ХАКАСИЯ ДЕПУТАТТАРЫ ХАЗНА ДУМАЗЫНЗАР ПАСТАҒНАҢ СЫҒАРЛАР
22.09.2017
Хабарлар
ХАКАСИЯНЫҢ ӦӦРКІ ЧӦП ДЕПУТАТТАРЫ 20 СЕНТЯБРЬДА ПАРЛАМЕНТ КАНИКУЛЛАРЫ СООНДАҒЫ ПАСТАҒЫ СЕССИЯА ЧЫЫЛЫСХАННАР. КӰН СУРИИНДА 20 АРТИИНАҢ СУРЫҒ ТУРҒАН, ОЛАРНЫҢ ЧАРДЫҒЫ ӦӦРКІ ЧӦП КАДРЛАРЫНӋА АЛЫЗЫҒЛАРНАҢ ПАЛҒАЛЫСТЫҒ ПОЛҒАН. ПАСХА СУРЫҒЛАРЫ РЕСПУБЛИКАНЫҢ ЗАКОН ПРОЕКТТЕРІ ПОЛҒАН, ОЛАР ПРАЙЗЫ ДАА ТОҒЫНЧАТХАН ЗАКОННАРЗАР АЛЫЗЫҒЛАР КИРЕРІНЕҢ ПАЛҒАЛЫСТЫҒ ПОЛҒАННАР. ІДӦК ДЕПУТАТТАР ХАКАСИЯ КИРЕКСІНІСТЕРІН АРАЧЫЛИР ПӦГІННЕҢ РОССИЯНЫҢ НАЛОГ КОДЕКСІНЗЕР АЛЫЗЫҒЛАР КИРЕРДЕҢЕР ФЕДЕРАЛЬНАЙ ЗАКОН ПРОЕКТІН ТИМНИР СУРЫҒНЫ КӦРІБІСКЕННЕР. АНДАҒ ПАСТАҒНАҢ ХАЗНА ДУМАЗЫНЗАР СЫҒАРҒА ЧӦПНЕҢ ХАКАСИЯНЫҢ ПАЗЫ АЙЛАНҒАН. СЕССИЯ ТОҒЫЗЫ СООНЗАР ДЕПУТАТТАР РЕСПУБЛИКАДА ХЫСХЫДАҒЫ ЧЫЛЫҒ ПИРӋЕҢ ТУСХА ТИМНЕНІС ХАЙДАҒ СИНДЕ ПОЛҒАНЫНАҢАР ИСКІРІГНІ ИСТІП АЛҒАННАР.
ӦӦРКІ ЧӦП КНЕЗІ ВЛАДИМИР ШТЫГАШЕВ СЕССИЯНЫҢ ТОҒЫЗЫН КАДРЛАР СУРЫҒЛАРЫНАҢ ПАСТААН. ІДИ ДЕПУТАТТАР ПАСТАҒЫ СУРЫҒНАҢ ӦӦРКІ ЧӦП ДЕПУТАДЫ ПОЛҒАН ДМИТРИЙ КРЕЙНИСТІҢ, ОЛ ӰРЕЕНІ ХООСТЫРА, ПОЛНОМОЧИЕЛЕРІН АЗЫНАДА ТОХТАДАРДАҢАР ЧАРАДЫҒ АЛҒАННАР. АНАҢ АНАТОЛИЙ ИЛЬИНЫХХА ӦӦРКІ ЧӦП ДЕПУТАДЫНЫҢ ПОЛНОМОЧИЕЛЕРІН ПИРЕРІНЕҢ ЧАРАСХАННАР.
Аны Ӧӧркі Чӧптегі ЛДПР фракция Хакасияның пӱдіріг паза ЖКХ министріне турғызылчатханы хоостыра депутат тоғызынаң парыбысхан Валерий Келиннің (ЛДПР-ныңох кізізі) орнына турғысхан. Анатолий Ильиных Ӧӧркі Чӧптің Конституция законодательствозынӌа, хазна пӱдіриинӌе паза правопорядокча комитедінде тоғынар.
Ідӧк депутаттар Николай Михеевті Ӧӧркі Чӧптің мандат паза депутат этиказы сурығларынӌа комиссиязының кнезінең суурарынаң тоғыр полбааннар. Михеевті ирткен сессиядох министр поларға парыбысхан Владимир Костюштың орнына Ӧӧркі Чӧптің хазых хайраллирынӌа паза социальнай политикаӌа комитедінің кнезіне турғызарға чарат салғаннар.
Теестегі сурығ мандат паза депутат этиказы сурығларынӌа комиссияның кнезін табардаңар полған, ол устағӌы орны пос полған нооза. Ӧӧркі Чӧптегі «Единая Россия» фракция кнеске депутат Виктор Лебедевтің кандидатуразын сығарған, «Коммунисты России» - Денис Бразаускастың. Ӱн пирістің салтарларынӌа комиссия кнезіне «Хакасия» газетаның ӧӧн редактор орынӌызы, читінӌі чылы Ӧӧркі Чӧп депутады полчатхан Виктор Лебедев табылған.
Мының соонаң Ӧӧркі Чӧп республиканың закон проекттерін кӧріп пастаан. Ӧӧннернің пірсі «Транспорт налогынаңар» паза «Организацияларның ис-пайына налогтаңар» республика законнарынзар алызығлар кирердеңер закон проекті полған, аны Хакасияның Правительствозы тимнеен.
Республиканың финанстар министрі Ирина Войнова ол сурығнаң таныстырчатхан туста Ӧӧркі Чӧп депутаттарына республиканың тиксі ахча киреенеңер улуғ нимес искіріг иткен - Хакасияа федеральнай бюджеттең 1 миллиард 200 миллион артиинаң салковай пирілче. Ахча регионзар пу чағында чидер осхас.
- Ол ахча иң пурнада социальнай кӧстеглерге парар: чал ахчазына, социальнай тӧлеглерге, льготалығ имнерні аларына паза муниципальнай пӱдістерге ахчалығ полызығ пиреріне, - таныхтаан финанстар министрі. Ағаа хоза, Москва соонаң 4,7 миллиард салковайға бюджет кредидін пирер тігі сахталча. Анзы республиканың хазна алымын кӧместең хызырарға хабазар тіп искірген Ирина Войнова.
Транспорт паза организацияларның ис-пайына налогтарнаң палғалыстығ законнарзар алызығлар, тізең, Россияның минфинінең чӧптезілген план хоостыра кирілчелер. Федеральнай министерство республиканы хорадығларны хызырарға паза пос парыстарын ӧскірерге хысча. Аннаңар ол кирексіністерні толдырарға киректелче тіп чарытхан регионның финанстар министрі. Пастағы алызығлар транспорт налогын ӧскірерінең палғалыстығ. Озіс двигательіндегі ат кӱзі 250-дең асчатхан ниик автомобильлерге паза таарлағ тартчатхан машиналарға теелер тіп таныхтаан Войнова. Андағ ниик автомобильлернің налог ставказын амғы 100 салковайдаң (пір ат кӱзі ӱчӱн) 104 салковайға ӧскірері кӧрілче, таарлағ машиналарының - 80 салковайдаң 85 салковайға. Министр ідӧк пасха регионнарны тиңнестіріге ағылған. Хызылчар крайында андағ ниик автомобильлернің налог ставказы 102 салковай полча, Кемеров облазында - 135 салковай, Тува Республикада - 98 салковай, Алтай Республикада - 120 салковай. Таарлағ машиналарының налог ставказы Хызылчар крайында - 85 салковай, Кемеров облазында - ідӧк 85 салковай, Тувада - 62 салковай, Алтай Республикада - 40 салковай.
Ікінчі алызығлар организацияларның ис-пайына налог ахчазына теелген. Хайди чарытхан республиканың финанстар министрі, мында чоох парча хайзы льготаларны чох идердеңер. Кирілчеткен алызығларча лизингнең айғасчатхан паза машина оборудованиезін сығарчатхан организацияларның льготалары чох иділче. Андағларның саны республикада тӧрт ле полтыр, олар тиксі льготалар полызиинаң 280 муң салковай ӱзӱрлепчеттірлер.
Транспорт налогын ӧскірерінче сурығлар чох полған полза, ікінчі алызығлары хоостыра хайзы депутаттар тоғыр пол сыхханнар. Сурығ ӧӧнінде машина оборудованиезін сығарчатхан заводха теелген, чоох парча Ағбандағы опытно-механическай заводтаңар. Андағ завод пістің республикада чалғыс ла тіп таныхтаан Оӧркі Чӧп депутады Геннадий Цыпышев. Аның кӧрізінең, лизингнең айғасчатханнарның льготаларын чох идерге чарир даа, че машина оборудованиезін сығарчатхан предприятиее льготаларны артыс саларға кирек. Салтарында депутаттарның ӱн пирізі хоостыра налогтарнаң палғалыстығ закон проекті алылбин халған. Че аны октябрьдағы сессияа хати сығарарлар тіп кӧрілче.
Паза хайығ тартхан сурығларның пірсі Асхыс аймааның депутаттар чӧбі тимнеен закон проекті полған. Ағаснаң тузаланчаң оңдайдаңар алызығлар кирер закон проектінең Асхыс аймааның депутаттар чӧбінің кнезі Владимир Зимин таныстырған. Хайди ол таныхтаан, мында чоох парча одыңны тикке тимнир праволығ чуртағчыларның санын алғыдыбызардаңар. Пӱӱнгі кӱнде пос чуртында чуртапчатханнар ла андағ праволығ полчалар, муниципальнай чуртта чуртапчатханнарның, тізең, андағ правозы чоғыл. Хакасияның Оӧркі Чӧп кнезі Владимир Штыгашев, асхыстағыларның закон проектіне хабазып, аның тузазын таныхтаан.
- Пу закон проекті республиканың кӧбізі аймахтарына теелче. Аалдағыларның прайзы даа песті одынарында ағаснаң тузаланчалар нооза. Хомзынысха, олар прайзы ла пос чуртының ээзі полбинчалар. Закон чурт ээзі полчатханнарға ла теелчеткені саба, аны тӱзедерге кирек, - теен ол.
Депутаттар анзынаң тоғыр полбааннар, закон пӱкӱлее пастағы паза ікінчі хығырығда алыл парған. Халғанчы сурығлар санында Хакасия пазының чӧбі ӱзӱрілген. Анда республика пазы, Оӧркі Чӧпсер Россияның налог кодексінзер алызығлар кирердеңер федеральнай закон проектін тимнеп, аны Хазна Думазынзар кирерге чӧпнең айланча. Пу сурығча Хакасияның финанстар министрі Ирина Войнова чоох тутхан. Хайди ол чарытхан, 2014 чылда Хакасия Россия субъекттері санына кіріп алған, хайзыларының чирінде наа производстволар тӧстир, пар полғаннарның тилізін айныдар пӧгіннең льготалар пирчең оңдай азылған. Хайзы инвестиция проекттеріне льготалар пирерін, тізең, регионнарның ӱлгӱлері постары кӧрчеңнер. Че 2016 чылда федеральнай закон алыс парған, салтарында прай регионнар андағ льготалар пирер оңдайлығ пол парғаннар. Ағаа хоза, льгота ал полчатханнарның санына кірчең оңдайлар нииктел парған - амды региондағы ӱлгӱлернің чарадии киректелбинче. Іди чир алтындағы ис-пайны аныпчатханнар проектке кирексіністе кӧзіділген иң асхынах ахча синін (50 миллион салковай ӱс чыл аразына) хорат салзалар, оларның парысха налогча паза чир алтындағы ис-пайны анир налогча льготалар алып алар оңдайы пар. Андада республика бюджеді кӧп ахча чідір сығар. Пу чылда ла бюджет парыстары 699 миллионча салковайға хызырыл парарға айабас. Тиксі льгота пирчең тус (10 чыл) аразына, тізең, 4 миллиард 194 миллион салковайға.
Аннаңар Хакасияның пазы Виктор Зимин чӧп кирген - Хакасияны субъекттер санынаң сығарыбызарға, хайзыларының чирінде инвестиция проектін чуртасха кирчетсе, пірігісті региондағы инвестиция проекттерінің араласчылары санына кирері киректелбинче. Анзы республикаа, кемге льгота пирерін кӧріп, экономика кирексіністерін пӧгерге оңдай пирер. Депутаттар, ол кӧріснең чаразып, Хакасия кирексіністерін арачылир ӱчӱн, Хазна Думазынзар пастағнаң сығарға чарат салғаннар. Республика сығарған закон проекті Хазна Думазында чапчаң кӧріл парар тіп сахталча, ол федеральнай бюджеттең ахча кирексібинчеткеннеңер.
Сессияның тоғызы республикада чылығ пирчең тусха тимненіс хайдағ синдезінеңер искірігнең тоозылған. Депутаттар, сессия пасталчатхандох, кӱн суриинзар хоза сурығ киріп, республика правительствозын ол тоғыснаң таныстырарға сурынғаннар. Хакасияның пӱдіріг паза ЖКХ министрінің тоғызын толдырчатхан Валерий Келиннің искіриинең, республикадағы ЖКХ предприятиелерінің тиксі тимненізі 98 %-ке тиңнелче. Олох туста хайзы муниципальнай пӱдістерде сидіксіністер пары таныхталған. Министр кӧзідімге Шира аймаандағы Коммунар, Жемчужный паза Колодезный поселоктарны ағылған, оларда тимненіс тӧбін синде осхас. Котельнайларда хара тас тимнелгені пӱкӱлее кӧрілген нормадаң 87 %-і полча тіп таныхтаан Келин. Че хара тас тимнелгені тиңни нимес: хайзы муниципальнай пӱдістерде ол читкіче, хайзыларында - най асхынах.
Оӧркі Чӧп кнезі Владимир Штыгашев чылығны тузында пир турарына хайығ айландырған.
- Піс ноға-да чылығны пирерінче тӧреміл 2 - 3 кӱнге орайлат салчабыс, салтарында кӧп кізі ағырыбысча. Іди полбасха кирек, - таныхтаан парламент устағчызы, сессияның тоғызын тоозып.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде