ИМНЕГ ТУРАЛАРЫН КӦЗӀРЕРЛЕР
04.10.2017
Хабарлар
Хакасияның хазых хайраллаҷаң министрі Владимир Костюш кадрлар политиказынаңар, санитарнай авиация тилізінеңер паза республиканың имнег учреждениелерін кӧзірердеңер чоохтаан. Министр имҷілерзер Интернетче пазынар сурыға алынҷа хайығ салған:
- Имҷілерзер электроннай оңдайҷа пазынар тоғыс апарылча, че читпестер ам даа пар. Имнег тураларында имҷілер чидіспинчеткен сылтаанда чон специалисттерзер пазын полбинча. Алынҷа специалистсер пазынарға чарир полза, хысха тус аразына теес полыбысча. Имҷізер кӱнде 7 - 10 кізі ле кіріп алар. Ирткен чылда миллион азыра кізі имҷілерзер, пазынып, кіріп алған. Піс пу системаны чахсыландырар тоғысты апарчабыс.
Пӱӱнгі кӱнде имҷілер чидіспинче. Пастағы полызығ пирчеткен тоғысха кадрлар чидіспинче. Че пӱӱнгі кӱнде 86 студентнең чӧптезіг иділ парған. Килчеткен чылда «Земский доктор» программа хоостыра чиит специалисттерге миллион салковай пирілер. Пу ахчаа чурт аларға алай пӱдірерге чарир. Пис чыл пір орында тоғынарға кирек полча. Кӧп кізі, пис чыл тоғыныбызып, пасха регионзар парыбызадыр. Имҷілер мында тоғынар ӱчӱн имнег тураларынзар наа технологиялар кирілче. Амды хирургия полызиинаң онкология ағырығларын даа имнебісчелер. Мыннаң мындар онкология кінін пӱдірері кӧрілче. Ідӧк Хакасияда пастағызын тоғысха алылчатхан имҷее 150 муң салковай тӧлелче. Кӧстегліг ӱгредіг студенттеріне стипендияа хоза ахча пирілче.
Имнег полызиин пирчеткен кіннің пӧліктерін республикадағы имнег туразынзар кӧзірербіс. Тиксі 10 азыра учреждениені кӧзірері кӧрілче. Перинатальнай кінзер ікі ипчілер консультациязы, пала тапчаң тура паза гинекология кӧзірілер. Имнег полызиин пирчеткен кін чабылбас. Аны Индіркі Согразар кӧзірерлер тіп саба чоох чӧрче.
Наркология диспансері паза администрация Хакасскай орамадағы имнег полызиин пирчеткен кінде орнығар.
Санитарнай авиация - президенттің программазы, Хакасия пилот субъекттері санында. Пістің амды ікінҷі вертолет пар. Пу программа ікі ай тоғын парир. Че пу тус аразына чӱсче кізіні аймах орыннардаң вертолетнаң ағылғабыс. Городтардаң паза аймахтардаң Ағбанзар чонны табырах ағылыбызар пу чахсы оңдай.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы