ЧӰРЕКСІНІСТІГ ПӦГІН ТОЛДЫРЫЛҒАН
26.09.2017
Хабарлар
Хакасияның пазы Виктор Зимин ирткен неделяда , «Республика» полызығлығ чыындының устағҷызы, кизек чаалазығлар ветераны Александр Векшиннең паза Надежда Узунованаң тоғасхан. Олар, делегацияда полып, «Справедливая помощь Доктора Лизы» чыыңдынаң хада Донбасстаң палығлатхан паза аар ағырчатхан палаларны Россиязар ағылғаннар.
Ол чорыхтың салтарларынаңар Хакасияның пазына Александр Векшин чоохтап пирген.
- Донецкай республикаа Ростовтаң сығара чидіп аларға оой нимес полған, че анда пістің полызиибысты сағааннар. Ӧме тохтағлар чох, табырах парған, хайдағ даа туста снайперге атырт сығарға айабас полған нооза. Пістің чорыхтың ӧӧн пӧгіні аар ағырчатхан палаларны андартын сығарары полған, оларны Москваның паза Санкт-Петербургтың имнег тураларынзар имненерге ызыбызар учӱн. Имнег кирексіпчеткен пала кӧп полған, - таныхтаан Александр Векшин.
Хакасияның делегациязы пастап 9-10 паланы ағыларға пӧгінген, че салтарында 21 паланы ағыл килген. Олғаннарны имниріне «Республика» чыындының кӧстегліг ахчазы ызылған, ол ахчаны чыырында Хакасияның чуртағҷылары араласханнар.
- Чӱрексіністіг паза олох туста хорғыстығ пӧгін толдырылған. Сірер пістің славян харындастарның прай сидіксіністерін поста сынаазар. Улуғ алғыс сірерге аның ӱчӱн, сірер айдассар, - теен Виктор Зимин.
Донецктегі кузнец Виктор Михалёвтың адынаң Хакасияның пазына олаңай нимес сыйых читір пиргеннер - гильзадаң иділген роза чахайахты. Ирен пос туста снарядтар осколоктарынаң скульптуралар чайапча, оларны Донбасстағы чуртастың таниина санап.
- Донецкті розалар городы тіпчелер. Че ол пазындырбин, бомбалар тӱсчеткеніне хайбин кізілер кӱннің сай чахайахтар одыртчалар. Кузнецтің Хакасия чуртағҷыларына паза пip сыйии республиказар сала соонаң чидер. Пар сағыс ол ӱс кізінің тоғыстарын пісте кӧзідіге сығарарға, - чоохтапча Надежда Узунова.
Хакасияның пазы Донбассар полызығлығ чорыхнаң чӧрген прай араласчыларға алғызын читірген. Полызығлығ тоғыс узарадылар тіп таныхтаан ол. Пазағы чайғызын Хакасияның курорттарында психология саринаң палығлатхан Украина палалары реабилитация иртерлер тіп пӧгінілче.
- Имнирге кирек ағырығларны ла нимес. Кізінің худы-чанын даа имнирге чарир. Ол палалар -Донбасстың на нимес, ідӧк Россияның таңдағызы, - таныхтаан Хакасияның пазы.
Донбассар чӧрген делегацияда «Республика» чыындының устағҷызы, кизек чаалазығлар ветераны, Хакасияның Ӧӧркі Чӧбінің депутады Александр Векшин, проекттің авторы Надежда Узунова, «Хакасия» ИА-ның хабарҷызы Андрей Лямков, РТС-тың видеооператоры Василий Кузьмин паза ӱдесчең кізі, кизек чаалазығлар араласчызы Сергей Медюк полғаннар.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде