ХАРАХХА КӦРІНМЕС «ЫЫРЧЫЛАРДАҢ» ТОҒЫР ХАРБАЗЫҒДА
15.09.2017
Хабарлар
Пӱӱл 15 сентябрьда Ширадағы санитарно-эпидемиологическай службаа 95 чыл толча. Ол тустаң сығара амға читіре Ширада санитарно-эпидемиологическай станция хорғыстығ ағырығлардаң тоғыр тоғысты апарча.
Амғы туста ол служба ікі пӧлікке чарыл парған. Пірсі Роспотребнадзорның Хакасияҷа управлениезінің Шира паза Орджоникидзе аймахтардағы территориальнай пӧлии полча. Ӏкiнҷнiң службазы - Хакасиядағы гигиена паза эпидемиология кінінің Шира аймаандағы филиалы.
Роспотребнадзор управлениезі пӧлиинең 35 чыл устапча ӧӧн имҷі Валерий Мирошниченко. Ол Кемеровтағы имнег институдын тоосхан соонаң пеер істенерге килген. Пу чирде, уйаланып, чуртын салған.
Андағ имҷілер анда илееде. Прай 18 имҷі істенче. Оларның санында 41 чыл істен салған Татьяна Ветлужских. Ол микробиология лабораториязында лаборант полып істенче. Раиса Васильевна Радкова, эпидемиолог имҷінің полысчызы полып, 45 чыл тоғын салған. Любовь Шадрина, 1980 чылда ӱгредиин тоозып, пеер киліп, 37 чыл имҷі-бактериолог полча. Паза пасха даа имҷілер мында илееде чыл істен парирлар, оларның аразында имҷі-эпидемиологтар Александра Янгулова, Ирина Гнётова.
Гигиена паза эпидемиология кінінің филиалынаң устапча чиит имҷі Сергей Мирошниченко. Ол, Кемеровтағы институтты тоозып, пу тоғыста 5 чыл азыра істен салған. Пу филиалның иң сидік сурии - кирек специальностьтығ имҷілер чидіспинчеткені.
- Мындағ тоғыстарға ӧнетін ӱгренген специалисттер чидіспинче. Че андағ даа полза, пір чиит имҷі пеер килген. Ол Кемеровтағы имнег академиязын тоосхан имҷі-бактериолог Ксения Конышева полча, - тіпче Сергей Валерьевич. - Піс чуртағҷылар аразында кинетін сығыс килген чуғынҷах ағырығларны істесчебіс. Олар хайдаң сығыс килгенін пілерге харасчабыс. Ағырығлар чуғарынаң хорғыстығ объекттерні чыл ибіре нинҷе-нинҷе хатап сыныхтапчабыс. Пӱӱл чайғыда Ширада кізілер ағырыбысханда, Ширадағы санитарнай имҷілернің ӧмезі піс, сыныхтағ иртіріп, сальмонеллёз ағырығны ілезіне сығарғабыс, анаң чиисті чахсы тимнебинчеткен учреждениенің тоғызын закон хоостыра 30 кӱнге тохтатхабыс. Іди ікі служба, пірге істеніп, пістің хазиибыс пик полар ӱчӱн, хараа-кӱнӧрте харахха кӧрінмес «ыырҷыларнаң» харбасчалар. Оларны ӱлӱкӱннең алғыстапчабыс.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы