі - Владимир Иванов (62,41 %)
Палты кӧл аал чӧбі - Светлана Вашкевич (62,91 %)
Ідӧк 10 сентябрьда 11 муниципальнай пӱдісте город-аймахтарның паза аалларның депутаттар чӧптерінзер табығлар ирткен. Таныхтирға кирек, Хакасиядағы табығларда 6 партияның региондағы пӧліктері араласхан: «ЛДПР», «ЕДИНАЯ РОССИЯ», «КПРФ», «КОММУНИСТЫ РОССИИ», «СПРАВЕДЛИВАЯ РОССИЯ» паза «ПАРТИЯ РОСТА». Табығлар аймастырылған оңдайнаң ирткеннер, депутаттарның чарымын пір мандаттығ кандидаттар санынаң тапханнар, пасха чарымын - партияларның списоктарынҷа. Салтарында партияларның депутаттар чӧптерінзер чиңіс тутхан кандидаттарның саны мындағ: «Единая Россия» - 142, «КПРФ» - 21, «Коммунисты России» - 4, «ЛДПР» - 9, «Справедливая Россия» - 5. Пос позын сығарып, депутат полыбысханнарның саны - 33.
Хакасияның кізі праволарынҷа уполномоченнайы Александр Чистотин паза республика прокуратуразының кізізі Олег Загрядский табығлар тузындағы айланыстардаңар паза сайбағлардаңар чоохтап пиргеннер. Оларның саны тың кӧп полбиндыр, прай хоптар сыныхталтыр, табылған сайбағлар тӱзеділтір.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы