ХАЙДА ПАРК ТӦСТЕЛЕР?
29.09.2017
Хабарлар
Ольга Левченко (сол саринда) паза Елена Ким.
Хакасияның Халых палатазында Ағбан город хыринда ағастығ парк тӧстиріне чарыдылған халых ӱзӱріглері ирткен.
Анда толдырығлығ, закон сығарҷаң ӱлгӱлер кізілері, Ағбан пилтірі, Алтай аймахтарының, Ағбан городтың устағ-пастаа, коммерческай нимес организациядағылар паза ӧткін чуртағҷылар араласханнар.
Ӱзӱрігні Хакасияның Халых палатазының кнезі Ольга Левченко апарған.
- Пӱӱл 28 августта республиканың Халых палатазынзар тиксі Россияның чон фронтының Хакасияҷа пӧлиинең Ағбан городтың хыринда парк тӧстирінеңер айланыс кірген. 2016 чылда 3 июльда алылған 353-ф3 № Федеральнай закон хоостыра, субъекттернің Халых палаталары, айланыс кірзе, халых ӱзӱріглерін 30 кӱн ирткенҷе иртірібізерге киректер. Ӱзӱріглерде араласчылар ағас паркын тӧстирге кирек тіп чӧпке килзелер, Халых палатазы халых ӱзӱріглерінеңер искірігнің пічиин тимнепче, - таныхтаан Ольга Левченко.
Тиксі Россиядағы чон фронтының Хакасияҷа пӧлиинің кнес орынҷызы Максим Мареев андағ парктың тузазынаңар искірген. Аның таниинаң, ол чонға истіг, арығ чир-чайаанда тынанар ӱчӱн тӧстелче. Ағастығ парк - ол чир-чайааннаң тузаланарға паза пасха даа кирекнең айғазарға чарадылбинчатхан чир. Пу кӱннерде Россияның 60 азыра субъектінде пу сурыға чарыдылған халых ӱзӱріглері иртче.
- Ағбан город ибіре арығлар чоғыл, че ағын суғлар, дамбалар паза сас чирлер илееде. Ағбан ибіре чирлернің кӧбізі суға кір парча. Аннаңар паркты тӧстирінде сидіксіністер пар. 2017 чылда 29 июльда 280-ФЗ № Федеральнай законзар алызығлар киріл парғанда, ағастығ парктарны, арығлардаң пасха, ідӧк суғ-кӧллер хазында тӧстирге чарир.
Анзы ӧзімнерні, аң-хустарны хайраллап халарға, суғларны кірлебеске оңдай пирер, - теен Максим Мареев.
Анаң ол ағастығ паркты тӧстир иң килістіре орынны картада кӧзіт пирген. Аның чооғынаң, аны Ағбан городтың ӱстӱнзархы саринда тӧстирге иң килістіре полар. Ағаа хоза, ағастығ парк хара тас аныпчатхан разрезтер тозынынаң арачылир.
Анаң чоох Ағбан город пазының орынҷызы Алексей Леминге пирілген. Ол пу проекттің чахсы паза читпес сариларын чарыда чоохтап пирген. Хайди ол таныхтаан, паркты тӧстирі - уғаа чахсы проект. Че амғы тусха ол тың на киліспинче. Аннаңар, город наа ла тӧстелчеткенде, сағынарға кирек полған. Хызылчар, Минсуғ городтар ибіре ағастар кӧп ӧсче. Ачырғастығ, че Ағбан ибіре андағ орын чоғыл. Амғы туста аны тӧстирге уғаа аар полар. Ноғадаңар? Ағбанның ӱстӱнзархы паза кидеркі сариндағы чирлер аал хонии чирлері полча, оларның ээлері пар. Аннаңар анда «ноған хур» тӧстирге киліспинче.
- Проектте ағастығ паркты Ағбан суғ хазында тӧстирге кирек тіп кӧрілче. Минің кӧрізімнең, аны ідӧк Ким хазында тӧстирге чарир. Картада кӧзіділ парған орында парк тӧстирге килістіре нимес орын. Пу чирде суғ тасча. Мында чир-чайааннаң тузаланарға паза пасха даа кирекнең айғазарға чаратпаза, чахсы поларҷых, - таныхтаан Алексей Лемин.
Ол ідӧк ағастығ паркты тӧстирінде сығысчатхан сидіксіністердеңер чоохтаан. Ӧӧн сидіксініс - ол парксар, Ағбан городтаң пасха, ідӧк Алтай паза Ағбан пилтірі аймахтарының чирлері кірче. Ідӧк пу чирлерде тоғынчатхан предприятиелер пар. Кӧзідімге, форель ӧскірчеткен хоных, Ағбан паза Харатас городтарға суғ пирчеткен станция. Аннаңар парктың хырығларын сала алыстырарға кирек.
Халых ӱзӱріглерінде Хакасияның Халых палатазының экология сурығларынҷа комиссиязының кізізі Елена Ким араласхан. Аның чооғынаң, парк тӧстирінҷе чарадығ алыл парза даа, аның соонҷа кӧрерге кирек полар: поғыр-похсахтаң, хуруғ ағастардаң арығлирға. Ағаа хоза, анда чир-чайааннаң тузаланарға паза пасха кирекнең айғазарға чарадылбинчатса даа, ол чонға азых поларға кирек. Ағаа хоза, мындағ паркта чонға пу орынны хайраллирынҷа ӧнетін кирексіністерге тудынарға кирек полар. Аны сайбаан ӱчӱн административнай кодексте хатығластар кӧріл парған. Олаңай кізілерге - 4-5 муң салковай штраф, должностьтағыларға -20 - 40 муң салковай, юридическай лицоларға 250 - 500 муң салковай штраф алай 90 кӱнге теере тоғыстарын тохтадары.
Халых ӱзӱріглерінде чуртағҷылар араласханохтар. Оларның пірсі - Алексей Вернигоров. Аның чооғынаң, ағастығ паркты тӧстирге кӧп ахча кирек. Хара тас аныпчатхан разрезтердегі тозын Ағбанзар парбас ӱчӱн, олох разрезтер ибіре ағастар одырт саларға чарир.
Алексей Лемин пу чӧпке чӧпсінмеен. Ағастығ парк разрезтер ибіре нимес, Ағбан город ибіре алай хыринда поларға кирек тіп таныхтаан ол.
Ідӧк чуртағҷылар паркты Ағбандағы культура паза тынағ паркында тӧстирге чарир тееннер. Че Ағбандағы культура паза тынағ паркы хайди даа город істінде орныхча. Ағаа хоза, хайди парк істінде парк тӧстирге чарир?
Мындағ оңдайнаң ағастығ парк тӧстирінҷе халых ӱзӱріглері ирт парған. Араласчылар паркты азарға кирек тіп ӱннерін пиргеннер, че пір ле кізі ӱнін пирбеен.
Ағастығ парк тӧстирдеңер сурығ пір ле хати кӧдірілбеен. Пу халых ӱзӱріглерінде аны тӧстирге бе, ағаа килістіре орын табылған ма сурығларҷа полған на араласчы пос сағызын читір пирерге кӱстенген. Сынап, андағ парк хайдағ даа орында тӧстелзе, ол ӧӧнінде чонға тузалығ полар тіп сағынчам.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы