ПЕРИНАТАЛЬНАЙ КІНДЕ - ПАСТАҒЫ ЫҢААҶАХТАР
27.09.2017
Хабарлар
ИРТКЕН ПЯТНИЦАНЫҢ НАҢМЫРЛЫҒ КӰНІ РЕСПУБЛИКАНЫҢ ПЕРИНАТАЛЬНАЙ КІНІНЕ ПІР ДЕЕ САРИНАҢ ТЕЕЛБЕЕН. МЫНДА ТАНЫҒЛЫҒ КӰН. НАА ИМНЕГ ТУРАЗЫ ПАСТАҒЫ ТӦРЕЕН ЫҢААҶАХТАРЫН ӰДЕСЧЕ. ОЛ ПРАЙ ХАКАСИЯА УЛУҒ КӰН, АННАҢАР ТУҒАН-ЧАҒЫННАРЫНЫҢ ӦРІНІЗІНЕ ӀДӦК РЕСПУБЛИКА ПАЗЫ ВИКТОР ЗИМИН, ХАКАСИЯНЫҢ ХАЗЫХ ХАЙРАЛЛАҶАҢ МИНИСТРІ ВЛАДИМИР КОСТЮШ ПАЗА ХАБАРҶЫЛАР ХОЗЫЛҒАННАР.
САБЛЫҒ ЫҢААҶАХТАР
Итсе-де, Аннанаң Ярослав тӧреенінең республикаа саблан парғаннар. Олар Хакасияның перинатальнай кіні тоғынып пастааннаң неделя пазынаң тӧрееннер.
Іди 18 сентябрьда ӧріністіг хабар тараан - пала тапчаң наа орында пастағы пала Анна хызыҷах тӧреен. Ол олаңай полбас, ипчілернің имнег туразында хызыҷаххаох чол азарға кирек нооза. Пір час пазынаң, тізең, Ярославтың табызы истіле тӱскен. Ол ирен хылиинаң хызыҷахха чол пирген полар.
Соңа кӱніндӧк іҷелерні алғыстирға Хакасия пазының орынҷызы Ирина Смолина, республиканың хазых хайраллаҷаң министрі Владимир Костюш килгеннер. Ибзер нанар кӱнде, тізең, Хакасия пазы Виктор Зимин иркеҷектіг іҷелерні чахайахтығ удурлаан.
ТОҒАЗЫҒА ТИМНЕНІС
Залға толдыра чон. Ибіре чахайахтар чызы, ӧңніг шарлар. Туған-чағын паза чиит пабалар чӱрексініснең тоғыс ай сағаан тоғазыға тимненчелер. Екатерина Николаевна хызын паза пархаҷаан сығарарға килген. Аның чооғынаң, Ирина хызы наа имнег туразынзар кір парғанына уғаа ӧрінген паза мында пала тӧрітчеткеннернің пастағызы полчатханына пір дее чочынмаан. Мындох ууҷаның хыринда тӧрт частығ Антон туңмаҷаан ӧңніг шарларнаң сағыпча. Ағаа чоохтазарға маң чоғыл, позирға итчеткен шарларны пик тударға кирек.
Ікінҷі іҷе паза ууҷа Раиса Лазаревна ідӧк пу наа перинатальнай кінге уғаа чӧпсінче. Аның Марина хызы пеер иң пурун кіртір, че паланы ікінҷізін тӧріттір. Амды ол оолағас соонаң ӱр ниместең хызыҷахха килеріне ізенче ууҷа.
Чыыл парған чон аразында чиит пабаларны сидіксініс чох кӧр табарға чарир полған. Оларның ікізі дее чӱрексеен. Алексей Тюмереков - пӱӱл пастағызын на паба. Пастағы пала - оол. Хайдағ паба оолға ӧрінмес? Тӧлін апарар оолны Алексей позы адаан - Ярослав.
Лаврентий Ивандаев ікінҷізін паба пол парған полза даа, аның ӧрінізі пастағы пабадаң пір дее халбинча.
- Уғаа тың чӱрексеем, хараазын даа чахсы узубаам. Ипчімні, паламны табырах ибзер апарыбызарым килче, - кӧңнінең ӱлескен Лаврентий.
Мында, тізең, медсестра сығып, туған-чағыннарны хости залзар хығырған. Пабалар иркеҷектіг ипчілерінзер маңзырааннар.
АЛҒЫСТАСТАР
Чиит іҷелер Ирина Кулемееванаң Марина Тюмерекова - пу кӱннің ӧӧн матырлары. Олар іҷе полҷаң ипчілерге перинатальнай кінзер чол астылар.
Чиит іҷелерге алғыстас сӧстері соонаң чахайахтар читірілген. Мындох оларзар прай саринаң камералар кӧстелчеткеннер. Час палаларны, тізең, пу туста пабалары холда тутханнар.
Хакасия пазы Виктор Зиминнің чооғы чох алғыстас сӧстері толдыразынаң полбасчых, неке. Оларны ідӧк аның палаҷахтары тиирге чарир. Республикада мындағ алғым имнег туразы пӱдіріл парған Виктор Михайловичтің кӱстенізінең. Аннаңар регион пазына даа пу уғаа ӧріністіг кӱн.
- Прай чӱреемнең алғыстапчам іҷе-пабаларны пала тӧреенінең. Амды сірер, пу имнег учреждениезінің не нимес, тиксі Хакасияның тархынына кір пардыңар, - таныхтаан Виктор Зимин.
Ідӧк Хакасия пазына хынығ полған піліп аларға, хаиди анда іҷелерге чадарға.
- Уғаа истіг, прай ниме хандыра, - киречілеен Ирина Кулемеева.- Піске, тізең, пасха ниме кирек чоғыл! - ӧрінізін чазырбаан Виктор Михайлович.
Чиит іҷелер Хакасия пазынаң чахайахтар алғаннар, ыңааҷахтарға, тізең, харчағаста сыйыхтар читірілген. Ниме андазын кізее чоохтабааннар, че хай пірее чоохтардаң, пала тилітчең ойнаҷахтар осхас.
ОҢ ПОЛҒАН
Ідӧк ол кӱн пастағы сменадағы имҷілерні чеестееннер. Олар пастағы іҷелернең паза палаларнаң тоғынғаннар, прай кирек полызығны пиргеннер. Акушер-гинеколог Татьяна Когай чоохтапча:
- Чоох чоғыл, наа имнег туразы, наа чахсы оңдайлар ӧріндірче. Тоғынарға даа истіг, ипчілер дее чӧпсінчелер.
Имҷі Татьяна Эдуардовна пілче нименең тиңнестірерге. Ол Ағбандағы пала тапчаң турада тӧрт чыл тоғын салған.
Перинатальнай кіннің ӧӧн имҷізі Наталья Ржевскаяның искіриинең, пис кӱн аразына наа имнег туразында 30 пала тӧреен. Амды анда 100-ке чағын ипчі чатча, оларның 33-зі пу чағында іҷе поларға тимненче.
Чоох чоғыл, пу пала тапчаң наа орынға іҷедең пасха кізі орта паалағ пир полбас.
- Перинатальнай кінзер кір парарынаңар сағынмаан даа полғам. Че анзына ӧрінчем, чахсы ла сағыстар халғаннар, - чоохтапча Ирина. - Палаталар уғаа истіг, прай кирек ниме хости. Че иң тың чӧпсінчем имҷілерге, олар пос киреенде устар. Пісті уғаа чахсы хайығнаң ибіргеннер.
Ирина Кулемеева ікінҷі палазы хай-хай табырах паза ниик пу чарыхсар килген тидір. Ол оң полғанына киртінче, че кем пілер, арса, наа стенелер дее іҷее полысханнар. Піс, тізең, полған на іҷее мында оң поларына ізенчебіс.
Автор :
Екатерина ИҢДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде