ӰГРЕТЧІНІҢ КӰЗІ - ӰГРЕНҶІЛЕРІНДЕ
04.10.2017
Хабарлар
ПӰӰЛ 5 ОКТЯБРЬДА РОССИЯДА ӰГРЕТЧІЛЕР КӰНІН ТАНЫХТАПЧАЛАР. Н.Ф.КАТАНОВТЫҢ АДЫНАҢ НАЦИОНАЛЬНАЙ ГИМНАЗИЯ-ИНТЕРНАТТА 600-че ОЛҒАН ӰГРЕНЧЕ.
АНА ОЛАРҒА ПІЛІС ПИРЕР ТОҒЫСТЫ АПАРЧАЛАР АНДАҒЫ ӰГРЕТЧІЛЕР. ОЛАР, ӦСЧЕТКЕН ТӦЛНІ ӰГРЕДІП, ТЫНАҒ ЧОХ ТОҒЫСТАРЫН ТӰЗІМНІГ АПАРЧАЛАР.
СІРЕР ПУ СОМДА ЛЮДМИЛА ГАВРИЛОВНА САГОЯКОВАНЫ ПАЗА АНЫҢ ХЫЗЫ НАТАЛЬЯ НИКОЛАЕВНА АЗРАКОВАНЫ КӦРЧЕЗЕР. ОЛАР АҒБАНДА Н.Ф.КАТАНОВТЫҢ АДЫНАҢ ХАКАС НАЦИОНАЛЬНАЙ ГИМНАЗИЯ-ИНТЕРНАТТА ТОҒЫНЧАЛАР.
Людмила Гавриловна, Ағбандағы ӱгретчілер институдын тоозып, Абазадағы олған туразында тоғынып пастаан. Ол туста олған туразының директоры Пётр Иванович Чебодаев полған. Соонаң Пётр Иванович, Ағбан городсар киліп, Хакас книга издательствозынаң устаан.
Людмила Гавриловнаның хада хонғаны Николай Николаевич Сагояковты ХакНИИЯЛИ-зар тоғынарға алғаннарында, ӱгретчілер сӧбірезі Ағбан городсар кӧс килген. Чоохтирға кирек, Николай Николаевич Ағбандағы ӱгретчілер институдының филология пӧлиин тоосхан полған.
Людмила Гавриловна хакас национальнай гимназиязар 1988 чылда воспитатель полып тоғынарға килген. Аннаң сығара ол пу ла школада тоғын парир. Піди санап килзе, отыс чылға чағын.
Анаң ол ӱгредии хоостыра пасха хан тіллері уроктарын (англия тілін) апар сыххан. Класс устағҷызы полып, тӧрт классты сығарған. Аның хай пірее ӱгренҷілері, пӧзік ӱгредіг заведениелерін тоозып, мындох тоғын парчалар. Кӧзідімге алза, Нелли Емельяновна Мамышева национальнай школада ідӧк пасха хан тіллері уроктарын апарча.
Людмила Гавриловна Сагояковаа 2012 чылда «Почетный работник общего образования» федеральнай синдегі пӧзік ат пиргеннер.
Паба-іҷезінің чолын пасча хызы Наталья Николаевна Азракова. Ол, 2000 чылда пуох гимназияны тоозып, Хакас хазна университедінде филология пӧлиинде ӱгренген. Ӱгретчі специальнозын алып, ол пастап Ағбандағы 28 № школада тоғынған полған. Пу школа ол туста национальнай полған.
Че город ӱлгӱлері ол школаны чабысхан соонда, Наталья Николаевна Н.Ф.Катановтың адынаң национальнай гимназия-интернатта орыс тілі паза литература уроктарын апар сыххан. Олох туста ол магистратураны тоозыбысхан.
Пастағы категориялығ ӱгретчі позының тоғызын чахсы пілче. Аның ӱгренҷілерінің піреезі орыс тілінең ЕГЭ сыныхтағларын 100 алай 98 баллға даа тудыбысча. Амды Наталья Николаевна 6 «б» класстың устағҷызы полча. Ол класстағы ӱгренҷілерні гимназия тоосханҷа апарар. Чиит ӱгретчі іди пылтыр пастағызын на, класс устағҷызы полып, олғаннарны школадаң ӱдескен.
Ӱгретчінің тоғызы оой нимес. Ӱгренҷілернең пір тіл алызып, оларның хылыхтарын пілерге кирек. Соонаң гимназияны тоосхан ӱгренҷілері, чуртаста чидіглерге чидіп, ӱгретчілерін, киліп, алғыстазалар, андада пілдістіг пол парар аның пу тоғызы тикке парбааны.
Хакасияда килер чылда Ӱгредіг чылы чарлалар. Аннаңар республикада ӱгредіг киреен, уламох чахсыландырып, тилідерге кирек. Пӱӱл аймах кӧстеглерҷе модульнай школалар азылары кӧрілче. Улуғ хайығ робототехникаа салылар.
Хакасияның правительствозы паза республиканың ӱгредіг паза наука министерствозы ӱгретчілерні тимнир тоғысты алғым апарчалар. Кӧзідімге алза, хакас тілі паза литература специальнозына ӱгренерге кірген студенттерге хоза стипендия тӧлелче. Школаларда хакас тілі ӱгретчілеріне ідӧк чахсы хабазығ пирілче.
Республикада ӱгренҷілер саны хозылчатханы ӱгретчілерні ӧріндірче. Пӱӱл ӱгретчілер санына 160 артиинаң чиит ӱгретчі хозылған.
Ӱгредіг ол чуртас чолынҷа астыхпин парар оңдай пирче. Постың тоғызын таллап аларында прай ізіктер асча. Чуртаста уғаа кирек сурығларны пӧгерге полысча. Ӱгретчі прай ол нимелерні олғаннарға пирче.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы