ТОҒЫС СООНҶА - ХАКАСИЯЗАР
03.10.2017
Хабарлар
Пу кӱннерде Ағбандағы чонға тоғыс тапчаң кінде Хакасияның істеніс паза чонға тоғыс тапчаң министрі Ирина Ахметова брифинг иртірген. Анда «Хакас Республиканың региондағы политиказы 2017- 2021 чылларда» хазна программазының «Пасха хан чирлерінде чурттығ чир-суғҷыларыбысха Хакас Республиказар пос кӧңнінең кӧзерге хабазары» хоза программазынҷа хайдағ тоғыстар апарылчатханнаңар чоох парған.
Региональнай программа тоғынып пастааннаң істеніс паза тоғыс тапчаң министерствозар пу программада аралазарға 597 электроннай сурыныс пічии кірген.
Ол оңдайнаң, 2014 - 2016 чылларда региональнай программа хоостыра хырығ озаринаң килген 790 кізее гражданство алып алар оңдай пирілген. Ол санда 384 кізі сурыныс пічиинең айланған, 406 кізі оларның туған-чағыннары. 2014 чылда 54 кізі айланған, 59 кізі туған-чағыннары полча. 2015 чылда 200 чир-суғҷыбыс айланған, 225 - туған-чағыны. 2016 чылда 130 айланыс кірген, 122 кізі - айланғаннарның туған-чағыны. Тиксі алза, 384 айланғаннарның 29-зы - хырығ озариндағылар, 355 кізі, тізең, республикабыста саңай алай ӱр нимес тус чуртапчатханнар.
Сурыныс пічиинең айланғаннарның 50 % Украинадаң килген, 19 % - Казахстаннаң, 10 % -Узбекистаннаң. Пасхазы - Киргизиядаң, Таджикистаннаң, Азербайджаннаң, Молдовадаң, Германиядаң, ідӧк гражданство чох кізілер.
2014 - 2016 чылларда аймах сылтағлар хоостыра айланғаннарның 36 %-іне гражданство пирілбеен. Ирина Ахметова таныхтаан, чонға тоғыс тапчаң органнарға уламох чахсы, килчеткен кізілер ӱгредігліг ползалар. Ол оңдайнаң, программада араласчатхан паза Россия гражданствозын аларға чарадығ пирілген кізілернің 62 %-і пӧзік алай ортын профессиональнай ӱгредігліг. Олар Хакасияда пӱдіріг, садығ, хазых хайраллир паза ӱгредіг киреенде істенчелер. Сурыныс пічиинең айланған 384 кізінің 314-і тоғынча. 294 кізі республикадағы организацияларда тоғынча, 20 кізі пос киреен азып істенче. Ағаа хоза, амғы туста 10 кізі пӧзік паза ортын профессиональнай ӱгредіг алча.
Ідӧк таныхтирға кирек, пу программаның пӧгіннерінің пірсі - демография суриин пӧгері. Аннаңар программада араласчатханнарның аразында кӧп палалығ 17 сӧбіре. Программа араласчыларына республиканың полған на аймаанда чуртирға чарадылған. Ол оңдайнаң, городтарда 83 % чуртапча, аалларзар 17 % кӧзерге чаратхан. Ӱс чыл аразына программаа 2 миллион 400 муң салковай кӧрілген, че хорадығларға 2 миллион 10 муң салковай парыбысхан. Республика бюджедінең 878 муң салковай пирілген, федеральнай бюджеттең - 1 миллион 132 муң салковай.
Россия Правительствозы чахиинаң, 18.09.2017 чылда «Пасха хан чирлерінде чурттығ чир-суғҷыларыбысха 2017 - 2021 чылларда Хакас Республиказар пос кӧңнінең кӧзерге хабазары» программа чарадыға алылған. Программа тоғынчатхан туста чыл сай республиказар пасха хан чирінде чурттығ 900 чир-суғҷыбысты кӧзірері кӧрілче. 2017 чылда программаа 1160 муң салковай позыдылар. Ол санда 420 муң салковай республика бюджедінең пирілер, 740 муң салковай - федеральнай.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде